ដោយ តាំង សារ៉ាដា
2015-08-22 rfa
ស្ត្រីអ្នកភូមិឡពាង ម្នាក់ ដួលសន្លប់ខណៈពេលដើរមកភ្នំពេញ តវ៉ារឿងដី កាលពីថ្ងៃទី១៣ សីហា ២០១៤។
RFA/Uon Chhin
|
អនុគណៈកម្មាធិការទទួលបន្ទុកកិច្ចការបរទេសនៃរដ្ឋសភាសហរដ្ឋអាមេរិក កាលពីថ្ងៃសុក្រ ទី២១ ខែសីហា បានរៀបចំសិក្ខាសាលាមួយស្ដីពីវិបត្តិដីធ្លីនៅកម្ពុជា។ ប្រធានបទនៃសិក្ខាសាលាដែលដាក់ចំណងជើងថា "សិទ្ធិកាន់កាប់ដីធ្លី និងការអភិវឌ្ឍនៅអាស៊ីអាគ្នេយ៍" ធ្វើឡើងនៅក្នុងរដ្ឋកាលីហ្វ័រញ៉ា (California)។
តំណាងសហគមន៍ខ្មែរប្រចាំរដ្ឋកាលីហ្វ័រញ៉ា សហរដ្ឋអាមេរិក លោក រី គៀ មានប្រសាសន៍ថា ប្រធានគណៈកម្មាធិការទទួលបន្ទុកកិច្ចការបរទេសនៃរដ្ឋសភាសហរដ្ឋអាមេរិក លោក អេដ រ៉យស៍ (Ed Royce) នឹងជំរុញឲ្យមានការបញ្ឈប់សកម្មភាពរំលោភសិទ្ធិមនុស្សនៅកម្ពុជា ដែលកំពុងមានសភាពធ្ងន់ធ្ងរ៖ «លោក អេដ រ៉យស៍ ក៏មានទឹកចិត្តជំរុញឲ្យមានការបញ្ឈប់អំពើព្រៃផ្សៃមកលើពលរដ្ឋរបស់ខ្លួន។ តាមយោបល់របស់ខ្ញុំ គាត់នឹងធ្វើយ៉ាងណាឲ្យបានជោគជ័យ»។
យ៉ាងហោចណាស់មានពលរដ្ឋខ្មែរនៅក្នុងរដ្ឋកាលីហ្វ័រញ៉ា ជិត ១ពាន់នាក់ នាំគ្នាចូលរួមសវនាការរបស់តំណាងរាស្ត្រសហរដ្ឋអាមេរិក ក្នុងទីក្រុងផូម៉ូណា (Pomona) ដើម្បីពិនិត្យលើផលប៉ះពាល់នានា ដោយសារការរំលោភដីធ្លី និងការរំលោភសិទ្ធិមនុស្សនៅក្នុងប្រទេសកម្ពុជា ឡាវ ភូមា និងប្រទេសហ្វីលីពីន។
លោក រី គៀ បន្តថា សវនាការកាលពីថ្ងៃសុក្រ នេះ គឺជាការទទូចរបស់ពលរដ្ឋខ្មែរក្នុងសហរដ្ឋអាមេរិក ដើម្បីជំរុញឲ្យសហរដ្ឋអាមេរិក ដាក់សម្ពាធដល់រដ្ឋាភិបាលទីក្រុងភ្នំពេញ ក្នុងការបញ្ឈប់ការធ្វើទុក្ខបុកម្នេញមកលើពលរដ្ឋរបស់ខ្លួន៖ «ពីព្រោះយើងគិតថា រហូតមកទល់ពេលនេះ ប្រសិនបើអាមេរិកាំង អត់ធ្វើអ្វីធំដុំទេ នោះការធ្វើទុក្ខបុកម្នេញរបស់រដ្ឋាភិបាលកម្ពុជា មកលើប្រជាពលរដ្ឋហ្នឹងនៅតែមានបន្ត...»។
ចំណែកមេធាវីអន្តរជាតិលោក រីឆាដ រ៉ូជើរ (Richard Rogers) ដែលជាមេធាវីជួសមុខឲ្យជនរងគ្រោះទាំងឡាយនៅកម្ពុជា ដែលបានដាក់ពាក្យបណ្ដឹងប្ដឹងទៅតុលាការព្រហ្មទណ្ឌអន្តរជាតិ (ICC) ពីបទឧក្រិដ្ឋកម្មប្រឆាំងមនុស្សជាតិក្នុងរបបដឹកនាំដោយលោក ហ៊ុន សែន ក៏បានចូលរួមក្នុងសវនាការនេះដែរ។
លោកថ្លែងថា សវនាការអំពីផលប៉ះពាល់នៃការរំលោភដីធ្លីនេះ គឺជាចំណុចសំខាន់សម្រាប់ពាក្យបណ្ដឹងរបស់លោកទៅតុលាការព្រហ្មទណ្ឌអន្តរជាតិ៖ «សវនាការនេះខ្ញុំនឹងផ្ដោតសំខាន់ទៅលើការរំលោភដីធ្លី ការបណ្ដេញពលរដ្ឋចេញពីដីធ្លីទាំងបង្ខំ។ ខ្ញុំនឹងផ្ដល់ព័ត៌មានដល់គណៈកម្មាធិការនេះអំពីទំហំនៃបញ្ហាទាំងនោះ ហើយខ្ញុំនឹងផ្ដល់អនុសាសន៍អំពីការកាត់បន្ថយនៃបញ្ហាទាំងនេះ»។
សេចក្ដីថ្លែងការណ៍របស់លោក អេដ រ៉យស៍ ដែលចេញផ្សាយនៅមុនការធ្វើសវនាការនេះ ឲ្យដឹងថា ជាងពាក់កណ្ដាលនៃពលរដ្ឋដែលកំពុងគ្រប់គ្រងដីធ្លី ពួកគេមិនមានប្លង់កម្មសិទ្ធិត្រឹមត្រូវនោះទេ។ នៅកម្ពុជា នៅពេលណាមានស្លាកអភិវឌ្ឍន៍ ពលរដ្ឋទាំងនោះត្រូវបានគេជម្លៀស។ សេចក្ដីថ្លែងការណ៍បន្តថា រដ្ឋាភិបាលកម្ពុជា និងក្រុមអ្នករកស៊ីក្នុងស្រុក ឬបរទេស ត្រូវទទួលត្រូវចំពោះការរំលោភដីធ្លីនេះ។
ផ្អែកតាមការបំភ្លឺនៅក្នុងសវនាការនេះ លោក អេដ រ៉យស៍ ក៏បានស្នើឲ្យមានការកត់ត្រាទុកនូវទង្វើរបស់រដ្ឋាភិបាលកម្ពុជា ដែលដឹកនាំដោយលោក ហ៊ុន សែន ដែលនៅតែបន្តក្ដោបក្ដាប់អំណាច និងសេដ្ឋកិច្ចតាមរយៈការគ្រប់គ្រងដោយការគាបសង្កត់អ្នកដែលរិះគន់ និងអ្នកតវ៉ាណាដែលហ៊ានតវ៉ារារាំង។
សេចក្ដីថ្លែងការណ៍របស់លោក អេដ រ៉យស៍ ក៏បានលើកចំឈ្មោះ លោក មាជ សុវណ្ណារ៉ា សកម្មជនគណបក្សសង្គ្រោះជាតិ ដែលកំពុងជាប់ឃុំឃាំងដោយសារការតវ៉ាដោយសន្តិវិធី ប្រឆាំងនឹងរបបផ្ដាច់ការនៅកម្ពុជា នេះដែរ។ លោកថា ការឃុំខ្លួនលោក មាជ សុវណ្ណារ៉ា និងសកម្មជននយោបាយដទៃទៀតធ្វើឡើងយ៉ាងអយុត្តិធម៌៕
No comments:
Post a Comment