ដោយ ដែន អយុធ្យា
2015-06-18
មេដឹកនាំគណបក្សប្រឆាំង ត្រៀមលើកយកករណីសមាជិកក្រុមប្រឹក្សាខ្លះនៃខេត្តព្រះសីហនុ ដែលជាប់ពាក់ព័ន្ធសកម្មភាពពុះច្រៀកដីអនុក្រឹត្យលេខ៧៦ ឋិតក្នុងតំបន់របស់រដ្ឋហាមឃាត់មិនឲ្យលក់ដូរនៅតំបន់ក្បាលឆាយ ទៅពិភាក្សាជាមួយលោកនាយករដ្ឋមន្ត្រី ហ៊ុន សែន ដោយស្នើជួយមានវិធានការទប់ស្កាត់ឲ្យបានទាន់ពេល។
មន្ត្រីសង្គមស៊ីវិលខេត្តព្រះសីហនុ ចោទថា បច្ចុប្បន្នដីអនុក្រឹត្យលេខ៧៦ នៅតំបន់ក្បាលឆាយ ត្រូវសាច់ញាតិ ឬក្រុមគ្រួសារ លោក សូ ជុងហ៊ួរ សមាជិកក្រុមប្រឹក្សាខេត្តព្រះសីហនុ មកពីគណបក្សប្រជាជនកម្ពុជា បានពុះច្រៀកជាឡូលក់ដូរបន្តយ៉ាងអនាធិបតេយ្យ និងគ្មានអាជ្ញាធរស្ថាប័នពាក់ព័ន្ធណាមួយចេញមុខទប់ស្កាត់ទេ។
បន្ទាប់ពីបានទទួលពាក្យបណ្ដឹងផ្ទាល់មាត់ពីមន្ត្រីសង្គមស៊ីវិល ជាពិសេសប្រជាពលរដ្ឋខេត្តព្រះសីហនុ លោក សម រង្ស៊ី ប្រធានគណបក្សសង្គ្រោះជាតិ សន្យាថានឹងជួយដោះស្រាយបញ្ហាដីធ្លីនៅតំបន់ក្បាលឆាយនោះ។ ក្រុមប្រជាពលរដ្ឋបានប្ដឹងទៅលោកថា លោក សូ ជុងហ៊ួរ សមាជិកក្រុមប្រឹក្សាខេត្តព្រះសីហនុ និងសាច់ញាតិ ប្រពន្ធកូនរបស់គាត់ ស្ថិតនៅពីក្រោយបទល្មើសកាប់ទន្ទ្រានព្រៃឈើ និងពុះច្រៀកដីអនុក្រឹត្យលេខ៧៦ មានទីតាំងនៅក្រុមទី១៨ ភូមិ១ សង្កាត់១ ក្រុងព្រះសីហនុ ខេត្តព្រះសីហនុ ដើម្បីលក់ដូរអនាធិបតេយ្យ៖ «នេះជាអំពើមិនប្រក្រតី ហើយខ្ញុំនឹងតាមដានជាមួយតំណាងរាស្ត្រមកពីគណបក្សសង្គ្រោះជាតិ តាមរយៈគណៈកម្មការពាក់ព័ន្ធទាំងប៉ុន្មាននៃរដ្ឋសភា ដើម្បីឈានដល់ស៊ើបអង្កេត និងតាមដានរឿងកាប់ព្រៃ និងពុះច្រៀកដីអនុក្រឹត្យលេខ៧៦ ជាប្រភពទឹកស្អាតរដ្ឋហាមឃាត់ ឈានដល់លុបបំបាត់អំពើពុករលួយ និងដើម្បីផ្តល់យុត្តិធម៌ជូនជនរងគ្រោះ»។
ត្រង់ចំណុចនេះ មន្ត្រីសង្គមស៊ីវិលមួយចំនួននាខេត្តព្រះសីហនុ បានរិះគន់អាជ្ញាធរពាក់ព័ន្ធខេត្តនេះ មានរដ្ឋបាលព្រៃឈើ ជាដើម ពិសេស លោក ឈិត សុខុន អភិបាលខេត្តព្រះសីហនុ ដែលទុកបណ្តោយឲ្យមានបទល្មើសទន្ទ្រានកាប់ព្រៃពុះច្រៀកដីជាឡូលក់ដូរអនាធិបតេយ្យ លើដីអនុក្រឹត្យលេខ៧៦ ដោយគ្មានការហាមឃាត់គិតមកដល់ថ្ងៃទី១៧ ខែមិថុនា។
មន្ត្រីសង្គមស៊ីវិលខេត្តព្រះសីហនុ បានអះអាងថា លោក សូ ជុងហ៊ួរ សមាជិកក្រុមប្រឹក្សាខេត្តព្រះសីហនុ និងភរិយាឈ្មោះ លោកស្រី កោ សុផានី និងគូកនជាបុគ្គលស្ថិតក្នុងចំណោមមនុស្សផ្សេងទៀត កំពុងបម្រើការងារនៅតាមស្ថាប័នខ្លះនាខេត្តព្រះសីហនុ ជាអ្នកនៅពីក្រោយនៃសកម្មភាពទន្ទ្រានដីរដ្ឋនេះ។
មន្ត្រីសម្របសម្រួលនៃអង្គការលីកាដូ (Licadho) ប្រចាំខេត្តព្រះសីហនុ លោក ប៊ួន ណារិទ្ធ ដែលបានចុះអង្កេតផ្ទាល់ដល់ទីតាំងកើតហេតុ កាលពីថ្ងៃពុធ ទី១៧ ខែមិថុនា ថ្លែងថា សកម្មភាពនេះជារូបភាពធ្ងន់ធ្ងរ។ លោកបន្តថា អ្នកនៅពីក្រោយបទល្មើសពុះច្រៀកដីអនុក្រឹត្យនេះ ហាក់មិនញញើតចំពោះអាជ្ញាធរពាក់ព័ន្ធខេត្តនេះមកទប់ស្កាត់ទេ ហើយអាចទំនងជាមានមន្ត្រីស្ថាប័នខ្លះនាខេត្តព្រះសីហនុ មានស្ថាប័នរដ្ឋបាលព្រៃឈើ ឬមន្ត្រីថែរក្សាដីតំបន់ក្បាលឆាយ ជាអ្នករួមគំនិតលក់ដូរដីអនុក្រឹត្យនេះ។
លោក ប៊ួន ណារិទ្ធ បានរិះគន់អាជ្ញាធរពាក់ព័ន្ធខេត្តព្រះសីហនុ ថាមិនគួរអនុវត្តច្បាប់តែទៅលើប្រជាពលរដ្ឋក្រីក្រដែលទៅទន្ទ្រានកាន់កាប់ដី ឬកាប់ព្រៃរដ្ឋហាមឃាត់ដើម្បីធ្វើជម្រក ព្រោះខ្វះដីសង់ផ្ទះពិតប្រាកដនោះទេ។ ប៉ុន្តែបទល្មើសជាក់ស្តែងដែលជាសាច់ញាតិរបស់ លោក សូ ជុងហ៊ួរ សមាជិកក្រុមប្រឹក្សាខេត្តព្រះសីហនុ បែរជាមន្ត្រីនៅតាមស្ថាប័នពាក់ព័ន្ធខេត្តនេះមិនចាត់វិធានការតាមផ្លូវច្បាប់ ឬចាប់ទៅផ្ដន្ទាទោសដាក់គុកច្រវាក់ដូចពលរដ្ឋសាមញ្ញឲ្យបានស្មើភាពផង ឬមួយជាបក្ខពួកខ្លួន៖ «ការទន្ទ្រានពុះច្រៀកដីជាឡូលក់នៅតំបន់អនុក្រឹត្យលេខ៧៦ ដែលរដ្ឋហាមឃាត់នេះ គឺមានជាប់ពាក់ព័ន្ធសមាជិកក្រុមប្រឹក្សាខេត្តព្រះសីហនុ និងភរិយារបស់គាត់ ដែលគាត់អះអាងថា គាត់មានដីនៅតំបន់នេះ និងមានប្លង់កម្មសិទ្ធិ ហើយគាត់បានវាស់វែង និងពុះច្រៀកជាឡូលក់បន្ត»។
ចំណែក លោក សុខ សុខុម ប្រធានអង្គការស្រាវជ្រាវជាតិកម្ពុជា ឬហៅកាត់ថា ស៊ីអ៊ិនរ៉ូ (CNRO) សាខាខេត្តព្រះសីហនុ ដែលបានចុះអង្កេតផ្ទាល់ដល់ទីតាំងតំបន់ក្បាលឆាយនោះដែរ ចាត់ទុកសកម្មភាពទន្ទ្រានកាប់ព្រៃ និងពុះច្រៀកដីអនុក្រឹត្យរាប់សិបឡូ ហើយមានហ៊ុមព័ទ្ធរបងបន្លាលួសផងនោះ ថាមានរូបភាពធ្ងន់ធ្ងរ និងមានទំហំផ្ទៃដីច្រើនជាង ១០ហិកតារ។ លោក សុខ សុខុម មើលឃើញថា ភាគច្រើនដីឡូដែលក្រុមគ្រួសារ លោក សូ ជុងហ៊ួរ សមាជិកក្រុមប្រឹក្សាខេត្តព្រះសីហនុ និងភរិយាឈ្មោះ លោកស្រី កោ សុផានី បានពុះច្រៀកដីអនុក្រឹត្យលេខ៧៦ លក់ដូរនៅតំបន់ក្បាលឆាយនេះ គឺមានសង់ផ្ទះតូចៗប្រក់ស័ង្កសីនៅលើដីឡូមួយចំនួន និងមានហ៊ុមព័ទ្ធរបងបន្លាលួស និងមានដាំដំណាំកសិកម្មនៅលើដីនោះថែមទៀត។
លោកបន្តថា ផ្ទះខ្លះឃើញមានមនុស្សរស់នៅ និងផ្ទះខ្លះទៀតមិនមានមនុស្សរស់នៅទេ គឺត្រូវគេសង់ព័ទ្ធរបងបន្លាលួសទុកចោល ហើយអ្នករស់នៅក្នុងផ្ទះស័ង្កសីទាំងនោះ គឺភាគច្រើនមិនមែនជាម្ចាស់ដីទេ ប៉ុន្តែជាអ្នកយាមចាំដីឲ្យគេ។ លោកថា ម្ចាស់ដីពិតប្រាកដ គឺមានអ្នកខ្លះមានលំនៅឋានរស់នៅទីក្រុងភ្នំពេញ ឬនៅខេត្តព្រះសីហនុ និងនៅខេត្តផ្សេងៗទៀត ដែលបានមកទិញដីនៅតំបន់ក្បាលឆាយនេះ។
លោក សុខ សុខុម បន្តថា បទល្មើសទន្ទ្រានដីអនុក្រឹត្យលេខ៧៦ ដែលរដ្ឋបានហាមឃាត់ មិនគួរស្ថាប័នរដ្ឋបាលព្រៃឈើ ពិសេស លោក ឈិត សុខុន អភិបាលខេត្តព្រះសីហនុ គ្មានវិធានការតាមផ្លូវច្បាប់នោះទេ៖ «ប្រជាពលរដ្ឋបានដីសង់ផ្ទះនៅតំបន់ក្បាលឆាយ ឬដីអនុក្រឹត្យលេខ៧៦ នៅក្រុមទី១៨ ភូមិ១ សង្កាត់១ នេះ គឺបានដោយសារលោកជំទាវ កោ សុផានី ភរិយារបស់ លោក សូ ជុងហ៊ួរ សមាជិកក្រុមប្រឹក្សាខេត្តព្រះសីហនុ ជាអ្នកកាត់ចែកឲ្យពលរដ្ឋមួយចំនួនសង់ផ្ទះនៅតំបន់នោះ។ បញ្ហានេះចំពោះផ្លូវច្បាប់ គឺមិនអាចឲ្យបុគ្គលមានឋានៈថ្នាក់ណាក៏ដោយ មិនអាចមកយកដីរបស់រដ្ឋធ្វើជាកម្មសិទ្ធិបានទេ។ ដូច្នេះស្នើដល់អាជ្ញាធរខេត្ត ចុះមកស្រាវជ្រាវជាបន្ទាន់ ឬហៅភាគីពាក់ព័ន្ធសកម្មភាពទន្ទ្រានកាន់កាប់ និងពុះច្រៀកដីអនុក្រឹត្យរដ្ឋហាមឃាត់លក់ដូរ មកដោះស្រាយតាមផ្លូវច្បាប់ ហើយប្រាប់ឲ្យដកខ្លួនចេញ កុំឲ្យពាក់ព័ន្ធដីរដ្ឋ»។
បញ្ហានេះ មន្ត្រីសង្គមស៊ីវិលបានរកឃើញថា ដើម្បីលុបលាង ឬលាក់បាំងបទល្មើសទន្ទ្រានដីរដ្ឋនេះ បច្ចុប្បន្នក៏មានចលនាបំផុសបែងចែកដីជូនប្រជាពលរដ្ឋក្រីក្រដើម្បីសង់ផ្ទះ មានទំហំ ២០ម៉ែត្រ គុណនឹង ៣០ម៉ែត្រ ជូនប្រជាពលរដ្ឋប្រមាណជា ៣០គ្រួសារ ឲ្យមកសង់ផ្ទះនៅតំបន់នេះថែមទៀត។
ត្រង់ចំណុចនេះ ប្រជាពលរដ្ឋមួយចំនួនដែលបានទទួលចំណែកដីនៅតំបន់អនុក្រឹត្យលេខ៧៦ នៅក្រុមទី១៨ ភូមិ១ សង្កាត់១ បានប្រាប់វិទ្យុអាស៊ីសេរី ដែលចុះទៅតំបន់នោះថា ដីនេះត្រូវប្រពន្ធកូន លោក សូ ជុងហ៊ួរ សមាជិកក្រុមប្រឹក្សាខេត្តព្រះសីហនុ ក្នុងតំណែងសព្វថ្ងៃនេះជាអ្នកចែកឲ្យ និងកាប់ដើមឈើនៅទីតាំងនោះធ្វើផ្ទះ និងធ្វើរបងហ៊ុមព័ទ្ធដី ព្រោះពួកគាត់គ្មានដីសង់ផ្ទះ ឬដីកសិកម្ម។
ទោះយ៉ាងណា លោក ឈិត សុខុន អភិបាលខេត្តព្រះសីហនុ បានប្រាប់វិទ្យុអាស៊ីសេរី នៅថ្ងៃពុធ ទី១៧ ខែមិថុនា ថា សកម្មភាពទន្ទ្រានកាប់ព្រៃឈើ និងពុះច្រៀកដីអនុក្រឹត្យលេខ៧៦ លក់ដូរជាឡូៗនេះ គឺជាទង្វើខុសច្បាប់។ លោកថា ករណីនេះលោកបានកោះហៅអ្នកជាប់ពាក់ព័ន្ធសកម្មភាពល្មើសនេះមកសាកសួរម្តងរួចហើយ។ ប៉ុន្តែលោកក៏មានចម្ងល់ថា ហេតុអ្វីសកម្មភាពនេះនៅតែបន្តកើតមានទៀត។
លោក ឈិត សុខុន ថ្លែងថា នឹងចាត់មន្ត្រីរដ្ឋបាលព្រៃឈើឲ្យចុះទប់ស្កាត់បទល្មើសកាប់ព្រៃនៅតំបន់នោះ។ តែទោះយ៉ាងនេះក្តី លោកអភិបាលខេត្តមិនបានបញ្ជាក់ពីវិធានការតាមផ្លូវច្បាប់ ទៅលើអ្នកនៅពីក្រោយសកម្មភាពបទល្មើសយ៉ាងណានៅឡើយទេ ប៉ុន្តែលោកប្រកាសមិនទទួលខុសត្រូវ ឬមិនទទួលស្គាល់រាល់ការខាតបង់ចំពោះអ្នកទៅទិញដីនៅតំបន់នោះទេ៖ «បញ្ហានេះខ្ញុំបានហៅគាត់ឲ្យមកជួបហើយ ឲ្យឈប់ធ្វើសកម្មភាពនេះម្តងរួចមកហើយ ហេតុអ្វីក៏នៅបន្តធ្វើសកម្មភាពកាប់រុករានជាបន្តទៀត។ ចាំខ្ញុំឲ្យរដ្ឋបាលព្រៃឈើទៅពិនិត្យដល់ទីតាំងកើតមានបញ្ហា»។
ទាក់ទិនបញ្ហានេះ លោក ឌី សុខុម ប្រធានរដ្ឋបាលព្រៃឈើ ខេត្តព្រះសីហនុ និយាយថា លោកបានដឹងឮលើសកម្មភាពពុះច្រៀកដីអនុក្រឹត្យលេខ៧៦ ដែលរដ្ឋបានហាមឃាត់នេះដែរ ប៉ុន្តែមន្ត្រីរូបនេះបានដាក់ការទទួលខុសត្រូវទៅឲ្យក្រុមចម្រុះ ដែលទទួលមើលការខុសត្រូវដីអនុក្រឹត្យរដ្ឋហាមឃាត់រក្សាប្រភពទឹកស្អាតនៅតំបន់ក្បាលឆាយនេះទៅវិញ៖ «រឿងហ្នឹងស្ថិតនៅក្រោមការគ្រប់គ្រងរបស់ក្រុមការងារចម្រុះរបស់សាលាខេត្តព្រះសីហនុ កំពុងពិចារណាថា ត្រូវអនុវត្ត ឬក៏ធ្វើអ្វីបន្តទៀតលើករណីកាប់ព្រៃ និងពុះច្រៀកដីជាឡូលក់ដូរលើដីអនុក្រឹត្យរដ្ឋបានហាមឃាត់នេះ។ ព្រោះបញ្ហានេះ គឺជាករណីពិសេសចាំបាច់មួយ ដែលត្រូវយើងមានការប្រយ័ត្នប្រយែង មុននឹងត្រូវមានវិធានការអ្វីមួយទៅលើបញ្ហានេះ។ ករណីនេះ អាជ្ញាធររដ្ឋបាលព្រៃឈើបានដឹងឮរឿងនេះដែរ ប៉ុន្តែបញ្ហានេះមានក្រុមចម្រុះ និងអ្នកច្បាប់ បានប្រចាំការនៅតំបន់ក្បាលឆាយ ដើម្បីថែរក្សាព្រៃ និងដីអនុក្រឹត្យរដ្ឋហាមឃាត់នេះ»។
យ៉ាងណាក៏ដោយ លោក សូ ជុងហ៊ួរ សមាជិកក្រុមប្រឹក្សាខេត្តព្រះសីហនុ ដែលរងការចោទជាប់ពាក់ព័ន្ធ ឬនៅពីក្រោយសកម្មភាពពុះច្រៀកដីអនុក្រឹត្យលេខ៧៦ ជាឡូៗដើម្បីលក់ដូរបន្តជាង ១០ហិកតារនោះ បានបដិសេធថា ក្រុមគ្រួសារលោក ឬក៏រូបលោកមិនមែនជាអ្នកនៅពីក្រោយសកម្មភាពនោះទេ៖ «ខ្ញុំមិនបានអនុញ្ញាតឲ្យមានសកម្មភាពកាប់ដើមឈើនៅលើដីអនុក្រឹត្យរដ្ឋហាមឃាត់នៅតំបន់ក្បាលឆាយហ្នឹងទេ»។
ទោះជាបែបនេះក្តី មន្ត្រីសង្គមស៊ីវិល ពិសេសប្រជាពលរដ្ឋមានផ្ទះស្ថិតក្នុងសង្កាត់លេខ១ ជាពិសេសពលរដ្ឋដែលបានទិញដីឡូនៅមូលដ្ឋាននេះ បានអះអាងថា លោក សូ ជុងហ៊ួរ និងភរិយាឈ្មោះ កោ សុផានី ជាអ្នកពុះច្រៀកលក់ដីឡូមានទីតាំងនៅក្រុមទី១៨ ភូមិ១ សង្កាត់លេខ១ ខេត្តព្រះសីហនុ ពិតមែន។ ពលរដ្ឋថ្លែងថា ករណីទិញលក់នេះ សូម្បីសមាជិកក្រុមប្រឹក្សាខេត្តព្រះសីហនុ មកពីគណបក្សប្រឆាំងក៏បានដឹងឮរឿងនេះដែរ ហើយថា នៅព្រឹកថ្ងៃពុធ ទី១៧ ខែមិថុនា ក៏ឃើញមានវត្តមាន លោក លី ឌី សមាជិកក្រុមប្រឹក្សាខេត្តព្រះសីហនុ មកពីគណបក្សសង្គ្រោះជាតិ បានបង្ហាញវត្តមាននៅទីតាំងមានសកម្មភាពពុះច្រៀកដីអនុក្រឹត្យជាឡូលក់ដូរអនាធិបតេយ្យនេះដែរ ប៉ុន្តែមិនដឹងថា វត្តមានរបស់មន្ត្រីក្រុមប្រឹក្សាបក្សប្រឆាំងចុះទៅតំបន់នោះទាក់ទងរឿងអ្វីនោះទេ។
បញ្ហានេះ មន្ត្រីសិទ្ធិមនុស្សបានរកឃើញថា ក្រៅពីមានសមាជិកក្រុមប្រឹក្សាខ្លះនៃខេត្តព្រះសីហនុ ជាអ្នកនៅពីក្រោយសកម្មភាពពុះច្រៀកដីអនុក្រឹត្យលេខ៧៦ នៅតំបន់ក្បាលឆាយ ដែលរដ្ឋាភិបាលរក្សាទុកជាតំបន់ប្រភពទឹកស្អាតនោះ ក៏នៅមានមន្ត្រីកំពុងបម្រើការងារនៅតាមស្ថាប័នច្រើនទៀតនាខេត្តជាប់មាត់សមុទ្រមួយនេះ ក៏មានជាប់ពាក់ព័ន្ធនឹងការទន្ទ្រានកាន់កាប់ដីអនុក្រឹត្យលេខ៧៦ ទុកធ្វើកម្មសិទ្ធិផ្ទាល់ខ្លួនដែរ។
ត្រង់ចំណុចនេះ លោក សម រង្ស៊ី មេដឹកនាំគណបក្សប្រឆាំងបានព្រមានថា អ្នកនៅពីក្រោយសកម្មភាពពុះច្រៀកដីអនុក្រឹត្យលេខ៧៦ ដែលរដ្ឋបានហាមឃាត់ទុកធ្វើជាប្រភពទឹកស្អាតនាតំបន់ក្បាលឆាយ ត្រូវតែនាំមកទទួលខុសត្រូវចំពោះមុខច្បាប់ ព្រោះព្រហើនហ៊ានល្មើសនឹងអនុក្រឹត្យរបស់លោកនាយករដ្ឋមន្ត្រី ហ៊ុន សែន ដែលបានដាក់ចេញ ឬក៏ដាក់ឲ្យមន្ត្រីក្រោមឱវាទខេត្តព្រះសីហនុ អនុវត្តឲ្យមានប្រសិទ្ធភាពនោះ៕
1 comment:
The irresponsibility of the provincial authority of all branchs, plus the corruption of all kind rule this country . The rich use money to buy power and influence, they don't really care about this nation law. Anarchic behavior of the outlaw culprit can exist, because they have strong big man backup them behind the scene .
Post a Comment