2015-08-05 rfa
លោកនាយករដ្ឋមន្ត្រី ហ៊ុន សែន ថ្លែងក្នុងពិធីសម្ពោធបើកការដ្ឋានសាងសង់ផ្លូវជាតិលេខ៥៨ នៅក្រុងប៉ោយប៉ែត ខេត្តបន្ទាយមានជ័យ កាលពីព្រឹកថ្ងៃទី១៨ ខែមីនា ឆ្នាំ២០១៥។
RFA/Hum Chamroeun
|
អង្គការសង្គមស៊ីវិលជាង ៥០ស្ថាប័ន បានចេញសេចក្ដីថ្លែងការណ៍រួមមួយ សំដែងការសោកស្ដាយនឹងសម្ដីរបស់លោក ហ៊ុន សែន ដែលប្រើពាក្យប្រមាថលើស្ត្រី និងប៉ះពាល់ដល់ស្ត្រីទូទៅ និងសង្គមជាតិទាំងមូល។ ទោះយ៉ាងនេះក្តី អ្នកនាំពាក្យគណបក្សប្រជាជនកម្ពុជា លើកឡើងថា សេចក្តីថ្លែងការណ៍នេះ មានចរិតនយោបាយ និងថា ក្រុមសង្គមស៊ីវិលនោះមិនមើលឃើញទង្វើរបស់រដ្ឋាភិបាល និងគណបក្សប្រជាជនកម្ពុជា។
ពាក្យប្រមាថស្ត្រីនៅទីសាធារណៈរបស់លោក ហ៊ុន សែន ធ្វើឲ្យក្រុមអង្គការសង្គមស៊ីវិលដែលធ្វើការលើកស្ទួយសិទ្ធិមនុស្ស និងជាពិសេសសិទ្ធិស្ត្រីនៅកម្ពុជា សំដែងការសោកស្ដាយ និងខកចិត្តយ៉ាងខ្លាំងចំពោះការប្រើប្រាស់ពាក្យសម្ដីមិនសមរម្យរបស់មេដឹកនាំបែបនេះ។
អង្គការសង្គមស៊ីវិល លើកឡើងទៀតថា ពាក្យសម្ដីរបស់នាយករដ្ឋមន្ត្រីធ្វើឲ្យប៉ះពាល់ដល់សេចក្ដីថ្លៃថ្នូររបស់ស្ត្រី និងសង្គមជាតិទាំងមូល ព្រមទាំងជាឧបសគ្គរារាំងដល់ការចូលរួមរបស់ស្ត្រីក្នុងវិស័យនានា និងជាឧបសគ្គក្នុងការលើកស្ទួយសិទ្ធិស្ត្រី។
នាយកប្រតិបត្តិអង្គការយេនឌ័រ និងអភិវឌ្ឍន៍ដើម្បីកម្ពុជា និងជាអគ្គលេខាធិការដ្ឋាននៃបណ្ដាញយេនឌ័រ និងអភិវឌ្ឍន៍ ហៅកាត់ GAD/C អ្នកស្រី រស់ សុភាព រំពឹងថា សេចក្ដីថ្លែងការណ៍នេះអាចដាស់តឿនដល់ការប្រើពាក្យសម្ដីរបស់លោកនាយករដ្ឋមន្ត្រី ក្នុងនាមជាមេដឹកនាំរដ្ឋ។ អ្នកស្រីបន្តថា ពាក្យពេចន៍របស់លោកនាយករដ្ឋមន្ត្រីធ្វើឲ្យប៉ះពាល់ខ្លាំងទៅលើស្ត្រីទូទៅ បើទោះជាលោកប្រមាថស្ត្រីតែម្នាក់ក៏ដោយ ហើយស្ត្រីម្នាក់នោះ មានឋានៈជាអ្វីក៏ដោយ ព្រោះលោកថ្លែងជាសាធារណៈ និងក្នុងតួនាទីលោកជានាយករដ្ឋមន្ត្រី៖«ខ្ញុំគិតថា ទោះសម្ដេច ហ៊ុន សែន និយាយសំដៅទៅបុគ្គលម្នាក់ ក៏ប៉ុន្តែមានប្រសាសន៍ជាសាធារណៈ និងជាថ្នាក់ដឹកនាំកំពូល អាចប៉ះពាល់ដល់កិត្តិយស និងសេចក្ដីថ្លៃថ្នូរសង្គមជាតិ។ មួយទៀត ពាក្យនេះអាចជាគំរូមិនល្អដល់មន្ត្រីផ្សេងទៀត»។
ទន្ទឹមនឹងមានលិខិតជូនពរ លោក ហ៊ុន សែន របស់មន្ត្រីគ្រប់ស្ថាប័នរបស់រដ្ឋ ព្រោះជាថ្ងៃខួបកំណើតរបស់លោក ហ៊ុន សែន នៅថ្ងៃទី៥ ខែសីហា។ អង្គការសង្គមស៊ីវិលជាង ៥០ស្ថាប័ន ក៏ផ្ញើលិខិតទៅ លោក ហ៊ុន សែន ដែរ ប៉ុន្តែលិខិតនេះ មិនមែនជាសារជូនពរក្នុងថ្ងៃខួបកំណើតលោកនោះទេ លិខិតនោះជាសារសម្តែងការមិនពេញចិត្តចំពោះសម្ដីរបស់លោកនាយករដ្ឋមន្ត្រីដែលបានប្រមាថស្ត្រី និងប្រាប់ទៅ លោក ហ៊ុន សែន សុំឲ្យបញ្ឈប់ការប្រមាថស្ត្រី និងប្រើពាក្យមិនសមរម្យមកលើស្ត្រី។
ការចេញលិខិតជាចំហជូនលោកនាយករដ្ឋមន្ត្រី ហ៊ុន សែន នេះ ធ្វើឡើងបន្ទាប់ពីលោកនាយករដ្ឋមន្ត្រី ហ៊ុន សែន កាលពីថ្ងៃទី៣ ខែសីហា ព្រមានធ្ងន់ទៅនារីម្នាក់ដោយមិនចំឈ្មោះថា នារីម្នាក់នោះអាក្រក់ហួស។ លោកលើកឡើងថា ក្នុងចំណោមអ្នកប្រើហិង្សាឲ្យសន្តិសុខរងរបួសធ្ងន់ ដោយនារីម្នាក់នោះធាត់ធាក់លើសន្តិសុខ៖ «នៅក្នុងចំណោមអ្នកដែលវ៉ៃដ៏សាហាវហ្នឹង មានស្រីម្នាក់ទាត់ ឈូសដូចគេហៅថា កីឡាកាសអ៊ីចឹ តាមចាប់មីស្រីមួយហ្នឹងឲ្យបាន! អាហ្នឹងគេមិនមែនហៅនារីទេណា គេហៅមីស្រី ឬគេហៅមី។ វ៉ៃសុទ្ធតែធាក់ វាហួសហេតុពេក មិនមែនជាការរំលោភសិទ្ធិស្រ្តីទេ ក៏ប៉ុន្តែវាអាក្រក់ហួស អ៊ីចឹងលោកប៉ូលិសនៅបន្តការងារ»។
សេចក្ដីថ្លែងការណ៍ដដែលនោះរំលឹកទៅលោក ហ៊ុន សែន ថា ប្រទេសកម្ពុជា បានផ្ដល់សច្ចាប័នលើអនុសញ្ញាស្ដីពីការលុបបំបាត់រាល់ទម្រង់នៃការរើសអើងប្រឆាំងនារីភេទ (CEDAW) ឆ្នាំ១៩៩២។ ជាងនេះទៅទៀត រដ្ឋាភិបាល និងសង្គមស៊ីវិល កំពុងលើកកម្ពស់ និងលុបបំបាត់ការរើសអើងលើស្ត្រី ដូចនេះរាល់ពាក្យសម្ដីមិនសមរម្យចំពោះស្ត្រីគួរជៀសវាង។
យ៉ាងណាក៏ដោយចុះ អ្នកនាំពាក្យគណបក្សប្រជាជនកម្ពុជា លោក សុខ ឥសាន ឆ្លើយតបថា សេចក្ដីថ្លែងនេះគ្រាន់តែការធ្វើរបស់ក្រុមតូចមួយដែលតែងតែមិនឃើញទង្វើល្អរបស់រដ្ឋាភិបាល ឬគណបក្សប្រជាជនកម្ពុជា។ លោក សុខ ឥសាន ថ្លែងការពារប្រសាសន៍លោក ហ៊ុន សែន ទៀតថា លោក ហ៊ុន សែន មិនប្រមាថស្ត្រីទូទៅទេ គឺលោកប្រមាថតែស្ត្រីម្នាក់ប៉ុណ្ណោះ ហើយលោកថា លោក ហ៊ុន សែន ក៏ជាពលរដ្ឋទូទៅម្នាក់ដែរ ដែលអាចបញ្ចេញមតិរបស់ខ្លួនបាន៖ «សម្ដេចនាយករដ្ឋមន្ត្រីលោកក៏ជាពលរដ្ឋម្នាក់ដែលមានសិទ្ធិបញ្ចេញមតិ ដូចជាអ្នកផ្សេងដែរ»។
បណ្ដាញអង្គការមិនមែនរដ្ឋាភិបាលសង្ឃឹមថា លោក ហ៊ុន សែន នឹងដើរតួជាគំរូ និងជំរុញឲ្យរាជរដ្ឋាភិបាលយកចិត្តទុកដាក់ក្នុងករណីលើកកម្ពស់សិទ្ធិស្ត្រី និងឈានទៅលុបបំបាត់រាល់ទម្រង់នៃការរើសអើងប្រឆាំងនឹងនារីភេទ៕
No comments:
Post a Comment