2015-08-20 rfa
 |
| សាក្សីទី៨ ឈ្មោះ យី ឡៃសូវ អតីតជានារីកងចល័តមួយរូបនៅការដ្ឋានធ្វើទំនប់អាងត្រពាំងថ្ម ខេត្តបន្ទាយមានជ័យ ជម្រាបអង្គជំនុំជម្រះសាលាដំបូងនៃសាលាក្ដីខ្មែរក្រហម នៅថ្ងៃទី២០ ខែសីហា ឆ្នាំ២០១៥។
Photo courtesy of ECCC
|
អង្គជំនុំជម្រះសាលាដំបូងនៃសាលាក្ដីខ្មែរក្រហម នៅថ្ងៃពុធ ទី២០ សីហា បានបញ្ចប់ការស្ដាប់សក្ខីកម្មរបស់សាក្សីឈ្មោះ តក់ ប៊ុយ ហើយចាប់ផ្ដើមស្ដាប់សក្ខីកម្មសាក្សីទី៨ ទាក់ទងនឹងអង្គហេតុការដ្ឋានធ្វើទំនប់អាងត្រពាំងថ្ម ខេត្តបន្ទាយមានជ័យ ដដែល។ សាក្សីទី៨ ឈ្មោះ យី ឡៃសូវ អតីតជានារីកងចល័តមួយរូបនៅការដ្ឋាននោះ។
សាក្សី យី ឡៃសូវ ជម្រាបអង្គជំនុំជម្រះសាលាដំបូងថា លោកស្រីធ្លាប់បានឃើញគេវាយសម្លាប់មនុស្សស្រីមានផ្ទៃពោះ នៅការដ្ឋានធ្វើទំនប់អាងត្រពាំងថ្ម៖ «បានឃើញតែគេវាយមួយដំបងទៅ ទម្លាក់ក្នុងរណ្ដៅគេជីកស្ពានទី១ ខាងលិច។ ដាក់តែមួយប៉ូស មិនដឹងថាស្លាប់ ឬមិនស្លាប់ តែគេទម្លាក់ដុំថ្មពីលើ។ គ្រាន់តែឃើញប៉ុណ្ណោះ ខ្ញុំមកកន្លែងវិញ។ ប្រុស ឬជាស្ត្រីមានផ្ទៃពោះ? ស្ត្រីមានផ្ទៃពោះ»។
លោកស្រី យី ឡៃសូវ មានប្រសាសន៍ទៀតថា ក្រៅពីហេតុការណ៍សម្លាប់ស្ត្រីមានផ្ទៃពោះម្នាក់នោះ លោកស្រីក៏ធ្លាប់ឃើញគេបណ្ដើរមនុស្សជាច្រើននាក់ យកទៅសម្លាប់នៅពេលយប់ដែរ៖ «គេឲ្យខ្ញុំយាមនៅកន្លែងជើងក្រានបាយ។ ខ្ញុំឃើញតែម្ដង។ ខ្ញុំដឹងដោយសារឮមាត់ស្រែក ហើយឮមាត់យំ ខ្ញុំឱនមើលទៅឃើញ។ ឮសំឡេងជាច្រើនយំរំពងដើរទៅ។ អត់មែនព្រាលទេ មើលទៅឃើញច្បាស់ ប៉ុន្តែមិនដឹងថាស្រីប៉ុន្មានប្រុសប៉ុន្មាន។ ប្រហែលពីម៉ោង ១២យប់ឡើងទៅ មានតែពន្លឺលោកខែ»។
ការអះអាងអំពីការសម្លាប់មនុស្សនៅការដ្ឋានអាងត្រពាំងថ្ម ក្នុងខេត្តបន្ទាយមានជ័យ គឺជាការបញ្ជាក់បន្ថែមទៅលើសក្ខីកម្មរបស់សាក្សីមុនៗ ដែលនិយាយថា បានឃើញសាកសពគេសម្លាប់ ហើយកប់នៅទំនប់អាងត្រពាំងថ្ម។
សាក្សី យី ឡៃសូវ ក៏រៀបរាប់អំពីការងារដោយបង្ខំ លំបាក ព្រមទាំងការមិនមានអាហារ និងមិនមានអនាម័យគ្រប់គ្រាន់ទេនៅការដ្ឋាននោះ។
ទាក់ទងនឹងអង្គហេតុរៀបការ លោកស្រីឲ្យដឹងថា អង្គការខ្មែរក្រហម បានបង្ខំឲ្យលោកស្រីរៀបការជាមួយយុវជនដែលមិនបានស្គាល់គ្នាមុនទេ។ លោកស្រីថ្លែងថា លោកស្រីមិនហ៊ានប្រកែកទេ ព្រោះខ្លាចគេយកទៅសម្លាប់ទាំងគ្រួសារ។
អង្គហេតុស្ដីពីការងារដោយបង្ខំនៅការដ្ឋានទំនប់អាងត្រពាំងថ្ម ដែលត្រូវចោទប្រកាន់ចំពោះជនជាប់ចោទ នួន ជា និង ខៀវ សំផន ក្នុងសំណុំរឿង ០០២ វគ្គ២ នេះ។
មន្ត្រីនាំពាក្យសាលាក្ដីខ្មែរក្រហម លោក នេត្រ ភក្ដ្រា ឲ្យដឹងថា អង្គជំនុំជម្រះសាលាដំបូង គ្រោងស្ដាប់សាក្សី និងដើមបណ្ដឹងរដ្ឋប្បវេណីចំនួន ១១នាក់នៅក្នុងអង្គហេតុនេះ ដែលអាចនឹងបញ្ចប់នៅចុងខែសីហា។
បន្ទាប់ពីការស្ដាប់សក្ខីកម្មរបស់សាក្សី យី ឡៃសូវ នេះទៅ អង្គជំនុំជម្រះសាលាដំបូង នឹងបន្តសវនាការស្ដាប់សាក្សីថ្មីមួយរូបទៀត នៅថ្ងៃព្រឹកច័ន្ទ ទី២៤ សីហា។ នៅថ្ងៃច័ន្ទ នោះដែរ អង្គជំនុំជម្រះ ក៏គ្រោងស្ដាប់សក្ខីកម្មដើមបណ្ដឹងរដ្ឋប្បវេណីមួយដែរ ដែលមានរហស្សនាមថា 2TCW269៕
No comments:
Post a Comment