ដោយ ថា កិត្យា
2015-07-23
លោកនាយករដ្ឋមន្ត្រី ហ៊ុន សែន ដាក់បទបញ្ជាដាច់ណាត់មិនឱ្យមានបដិវត្តពណ៌នៅកម្ពុជា រួមទាំងផ្ដល់អនុសាសន៍ និងយុទ្ធសាស្ត្រផ្សេងៗទៀត កាលពីព្រឹកថ្ងៃទី២៣ ខែកក្កដា ក្នុងពិធីសំណេះសំណាលជាមួយកងកម្លាំងប្រដាប់អាវុធ និងមន្ត្រីរាជការមកពីបណ្ដាអង្គភាពនានា នៅទូទាំងប្រទេសប្រមាណ ៥.០០០នាក់។
ទាក់ទិនបញ្ហានេះ អ្នកវិភាគយល់ថា រដ្ឋាភិបាលកំពុងតែភ័យខ្លាចស្រមោលខ្លួនឯង ខណៈមានចលនាតវ៉ាផ្សេងៗកើតឡើងជាហូរហែ។
លោកនាយករដ្ឋមន្ត្រី ហ៊ុន សែន និងជានាយឧត្ដមសេនីយ៍ផុតលេខផ្កាយមាស៥ មានប្រសាសន៍ថា កងកម្លាំងប្រដាប់អាវុធគឺជាឧបករណ៍របស់រដ្ឋក្នុងកិច្ចការពារប្រជាជាតិ ការពាររដ្ឋធម្មនុញ្ញ និងការពាររដ្ឋាភិបាលស្របច្បាប់ ពោលគឺរាល់ទង្វើខុសច្បាប់ត្រូវអនុវត្តតាមច្បាប់ ហើយទង្វើផ្ដួលរំលំរដ្ឋាភិបាលដោយខុសច្បាប់នោះ ត្រូវកម្ចាត់ចោលភ្លាមដោយគ្មានការស្ទាក់ស្ទើរនោះទេ។
ការដាក់បញ្ជាដាច់ណាត់ដល់កងកម្លាំងប្រដាប់អាវុធគ្រប់ប្រភេទ អោយកម្ចាត់ចោលបដិវត្តន៍ពណ៌នៅក្នុងប្រទេសកម្ពុជា នាទីបញ្ជាការកងអង្គរក្សទួលក្រសាំង ក្នុងក្រុងតាខ្មៅ នៅព្រឹកថ្ងៃទី២៣ ខែកក្កដា ឆ្នាំ២០១៥ នេះ គឺធ្វើឡើងស្របពេលមានចលនាតវ៉ាក្នុងរឿងព្រំដែនពីសំណាក់ប្រជាពលរដ្ឋយ៉ាងផុលផុស ដែលដឹកនាំដោយគណបក្សសង្គ្រោះជាតិ ក្នុងពេលថ្មីៗនេះ។
អ្នកនាំពាក្យក្រសួងមហាផ្ទៃ លោក ខៀវ សុភ័គ បញ្ជាក់ថា បដិវត្តន៍ពណ៌ គឺផ្ដើមចេញពីបាតុកម្មតវ៉ាដូចដែលបានកើតមាននៅតាមបណ្ដាប្រទេសមជ្ឈិមបូព៌ា ដូចជាទុយណេស៊ី (Tunisia) លីប៊ី (Libya) ស៊ីរី (Syria) ជាឧទាហរណ៍ស្រាប់ ហើយគណបក្សសង្គ្រោះជាតិ ក៏បានយករូបមន្តទាំងនោះមកអនុវត្តនៅកម្ពុជា ជាច្រើនលើកច្រើនសាមកហើយដែរ ចាប់តាំងពីក្រោយពេលបោះឆ្នោត ឆ្នាំ២០១៣៖ «បដិវត្តន៍ពណ៌គឺជាការប្រើប្រាស់កម្លាំងតវ៉ាដោយកម្លាំងប្រជាជន ឬហៅថា People Power ដើម្បីផ្ដួលរំលំរដ្ឋាភិបាលស្របច្បាប់។ ឧទាហរណ៍ ដូចកន្លងមកបក្សប្រឆាំងប្រមូលប្រជាពលរដ្ឋជាច្រើនចូលកាន់កាប់ទីក្រុងភ្នំពេញ ក្រោយពេលបោះឆ្នោតអីហ្នឹង គេហៅថា បដិវត្តន៍ពណ៌ ព្រោះវាមិនមែនជាបាតុកម្ម ធ្វើឡើងដោយសុទ្ធចិត្តទេ គឺក្នុងគោលបំណងផ្នូលរំលំតែម្ដង»។
ឆ្លើយតបចំពោះបញ្ហានេះ អ្នកនាំពាក្យគណបក្សសង្គ្រោះជាតិ លោក យ៉ែម បុញ្ញឫទ្ធិ បញ្ជាក់ថា ជាគោលការណ៍ គណបក្សប្រឆាំងចង់ឲ្យមានការបោះឆ្នោតដោយត្រឹមត្រូវ និងយុត្តិធម៌ ដូច្នេះរឿងបដិវត្តន៍ពណ៌មិនមែនជារឿងរបស់គណបក្សសង្គ្រោះជាតិឡើយ៖ «ខ្ញុំគិតថា ទៅលើទិដ្ឋភាពជាក់ស្ដែងនៃសង្គម រហូតមកដល់ពេលនេះ យើងបានជជែកដោះស្រាយបញ្ហាជាច្រើន ដែលហាក់ដូចជាមិនមានអ្វីជាបញ្ហាបដិវត្តន៍ពណ៌នោះទេ។ ដូច្នេះការសម្តែងមតិ ការផ្ដល់មតិយោបល់ទាំងអស់នោះ វាមិនមែនជារឿងបដិវត្តន៍នោះទេ»។
សារផ្ដាំផ្ញើដល់កងកម្លាំងប្រដាប់អាវុធនេះ ត្រូវបានមន្ត្រីជាន់ខ្ពស់រដ្ឋាភិបាលបញ្ជាក់ថា គឺដើម្បីទប់ទល់ការប៉ុនប៉ងបំផ្លាញសុខសន្តិភាព ព្រមទាំងរក្សាលំនឹងស្ថិរភាពរបស់ជាតិកម្ពុជា។
ទាក់ទិនបញ្ហានេះដែរ អ្នកសិក្សាការអភិវឌ្ឍសង្គម លោក កែម ឡី យល់ឃើញថា រដ្ឋាភិបាលកំពុងតែភ័យខ្លាចស្រមោលខ្លួនឯង ខណៈដែលមានចលនាតវ៉ាផ្សេងៗកើតឡើងជាហូរហែ តួយ៉ាងដូចជារឿងព្រំដែន រឿងកាប់បំផ្លាញព្រៃឈើ និងការលាបពណ៌ដាក់គ្នាទៅវិញទៅមកជាដើម៖ «ទ្រឹស្ដីខ្មែរយើងគេថា គោដំបៅខ្នងក្អែកហើររំលងរំសាយកន្ទុយ! នៅពេលដែលមានចលនាតវ៉ាមួយចំនួនដើម្បីការពារព្រៃឈើ ការពារព្រំដែន និងចលនាកុំអោយមានជនអន្តោប្រវេសន៍នេះ ទើបគាត់ខ្លាចខ្លួនឯង»។
ក្រៅពីបទបញ្ជាកម្ចាត់ចោលបដិវត្តពណ៌នេះ លោកនាយករដ្ឋមន្ត្រីក៏អំពាវនាវដល់កងកម្លាំងប្រដាប់អាវុធគ្រប់ប្រភេទ ការពារឯករាជ្យ អធិបតេយ្យភាព បូរណភាពទឹកដី ត្រូវពង្រឹងសន្តិសុខ សណ្ដាប់ធ្នាប់សង្គម ខិតខំកម្ចាត់ចោលនូវក្រុមចោរប្លន់ប្រដាប់អាវុធ ក្រុមជួញដូរមនុស្ស ជួញដូរគ្រឿងញៀន ពង្រឹងការអនុវត្តគោលនយោបាយភូមិ ឃុំមានសុវត្ថិភាព ទប់ស្កាត់ការកាប់បំផ្លាញព្រៃឈើ ការដឹកជញ្ជូនឈើខុសច្បាប់ ការជីករ៉ែគ្រប់ប្រភេទ រួមទាំងការបូមខ្សាច់អនាធិបតេយ្យ ដើម្បីចូលរួមអភិវឌ្ឍន៍ប្រទេសជាតិឲ្យបានជឿនលឿន៕
No comments:
Post a Comment