2015-07-25 rfa
តំណាងរាស្ត្រគណបក្សសង្គ្រោះជាតិ លោក អ៊ុំ សំអាន (អាវខ្មៅ) សួរអំពីផែនទីដែលមន្ត្រីរដ្ឋាភិបាលបង្ហាញនាទីស្ដីការគណៈរដ្ឋមន្ត្រី នៅថ្ងៃទី២ ខែកក្កដា ឆ្នាំ២០១៥។
RFA/Rann Samnang
|
តំណាងរាស្ត្រគណបក្សសង្គ្រោះជាតិ បន្ទន់ឥរិយាបថ ខណៈដែលស្ថានការណ៍នយោបាយកំពុងឡើងកម្ដៅ ដោយផ្ញើលិខិតសុំអធ្យាស្រ័យពីប្រធានរដ្ឋសភា និងបញ្ឈប់គម្រោងប្ដឹងលោក ហេង សំរិន ទៅក្រុមប្រឹក្សាធម្មនុញ្ញ។
តាមរយៈលិខិតមួយច្បាប់ផ្ញើទៅប្រធានរដ្ឋសភា ចុះថ្ងៃទី២៤ ខែកក្កដា តំណាងរាស្ត្រគណបក្សសង្គ្រោះជាតិ លោក អ៊ុំ សំអាន សូមប្រធានរដ្ឋសភាមេត្តាអធ្យាស្រ័យ និងអត់ឱនឲ្យរូបលោកដោយក្តីអនុគ្រោះ។ ចារនៅលិខិតរបស់លោក អ៊ុំ សំអាន ប្រធានរដ្ឋសភា លោក ហេង សំរិន ផ្ដល់នូវការអធ្យាស្រ័យចំពោះលោក អ៊ុំ សំអាន ដោយបញ្ចប់ត្រឹមការដាក់ទណ្ឌកម្មខាងវិន័យដូចមានចែងក្នុងសេចក្ដីសម្រេចចុះថ្ងៃទី២៤ ខែកក្កដា។
តំណាងរាស្ត្រគណបក្សសង្គ្រោះជាតិ លោក អ៊ុំ សំអាន ថ្លែងបញ្ជាក់ឲ្យដឹងថា ខ្លឹមសារលិខិតរបស់លោក គឺដើម្បីបញ្ចប់កម្ដៅនយោបាយ និងប្រើប្រាស់វប្បធម៌សន្ទនាដើម្បីបញ្ចប់ជម្លោះរវាងលោក និងប្រធានរដ្ឋសភា។ ក្រៅពីផ្ញើលិខិតសុំអធ្យាស្រ័យ លោក អ៊ុំ សំអាន ឲ្យដឹងទៀតថា គម្រោងដែលលោកប្ដឹងលោក ហេង សំរិន ទៅក្រុមប្រឹក្សាធម្មនុញ្ញ ក៏ត្រូវបញ្ចប់ដែរ៖ «ខ្ញុំចង់បញ្ចប់បញ្ហាហ្នឹងជាមួយសម្ដេច ហេង សំរិន ដើម្បីបើកផ្លូវកុំឲ្យមានការប្ដឹងផ្ដល់ទៅប្រព័ន្ធតុលាការ។ វារឿងត្រូវវែងឆ្ងាយទៀត បើសិនជាយើងមិនចរចាគ្នាទេ។ រឿងខ្ញុំត្រូវតែប្ដឹងគាត់ទៅក្រុមប្រឹក្សាធម្មនុញ្ញ គាត់ត្រូវតែប្ដឹងខ្ញុំទៅតុលាការ ដូច្នេះយើងបញ្ចប់រឿងតែម្ដងទៅ»។
លិខិតរបស់លោក អ៊ុំ សំអាន នេះ ធ្វើឡើងបន្ទាប់ពីគណៈកម្មាធិការអចិន្ត្រៃយ៍រដ្ឋសភា បានដាក់ពិន័យដោយព្យួរការងារ ហាមមិនឲ្យចូលរួមប្រជុំសភាចំនួន ១៥លើក និងកាត់ប្រាក់ខែ ៥០ភាគរយ រយៈពេល ២ខែ ដោយចោទថា ប្រព្រឹត្តខុសបទបញ្ជាផ្ទៃក្នុងពាក់ព័ន្ធនឹងការរិះគន់ប្រធានរដ្ឋសភា។
អ្នកនាំពាក្យរដ្ឋសភា និងជាតំណាងរាស្ត្រមកពីគណបក្សប្រជាជនកម្ពុជា លោក ឈាង វុន ស្វាគមន៍លិខិតរបស់លោក អ៊ុំ សំអាន និងថា លោកសប្បាយចិត្តនៅពេលឃើញលិខិតនេះ។ ក្រោយពីផ្ញើលិខិតទៅលោកប្រធានរដ្ឋសភា លោក អ៊ុំ សំអាន គ្រោងចូលជួបសំណេះសំណាលជាមួយលោក ហេង សំរិន ផ្ទាល់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
No comments:
Post a Comment