អត្ថបទ 14-06-2015 4:11 pm | ដោយ Vayofm Teams
លោកសម រង្ស៊ី ប្រធានគណបក្សសង្គ្រោះជាតិ បានថ្លែងគាំទ្ររាជរដ្ឋាភិបាលកម្ពុជា ដែលហ៊ានប្រតិកម្មតវ៉ាជាមួយវៀតណាមដែលបានជីកស្រះរំលោភចូលទឹកដីខ្មែរ នៅស្រុកអូយ៉ាដាវ ខេត្តរតនគិរី។ ការថ្លែងរបស់លោកសម រង្ស៊ី បានធ្វើឡើងក្នុងពិធីជួបសំណេះសំណាលជាមួយ សកម្មជនគណបក្សសង្គ្រោះជាតិ នៅខេត្តព្រះសីហនុ នាថ្ងៃទី១៤ ខែមិថុនា ឆ្នាំ២០១៥។
ប្រធានគណបក្សសង្គ្រោះជាតិរូបនោះបានថ្លែងបញ្ជាក់ថា ក្នុងនាមជាគណបក្សបក្សប្រឆាំង គឺប្រឆាំងរដ្ឋាភិបាល ប៉ុន្តែបើរដ្ឋាភិបាលធ្វើអ្វីដែលល្អគឺត្រូវទទួលស្គាល់។ លោកបានសង្កត់ធ្ងន់ថា មិនដែលឃើញក្រសួងការបរទេសកម្ពុជា ដែលតំណាងឲ្យរដ្ឋាភិបាលចេញមុខតវ៉ាជាមួយវៀតណាម ហ៊ានចង្អុលមុខវៀតណាមដែលបាន មកជីកស្រះក្នុងទឹកដីខ្មែរនៅខេត្តរតនគិរី។
សំឡេងលោកសម រង្ស៊ី៖
យោងតាមរបាយការណ៍របស់ក្រសួងមហាផ្ទៃកម្ពុជា និងគណៈកម្មការចម្រុះកិច្ចការព្រំដែនកម្ពុជា អាជ្ញាធរកម្ពុជានៅខេត្តរតនគិរី បានរកឃើញស្រះទឹកចំនួន ៥ (ទំហំនីមួយៗ ៥ម. x ១៣ម.) ដែលជីកដោយអាជ្ញាធរវៀតណាម នៅចន្លោះបង្គោលព្រំដែនលេខ ៣០ និងលេខ ៤០ ដែលស្ថិតនៅក្នុងភូមិឡំ ឃុំប៉ក់ញ៉ៃ ស្រុកអូយ៉ាដាវ ខេត្តរតនគិរី នៅក្នុងកំណាត់ ព្រំដែនដែលមិនទាន់បានធ្វើការកំណត់ខណ្ឌសីមា។
ដោយហេតុថា តំបន់នេះពុំទាន់បានកំណត់ខណ្ឌសីមានៅឡើយ រាជរដ្ឋាភិបាលកម្ពុជា ស្នើរដ្ឋាភិបាលសាធារណរដ្ឋសង្គមនិយមវៀតណាមគោរពតាមខ្សែព្រំដែន នៃផែនទីបោន ខ្នាត ១/១០០.០០០ និងចំណុចទី ៨ នៃសេចក្តី ប្រកាសព័ត៌មានរួម ចុះថ្ងៃទី ១៧ ខែមករា ឆ្នាំ ១៩៩៥ រវាងព្រះរាជាណាចក្រកម្ពុជា និងសាធារណរដ្ឋសង្គមនិយមវៀតណាម ដែលបានចែងថា “ភាគីទាំងពីរឯកភាពរក្សាស្ថានភាពបច្ចុប្បន្នដដែល មិនឱ្យមានការផ្លាស់ប្តូរ ឬដកទីតាំងកំណត់សំគាល់ព្រំដែន និងអប់រំទប់ស្កាត់ពលរដ្ឋទាំងសងខាង មិនត្រូវធ្វើការដាំដុះ ឬតាំងទីលំនៅឆ្លងដែន និងសហការរក្សាសណ្តាប់ធ្នាប់ និងសន្តិសុខព្រំដែន រហូតដល់មានដំណោះស្រាយបញ្ហាព្រំដែននេះ ”។
ក្នុងជំនួបរវាងលោកនាយករដ្ឋមន្ត្រីហ៊ុន លោក សែន ជាមួយលោកឡេ ហុងអាញ់ សមាជិកការិយាល័យនយោបាយបក្សកុម្មុយនីសវៀតណាម កាលពីថ្ងៃទី ០៩ ខែមិថុនា ឆ្នាំ ២០១៥ នៅទីក្រុងភ្នំពេញក៏បានលើកឡើងពីបញ្ហាព្រំដែន និងបានស្នើថា “តំបន់ណាដែលពុំទាន់បានធ្វើការខណ្ឌសីមា មិនត្រូវធ្វើឱ្យមានការប្រែប្រួលទេ រហូតដល់បញ្ចប់ការខណ្ឌសីមាព្រំដែន ”៕
(ដោយ៖ ចេន សុជាតា)
No comments:
Post a Comment