2015-08-10 rfa
គណបក្សសង្រ្គោះជាតិប្រគល់ផែនទីដែលខ្លួនបានទិញពីបរទេសចំនួន២៦ផ្ទាំង ជាឌីជីថល ទៅរាជបណ្ឌិត្យសភា ទីស្នាក់ការកណ្ដាលគណបក្សសង្គ្រោះជាតិ នៅថ្ងៃទី១០ ខែសីហា ឆ្នាំ២០១៥។ |
គណបក្សសង្គ្រោះជាតិ បានប្រគល់ផែនទីដែលខ្លួនមានចំនួន ២៦ផ្ទាំង ជាឌីជីថល (Digital) នៅក្នុងឌីវីឌី (DVD) ប្រភេទបោនក្លាស ខ្នាត ១/១០០.០០០ ផលិតដោយក្រុមភូមិសាស្ត្រឥណ្ឌូចិន ទៅក្រុមស្រាវជ្រាវនៃរាជបណ្ឌិត្យសភា នៅថ្ងៃទី១០ ខែសីហា នាទីស្នាក់ការកណ្ដាលគណបក្សសង្គ្រោះជាតិ។ រាជបណ្ឌិត្យសភាថា ផែនទីដែលខ្លួនបានទទួលនៅពេលនេះ អាចជាផែនទីចុងក្រោយដើម្បីយកទៅផ្ទៀងផ្ទាត់។
ផែនទីដែលគណបក្សសង្គ្រោះជាតិ បានផ្ដល់នេះ បន្ទាប់ពីខ្លួនបានទិញពីបណ្ណាល័យប្រទេសនៅប្រទេសបារាំង និងស្របពេលដែលប្រមុខរដ្ឋាភិបាលប្រកាសឲ្យគណបក្សនេះប្រគល់មករដ្ឋាភិបាល ឬរាជបណ្ឌិត្យសភាធ្វើការផ្ទៀងផ្ទាត់។
ភាគីទាំងទី២ រំពឹងថា ផែនទីនេះ និងផែនទីផ្សេងៗ អាចនឹងរកដំណោះស្រាយរួមមួយឃើញ ដើម្បីដោះស្រាយបញ្ហាជម្លោះព្រំដែនវៀតណាម។
មន្ត្រីជាន់ខ្ពស់នៃគណបក្សសង្គ្រោះជាតិ លោក ហុង សុខហួរ បញ្ជាក់ថា ផែនទីខ្លួនដែលមាននេះ មិនមែនបញ្ជាក់ថា ជាផែនទីពិតដែលកម្ពុជា ប្រើប្រាស់នោះទេ ប៉ុន្តែគណបក្សសង្គ្រោះជាតិ យល់ថា ផែនទីនេះនឹងមានប្រយោជន៍ដល់រដ្ឋាភិបាលកម្ពុជា។ លោករំពឹងថា បន្ទាប់ពីរាជបណ្ឌិត្យសភាបានទទួលផែនទីនេះ នៅពេលអ្នកនយោបាយសហការជាមួយអ្នកបច្ចេកទេស នឹងអាចដោះស្រាយបញ្ហាដែលកំពុងកើតឡើងសព្វថ្ងៃនេះបាន៖
«យើងនៅតែរំពឹងថា បើសិនមជ្ឈដ្ឋាននយោបាយ និងបច្ចេកទេសសហការគ្នាច្បាស់ជាដោះស្រាយចេញហើយ ឲ្យតែគិតរឿងដីជាធំ កុំគិតរឿងនយោបាយ»។
ការប្រគល់ផែនទីរបស់គណបក្សប្រឆាំងឲ្យទៅក្រុមស្រាវជ្រាវនៃរាជបណ្ឌិត្យសភានៅពេលនេះ ក្រោយពេលដែលអង្គការសហប្រជាជាតិ កាលពីថ្ងៃទី៦ ខែសីហា ផ្ដល់ចម្លើយមកកម្ពុជា ថា ខ្លួននឹងឲ្យរដ្ឋាភិបាលខ្មែរខ្ចីផែនចំនួន ១៨ផ្ទាំង ខ្នាត ១/១០០.០០០ ប្រភេទ UTM ជាផែនទីដែលកម្ពុជា ដាក់ប្ដឹងទៅអង្គការសហប្រជាជាតិ ស្ដីពីសហរដ្ឋអាមេរិក ទម្លាក់គ្រាប់បែកនៅកម្ពុជា ក្នុងឆ្នាំ១៩៦៤។
លោកបណ្ឌិត សុខ ទូច ប្រធានក្រុមស្រាវជ្រាវ និងជាប្រធានវិទ្យាស្ថានទំនាក់ទំនងអន្តរជាតិ នៃរាជបណ្ឌិត្យសភាកម្ពុជា ថ្លែងក្នុងពេលទទួលផែនទីថា រាជបណ្ឌិត្យសភាបានទទួលផែនទីពីប្រភពនានា ចំនួន ៦ប្រភព ហើយផែនទីដែលគណបក្សសង្គ្រោះជាតិ ផ្ដល់ឲ្យពេលនេះ គឺជាផែនទីចុងក្រោយដែលរាជបណ្ឌិត្យសភាយកទៅចងក្រងធ្វើជាឯកសារ។
លោកបណ្ឌិត សុខ ទូច បន្តថា នៅពេលរាជបណ្ឌិត្យសភាធ្វើការងាររួចរាល់ នឹងប្រគល់ទៅឲ្យគណបក្សដែលមានអាសនៈនៅក្នុងសភា៖ «អ្វីដែលជាគោលការណ៍ចម្បង គឺយើងចង់បញ្ចប់ផែនទីនៅក្រោមតុ លើកយកផែនទីដាក់លើតុ ឲ្យប្រជាពលរដ្ឋទាំងអស់បានដឹងការពិត»។
គិតមកទល់ពេលនេះ ក្រុមស្រាវជ្រាវបានទទួលផែនទីពីស្ថាប័នមួយចំនួន រួមមានពីប្រធានគណៈកម្មាធិការព្រំដែនកម្ពុជា កំពុងនិរទេសខ្លួននៅប្រទេសបារាំង លោក ស៊ាន ប៉េងសែ បណ្ណាល័យប្រទេសបារាំង បណ្ណាល័យព្រឹទ្ធសភាប្រទេសអាមេរិក អង្គការសហប្រជាជាតិ រាជរដ្ឋាភិបាលកម្ពុជា អ្នកសិក្សាស្រាវជ្រាវជាច្រើនរូប និងចុងក្រោយផែនទីទទួលពីគណបក្សសង្គ្រោះជាតិ។ រាជបណ្ឌិត្យសភា នឹងធ្វើការផ្ទៀងផ្ទាត់លើផែនទីដែលខ្លួនទទួលបានទាំងអស់ ហើយក៏មានចុះទៅទីតាំងពិតមួយចំនួនផងដែរ៕
1 comment:
It doesn't matter how many map you gave to them , the question we Khmer need to ask Did this fascist government will agree and implement this map or not? period . If this dictator puppet Hun Sen and Yuon patron don't want it, what we Khmer can do ? Hope of Khmer citizen can't realistically existed if the traitor head don't approve it .
Post a Comment