2015-08-21 rfa
 |
| នាយិកាប្រតិបត្តិអង្គការសីលការ និងជាប្រធានគណៈកម្មាធិការលើកស្ទួយស្ត្រីក្នុងវិស័យនយោបាយ អ្នកស្រី ធីតា ឃិះ ផ្ដល់បទសម្ភាសន៍កាលពីថ្ងៃទី២១ កក្កដា ឆ្នាំ២០១៥។
RFA/Um Raingsy
|
បើទោះជាលោក ផៃ ស៊ីផាន លើកឡើងថា អ្នកនយោបាយត្រូវតែមានក្រមសីលធម៌ក្តី ប៉ុន្តែសង្គមស៊ីវិលមើលឃើញថា ការថ្លែងរបស់លោក ផៃ ស៊ីផាន ដោយយកស្ត្រីមកប្រៀបធៀប នេះបង្ហាញឲ្យឃើញថា លោក ផៃ ស៊ីផាន មិនមែនជាអ្នកនាំពាក្យ ឬជាមន្ត្រីរដ្ឋាភិបាលដែលមានសីលធម៌នោះឡើយ។
សង្គមស៊ីវិលសាទរចំពោះការទទូចរបស់មន្ត្រីរដ្ឋាភិបាលដែលបានស្នើឲ្យអ្នកសារព័ត៌មាន ចូលរួមដុសក្អែលអ្នកនាំពាក្យក្នុងស្ថាប័នរដ្ឋនានា ក្នុងពេលបច្ចុប្បន្ន។ ការសាទរនេះ ធ្វើឡើងបន្ទាប់ពីរដ្ឋលេខាធិការ និងជាអ្នកនាំពាក្យទីស្ដីការគណៈរដ្ឋមន្ត្រី លោក ផៃ ស៊ីផាន បានថ្លែងកាលពីថ្ងៃទី១៩ ខែសីហា ជំរុញឲ្យអ្នកសារព័ត៌មានរាយការណ៍ទៅលោកបើមានអ្នកនាំពាក្យរដ្ឋាភិបាលណាមួយស្ពឹកស្រពន់។
ទោះជាយ៉ាងណា សង្គមស៊ីវិលផ្នែកការពារសិទ្ធិស្ត្រី ក៏បានរិះគន់លោក ផៃ ស៊ីផាន ដែលបានយកភរិយាលោក សម រង្ស៊ី មកធ្វើជាឧទាហរណ៍ដើម្បីប្រៀបធៀបសកម្មភាពរបស់បក្សប្រឆាំងជាមួយរដ្ឋាភិបាលកន្លងមក។ សង្គមស៊ីវិលលើកឡើងថា បើលោក ផៃ ស៊ីផាន ចង់ឲ្យអ្នកដទៃកែខ្លួន លោកក៏ត្រូវកែខ្លួនជាមុនផងដែរ។
នេះគឺជាការលើកទី១ហើយដែលមន្ត្រីរដ្ឋាភិបាលបានថ្លែងជាចំហឲ្យអ្នកកាសែតជួយចូលរួមដុសក្អែលមន្ត្រីនាំពាក្យស្ថាប័នរដ្ឋដែលស្ពឹកស្រពន់ ចាប់តាំងពីរដ្ឋាភិបាលបានបញ្ចេញបញ្ជីឈ្មោះអ្នកនាំពាក្យនៅតាមបណ្ដាក្រសួង ស្ថាប័នរដ្ឋនានា កាលពីខែកុម្ភៈ ឆ្នាំ២០១៥ មក។
ថ្លែងទៅកាន់អ្នកសារព័ត៌មាននៅក្នុងសន្និសីទកាសែតនាទីស្ដីការគណៈរដ្ឋមន្ត្រីកាលពីថ្ងៃទី១៩ ខែសីហា លោក ផៃ ស៊ីផាន បានថ្លែងកោតសរសើរចំពោះអ្នកសារព័ត៌មានដែលបានខិតខំបំពេញកាតព្វកិច្ចការងាររបស់ខ្លួន។ លោក ផៃ ស៊ីផាន ដែលកន្លងមកធ្លាប់រៀបឫកជាគ្រូប្រដៅអ្នកសារព័ត៌មាន និងបានរិះគន់បណ្ដាញសារព័ត៌មានដែលរិះគន់រដ្ឋាភិបាលនោះ លោកបានថ្លែងថា ការងារជាអ្នកសារព័ត៌មាន គឺជាការងារមួយដែលមានកាតព្វកិច្ចធ្ងន់ សម្រាប់អ្នកទទួលព័ត៌មានទូទៅ បើទោះជាត្រូវជួបឧបសគ្គ ឬមិនទទួលបានបុណ្យស័ក្ដិជាឯកឧត្ដម ឬឧកញ៉ា ដូចមន្ត្រីមួយចំនួនក្នុងជួររដ្ឋាភិបាលក្តី។
ប្រហែលជាមើលឃើញពីភាពលំបាករបស់អ្នកសារព័ត៌មាននេះហើយ ទើបលោក ផៃ ស៊ីផាន ថ្លែងវាយតម្លៃខ្ពស់ចំពោះការងាររបស់អ្នកសារព័ត៌មាន និងបានទទូចឲ្យអ្នកសារព័ត៌មានជួយចូលរួមដុះក្អែលមន្ត្រីនាំពាក្យស្ថាប័នរដ្ឋនានា ដែលស្ពឹកស្រពន់ក្នុងការឆ្លើយតបជាមួយអ្នកកាសែត៖ «មន្ត្រីនាំពាក្យណាស្ពឹកស្រពន់សរសេរសំបុត្រមកខ្ញុំ ប្រាប់អត្តចរិត។ សម្ដេចតេជោ លោកតែងប្រាប់ថា យើងខ្ញុំជាអ្នកផ្ដល់សេវាកម្មឲ្យបានប្រសើរ និងមានគុណភាពជូនដល់ប្រជាពលរដ្ឋទាំងអស់គ្នា ហើយអ្នកទទួលបន្ទុកផ្នែកព័ត៌មានត្រូវធ្វើយ៉ាងម៉េចដើម្បីឲ្យអ្នកយកព័ត៌មានឲ្យលោកយល់បានគ្រប់ជ្រុងជ្រោយ ដើម្បីផលប្រយោជន៍ពលរដ្ឋយើង ក្នុងការចូលរួមជាមួយរដ្ឋាភិបាល អភិវឌ្ឍ និងការពារស្រុកយើងទាំងអស់គ្នា»។
រដ្ឋាភិបាលកាលពីខែកុម្ភៈ ឆ្នាំ២០១៥ បានបញ្ចេញបញ្ជីរាយនាមមន្ត្រីនាំពាក្យរបស់ក្រសួង ស្ថាប័នរដ្ឋដើម្បីឲ្យអ្នកសារព័ត៌មានងាយស្រួលក្នុងការទាក់ទងស្វែងរកព័ត៌មានពីស្ថាប័នរដ្ឋាភិបាល។
យ៉ាងណាក៏ដោយ អ្នកសារព័ត៌មាននៅតែជួបបញ្ហាក្នុងការស្វែងរកព័ត៌មានពីមន្ត្រីនាំពាក្យមួយចំនួននៅឡើយ ដោយពេលខ្លះពួកគេបានបិទទូរស័ព្ទ ពេលខ្លះមិនលើកទូរស័ព្ទ ហើយពេលខ្លះមិនឆ្លើយសំណួរនឹងអ្នកសារព័ត៌មានតែម្ដង ដោយលើកឡើងថា ពួកគេកំពុងជាប់រវល់ប្រជុំ ឬមិនបានដឹងរឿងជាដើម ខណៈអ្នកនាំពាក្យខ្លះទៀតផ្ដល់ព័ត៌មាន តែមិនហ៊ានបញ្ចេញឈ្មោះ និងសំឡេងទៅវិញ។
បន្ថែមពីលើនេះ ក៏មានមន្ត្រីនាំពាក្យស្ថាប័នរដ្ឋខ្លះទៀត ជាពិសេសគឺអ្នកនាំពាក្យរដ្ឋសភា គឺលោក ឈាង វុន។ លោកក៏ធ្លាប់បានដេញអ្នកកាសែតចេញពីបរិវេណរដ្ឋសភា បានគំរាមបោកម៉ាស៊ីនថតរូបរបស់អ្នកកាសែត ឬបានណែនាំមិនឲ្យអ្នកកាសែតថតរូបលោកជិតពេក ព្រោះខ្លាចឃើញមុខលោកអាក្រក់ជាដើម។
លោក ផៃ ស៊ីផាន លើកទឹកចិត្តឲ្យអ្នកសារព័ត៌មានទាំងអស់ចូលរួមដុសក្អែលមន្ត្រីនាំពាក្យ ដោយលោកសន្យាថា លោកនឹងមិនបញ្ចេញឈ្មោះអ្នកសារព័ត៌មានណាដែលផ្ដល់ព័ត៌មានឲ្យលោកនោះឡើយ។ យ៉ាងណាក៏ដោយ ក្នុងពេលជាមួយគ្នានោះ លោក ផៃ ស៊ីផាន នៅពេលឆ្លើយសំណួររបស់អ្នកសារព័ត៌មានពីរឿងដែលលោក សម រង្ស៊ី ថ្លែងថា បក្សប្រឆាំងត្រូវឈប់ចាក់ក្រឡេករដ្ឋាភិបាល លោក ផៃ ស៊ីផាន បែរជាបានលើកឧទាហរណ៍ដោយយកប្រពន្ធលោក សម រង្ស៊ី មកធ្វើការប្រៀបធៀបជាមួយរឿងនេះទៅវិញ។
លោក ផៃ ស៊ីផាន៖ «ចាក់ក្រឡេកបានសេចក្ដីថា គាត់ប្រើយុទ្ធសាស្ត្រមួយដើម្បីបង្កើតឲ្យមានប្រតិកម្មពីរាជរដ្ឋាភិបាល ហើយទី២ ជាភាសា ជាយុទ្ធសាស្ត្រមួយថោកទាប ដែលយើងមិនអាចទទួលយកបានទេ។ ឥឡូវខ្ញុំនិយាយបញ្ច្រាសទៅវិញ ទៅដល់កេះឯកឧត្ដម សម រង្ស៊ី ខ្ញុំឃើញប្រពន្ធឯកឧត្ដមចូលទៅដេកជាមួយគេនៅក្នុងអូតែល សមដែរ? អាហ្នឹងវាអត់មានសីលធម៌ និងគុណធម៌។ ខ្ញុំមិនអាចនិយាយថា ខ្ញុំឃើញប្រពន្ធឯកឧត្ដមចូលដេកនៅក្នុងអូតែល ខ្ញុំពិបាកនិយាយណាស់ ព្រោះវាគ្មានសីលធម៌ អ្នកនយោបាយត្រូវមានក្រមសីលធម៌»។
បើទោះជាលោក ផៃ ស៊ីផាន លើកឡើងថា អ្នកនយោបាយត្រូវតែមានក្រមសីលធម៌ក្តី ប៉ុន្តែសង្គមស៊ីវិលមើលឃើញថា ការថ្លែងរបស់លោក ផៃ ស៊ីផាន ដោយយកស្ត្រីមកប្រៀបធៀប នេះបង្ហាញឲ្យឃើញថា លោក ផៃ ស៊ីផាន មិនមែនជាអ្នកនាំពាក្យ ឬជាមន្ត្រីរដ្ឋាភិបាលដែលមានសីលធម៌នោះឡើយ។
នាយិកាអង្គការសីលការ អ្នកស្រី ធីតា ឃិះ មានប្រសាសន៍ថា ការលើកឡើងរបស់លោក ផៃ ស៊ីផាន មិនមែនជារឿងល្អសម្រាប់លោកក្នុងនាមជាអ្នកនាំពាក្យរបស់រដ្ឋាភិបាលនោះឡើយ តែវាធ្វើឲ្យជះឥទ្ធិពល និងរូបភាពមិនល្អទៅលើរដ្ឋាភិបាល និងសង្គមជាតិទៅវិញទេ។
អ្នកស្រីថា លោក ផៃ ស៊ីផាន គួរតែដុះក្អែលខ្លួនឯងជាមុនសិន៖ «ខ្ញុំថាវាល្អដែលគាត់និយាយឲ្យជួយដុសក្អែល។ ចំពោះយោបល់របស់ខ្ញុំវិញ សុំឲ្យអ្នកកាសែតជួយដុះក្អែលដែលរើសអើងចំពោះស្ត្រី ហើយរឿងដែលបុរសតែងតែស៊ុមគ្រលុំគ្នាក្នុងការមាក់ងាយស្ត្រី ការលើកឡើងជាការមាក់ងាយ ហើយមើលទៅដូចជាគ្មានក្រមសីលធម៌ សូមឲ្យអ្នកកាសែតជួយដុះក្អែលគាត់មុនគេ»។
ចំណែកនាយកវិទ្យាស្ថានកម្ពុជា សម្រាប់ការសិក្សាផ្នែកព័ត៌មាន លោក មឿន ឈានណារិទ្ធ វិញមានប្រសាសន៍ថា លោកសាទរចំពោះលោក ផៃ ស៊ីផាន ដែលថ្លែងឲ្យអ្នកកាសែតចូលរួមកែលំអអ្នកនាំពាក្យរដ្ឋាភិបាល។ យ៉ាងណាក៏ដោយ លោកនៅតែគិតថា មានតែរដ្ឋាភិបាលខ្លួនឯងទេដែលមានឥទ្ធិពលខ្លាំងជាងអ្នកសារព័ត៌មាន ក្នុងការពង្រឹងសមត្ថភាព ឬផ្ដល់ការបណ្ដុះបណ្ដាលដល់អ្នកនាំពាក្យទាំងអស់ឲ្យយល់ពីសេរីភាពសារព័ត៌មាន ពីកាតព្វកិច្ច និងតួនាទីក្នុងការចែករំលែកព័ត៌មានទៅដល់អ្នកកាសែត និងសាធារណជន។
លោក មឿន ឈានណារិទ្ធ៖ «សាធារណជនទូទៅនៅក្នុងសង្គមប្រជាធិបតេយ្យ គាត់មានសិទ្ធិក្នុងការដឹងឮគ្រប់ព័ត៌មានទាំងអស់ដែលកើតឡើងនៅក្នុងរដ្ឋាភិបាល គ្រាន់តែអ្នកសារព័ត៌មានយើងគឺជាស្ពានជាអ្នកនាំសារ ដើម្បីទៅស្វែងរកសារព័ត៌មានទៅជូនសាធារណជន សូមឲ្យអ្នកនាំពាក្យ និងមន្ត្រីរដ្ឋាភិបាលទាំងអស់យល់ឃើញថា នៅពេលអ្នកសារព័ត៌មានទៅរកគាត់ ទៅសម្ភាសគាត់ គឺមិនមែនអ្នកសារព័ត៌មានយើងទៅឯកឯងក្នុងនាមឯកជននោះទេ គឺទៅក្នុងនាមសាធារណជនដែលជាអ្នកបោះឆ្នោតឲ្យមន្ត្រីរដ្ឋាភិបាលជាអ្នកគ្រប់គ្រងអំណាច»។
បច្ចុប្បន្ន ប្រទេសកម្ពុជា នៅមិនទាន់មានច្បាប់ស្ដីពីការទទួលបានព័ត៌មាននៅឡើយ។ យ៉ាងណាក៏ដោយ សង្គមស៊ីវិលលើកឡើងថា អ្នកនាំពាក្យរដ្ឋាភិបាលទាំងអស់ត្រូវតែមានកាតព្វកិច្ច និងគណនេយ្យភាពជាមួយប្រជាពលរដ្ឋដែលជាម្ចាស់អំណាច ខណៈដែលអ្នកកាសែតគឺជាអ្នកនាំយកសារព័ត៌មានទៅឲ្យពលរដ្ឋ។ ដូច្នេះពួកគេថា អ្នកនាំពាក្យរដ្ឋាភិបាល ទាំងអស់ត្រូវតែសហការជាមួយអ្នកកាសែតក្នុងនាមជាដៃគូ ហើយរដ្ឋាភិបាលក៏គួរតែមានវិធានការរដ្ឋបាលផ្សេងៗចំពោះអ្នកនាំពាក្យដែលខ្វះសីលធម៌ និងមានឥរិយាបថមិនល្អចំពោះអ្នកកាសែត៕
No comments:
Post a Comment