មិនថាអ្នកនយោបាយនៅប្រទេសកម្ពុជាទេ សូម្បីអ្នកនយោបាយនៃបណ្តាប្រទេសដែលបានស្គាល់ប្រទេសកម្ពុជា សុទ្ធតែបានដាក់ការចាប់អារម្មណ៍មកលើថ្នាក់ដឹកនាំគណបក្សប្រជាជនកម្ពុជា នៅត្រង់ចំណុចប្រធានគណបក្សគឺសម្តេចអគ្គមហាធម្មពោធិសាល ជា ស៊ីម ដែលបានទទួលមរណភាពកាលពីថ្ងៃទី០៨ ខែមិថុនា ឆ្នាំ២០១៥ម្សិលមិញ ត្រូវបានលក្ខន្តិកៈគណបក្សចងមិនឲ្យធ្វើជានាយករដ្ឋមន្ត្រីនៃស្ថាប័ននីតិប្រតិបត្តិទេ បែរជាប្រគល់តំណែងនាយករដ្ឋមន្ត្រីដ៏សំខាន់ឲ្យទៅអនុប្រធានគណបក្ស គឺសម្តេចអគ្គមហាសេនាបតីតេជោ ហ៊ុន សែន ដែលល្បីល្បាញថា ជាបុរសខ្លាំងនៃកម្ពុជាទៅវិញ ខណៈបណ្តាប្រទេសនានាក្នុងពិភពលោក ប្រធានគណបក្សដែលជាប់ឆ្នោតត្រូវតែឡើងកាន់តំណែងជាប្រធានាធិបតី ឬជានាយករដ្ឋមន្ត្រី ។
ឥឡូវនេះ សម្តេចអគ្គមហាធម្មពោធិសាល ជា ស៊ីម ជាប្រធានគណបក្សប្រជាជនកម្ពុជា បានទទួលមរណភាពហើយៗតំណែងប្រធានគណបក្សប្រជាជនកម្ពុជាភាគរយច្រើនបំផុតនឹងធ្លាក់ទៅក្នុងកណ្តាប់ដៃសម្តេចអគ្គមហាសេនាបតីតេជោ ហ៊ុន សែន ដែលបច្ចុប្បន្នជាប្រធានស្តីទីគណបក្សរួចជាស្រេច ។ ទន្ទឹមនឹងនេះ មជ្ឈដ្ឋាននានាបានចោទជាសំណួរថា នៅពេលសម្តេចអគ្គមហាសេនាបតីតេជោ ហ៊ុន សែន ឡើងកាន់តំណែងជាប្រធានគណបក្សប្រជាជនកម្ពុជា តើលក្ខន្តិកៈគណបក្សកាន់អំណាចនេះត្រូវចងមិនឲ្យប្រធានបក្សធ្វើជានាយករដ្ឋមន្ត្រីតាមគន្លងចាស់បន្តទៀតឬយ៉ាងណា ?
ទោះយ៉ាងណាក៏ដោយ ក្រុមអ្នកវិភាគនយោបាយនៅកម្ពុជា បានលើកឡើងថា ប្រាកដណាស់ នៅពេលសម្តេចអគ្គមហាសេនាបតីតេជោ ហ៊ុន សែន ហៅបុរសខ្លាំង ឡើងជាប្រធានគណបក្សប្រជាជនកម្ពុជា គឺលក្ខន្តិកៈគណបក្សមួយនេះដែលចងមិនឲ្យប្រធានបក្សធ្វើជានាយករដ្ឋមន្ត្រីនោះ នឹងត្រូវកែសម្រួលទាំងស្រុង ដើម្បីបើកផ្លូវឲ្យបុរសខ្លាំងបានបន្តធ្វើជានាយករដ្ឋមន្ត្រី ប្រសិនបើបុរសខ្លាំង "នៅចង់" និងគណបក្សប្រជាជនកម្ពុជាបានឈ្នះឆ្នោត ។
ដូច្នេះ គណបក្សប្រជាជនកម្ពុជានឹងកែប្រែប្រវត្តិសាស្ត្ររបស់ខ្លួន ពីប្រធានបក្សមិនអាចធ្វើនាយករដ្ឋមន្ត្រី ក្លាយជាប្រធានបក្សត្រូវធ្វើជានាយករដ្ឋមន្ត្រីវិញ តាមអំណាចរបស់បុរសខ្លាំង ហើយគណបក្សកាន់អំណាចមួយនេះក៏នឹងលែងឲ្យពិភពលោក "ពេបជ្រាយ" ពាក់ព័ន្ធនឹងចំណងលក្ខន្តិកៈបក្សប្លែកពីគេឯងនេះទៀតដែរ ៕
No comments:
Post a Comment