ដោយ រដ្ឋា វិសាល
2015-06-18
ប្រជាពលរដ្ឋរស់នៅភូមិឡំ ឃុំប៉ក់ញ៉ៃ ស្រុកអូរយ៉ាដាវ ខេត្តរតនគិរី សាទរការប្ដូរតួនាទីនាយនគរបាលប៉ុស្តិ៍ការពារព្រំដែន ដែលធ្វេសប្រហែសបណ្ដែតបណ្តោយឲ្យពលរដ្ឋវៀតណាម ជីកស្រះក្នុងតំបន់ខ្សែបន្ទាត់ព្រំដែនហាមឃាត់នៃប្រទេសទាំងពីរ។
អ្នកភូមិឲ្យដឹងថា រហូតមកទល់នឹងពេលនេះ អ្នកភូមិមិនទាន់ឃើញមានសកម្មភាពប្រែប្រួលអ្វី ទាក់ទិនការទាមទារឲ្យលុបស្រះនោះវិញនៅឡើយ។
តំណាងសហគមន៍ជនជាតិចារ៉ាយ ភូមិឡំ នៅថ្ងៃទី១៨ ខែមិថុនា ស្នើសុំឲ្យអាជ្ញាធរខេត្តរតនគិរី ចាត់តាំងមន្ត្រីនគរបាលមានឧត្តមគតិស្រឡាញ់ទឹកដី ស្រឡាញ់ប្រជាពលរដ្ឋ មកជំនួសតំណែងនាយនគរបាលប៉ុស្តិ៍ការពារព្រំដែនភូមិឡំ ដើម្បីការពារអធិបតេយ្យភាពព្រំដែនខ្មែរ កុំឲ្យភាគីវៀតណាម រំលោភបានតទៅទៀត។
កាលពីដើមសប្ដាហ៍សហគមន៍ភូមិឡំ ជិត ៣០០នាក់ បានផ្ដិតមេដៃបញ្ជូនមកសមាគមអាដហុក (Adhoc) ខេត្តរតនគិរី ឲ្យជួយអន្តរាគមន៍ទៅក្រសួងមហាផ្ទៃ ដកតំណែងនាយនគរបាលប៉ុស្តិ៍ការពារព្រំដែនភូមិឡំ គឺលោក រចំ ជីប បន្ទាប់ពីអ្នកភូមិរកឃើញស្រះចំនួន៧ ត្រូវបានពលរដ្ឋវៀតណាម ចូលមកជីកនៅក្នុងតំបន់សហាមឃាត់ នៅចំណុចអូរហ្គ្រឹម ស្ថិតនៅក្បែរប៉ុស្តិ៍តម្រួតការពារព្រំដែនភូមិឡំ ឃុំប៉ក់ញ៉ៃ ស្រុកអូរយ៉ាដាវ ខេត្តរតនគិរី ជាប់នឹងភូមិសេសៅ ឃុំយ៉ាណាង ស្រុកដាក់កឺ ខេត្តយ៉ាឡាយ។
តំណាងសហគមន៍ លោក រម៉ាស់ ស្វាញ កត់សម្គាល់ថា កន្លងទៅនេះ លោក រចំ ជីប មិនបានបំពេញតួនាទីត្រឹមត្រូវជាឆ្មាំការពារទឹកដី និងប្រជាពលរដ្ឋនៅតំបន់ព្រំដែននោះទេ។ ផ្ទុយទៅវិញ លោកបានជួយជ្រោមជ្រែងទៅលើប្រជាពលរដ្ឋវៀតណាម និងតម្រួតព្រំដែនវៀតណាម ឆ្លងដែនមកប្រព្រឹត្តអំពើខុសច្បាប់ក្នុងដីខ្មែរ រួមទាំងការជីកស្រះក្នុងដីខ្មែរថែមទៀតផង។ លោកថា បណ្ដឹងអ្នកភូមិនឹងដាក់ជូនក្រសួងមហាផ្ទៃ ស៊ើបអង្កេតពីកំហុសទាំងអស់នោះ ដើម្បីដាក់ពិន័យមន្ត្រីនគរបាលរូបនេះ៖ «មេប៉ុស្តិ៍ព្រំដែនអត់ស្រឡាញ់ប្រជាពលរដ្ឋ អត់ស្រឡាញ់ខ្មែរ យើងគាំទ្រវៀតណាម។ ជីកស្រះ យើងទៅសួរគេថាអត់ឃើញដឹងៗ។ ពីរទៀតវេទិកាប្រជុំ គេបើកឲ្យយួន មកថតនៅកន្លែងប្រជុំទៀត»។
ដូចគ្នានេះដែរ ប្រធានភូមិឡំ លោក សេវ លីន មានប្រសាសន៍បញ្ជាក់ថា លោកទទួលបានព័ត៌មានពីពលរដ្ឋវៀតណាម ថានាយតម្រួតប៉ុស្តិ៍ការពារព្រំដែនវៀតណាម នៅតំបន់នោះ ត្រូវបានផ្លាស់ចេញកាលពីចុងសប្ដាហ៍។ លោកបន្តថា អ្នកភូមិចង់ឲ្យមានការផ្លាស់ប្ដូរមន្ត្រីទទួលខុសត្រូវប៉ុស្តិ៍ព្រំដែន ពីព្រោះកន្លងទៅ បទល្មើសឆ្លងដែននៅតំបន់នោះកើតមានច្រើនករណី៖ «ខ្ញុំសួរប្អូនខ្ញុំនៅម៉ុកដែង ថាស្រះគេលុប ឬនៅ? វាថាអត់ដឹងទេបង ហើយមេប៉ុស្តិ៍ប៉ូលិសគេដកហើយ គេផ្ដោតលើមេប៉ុស្តិ៍វៀតណាម។ ខាងខ្មែរយើងគេថាចង់ប្ដូរ»។
វិទ្យុអាស៊ីសេរី មិនអាចសុំការអធិប្បាយពី លោក រចំ ជីប ពីបញ្ហានេះបានទេនៅថ្ងៃទី១៨ ខែឧសភា ពីព្រោះទូរស័ព្ទលោកមិនមានអ្នកទទួលការហៅចូល។ ដោយឡែកស្នងការនគរបាលខេត្តរតនគិរី លោក នួន គឿន ក៏បដិសេធមិនឆ្លើយសំណួរវិទ្យុអាស៊ីសេរី ដោយអះអាងថា លោកជាប់រវល់។
ទោះជាយ៉ាងនេះក្តី អ្នកនាំពាក្យសាលាខេត្តរតនគិរី លោក ញ៉ែម សំអឿន អះអាងថា លោក រចំ ជីប ត្រូវបានដកមកឈរជើងនៅស្នងការដ្ឋានប៉ូលិសខេត្ត ក៏ប៉ុន្តែចំណាត់ការបែបណាទៅលើមន្ត្រីព្រំដែននេះ លោកមិនទាន់ដឹងនៅឡើយ។ លោកបន្តថា តម្រួតព្រំដែនវៀតណាម អះអាងថា ពលរដ្ឋខ្មែរក៏បានធ្វើស្រែចម្ការចូលតំបន់សដូចគ្នា ខណៈសមត្ថកិច្ចប៉ូលិសខេត្តរតនគិរី បានជួបប្រជុំជាមួយប៉ូលិសខេត្តយ៉ាឡាយ ប្រទេសវៀតណាម ពីរឿងវៀតណាម ជីកស្រះនេះ៖ «ដោយសារមានបញ្ហាខុសឆ្គងខ្លះអ៊ីចឹងណាក្នុងហ្នឹង យើងបានសំណូមពរឲ្យលុបស្រះនោះឡើងវិញ ហើយខាងវៀតណាម គេលើកឡើងបញ្ហាថា ប្រជាពលរដ្ឋខ្មែរយើងបានធ្វើចម្ការ បានសង់ស្អីលើទឹកដីនោះអ៊ីចឹងដែរ»។
ក្រសួងការបរទេសកម្ពុជា បានផ្ញើកំណត់ទូតជូនរដ្ឋាភិបាលវៀតណាម ពីរលើកកាលពីថ្ងៃទី១២ និងថ្ងៃទី១៤ ខែមិថុនា។ នៅក្នុងកំណត់ទូតទាំងពីរនោះ កម្ពុជា អះអាងថា បានរកឃើញស្រះទឹក៣ ស្ថិតក្នុងទីកំបាំងព្រៃ រួមទាំងស្រះទឹកចំនួន៥ ដែលបានរកឃើញលើកមុននោះ។ ផ្អែកលើផែនទីដែលមានខ្នាត ១/១០០.០០០ ស្រះទឹក៣ គឺជីកចូលដីកម្ពុជា យ៉ាងជ្រៅ ដោយស្រះទឹកទី១ មានចម្ងាយប្រមាណ ៣១៥ម៉ែត្រពីខ្សែបន្ទាត់ព្រំដែន។ ស្រះទឹកទី២ ជីកចូលចម្ងាយ ៤២៥ម៉ែត្រ និងស្រះទឹកទី៣ ចម្ងាយ ៣៩០ម៉ែត្រពីខ្សែបន្ទាត់ព្រំដែន ចន្លោះបង្គោលព្រំដែនលេខ៣០ និងបង្គោលព្រំដែនលេខ៤០ ជាតំបន់មិនទាន់វាស់វែង។
កាលពីថ្ងៃទី៩ ខែមិថុនា ក្នុងជំនួបជាមួយសមភាគីវៀតណាម លោកនាយករដ្ឋមន្ត្រី ហ៊ុន សែន ក៏បានលើកឡើងពីការទន្ទ្រានរបស់ភាគីវៀតណាម មកលើទឹកដីកម្ពុជា និងស្នើឲ្យវៀតណាម បន្តរក្សាភាពស្ងប់ស្ងាត់ក្នុងរឿងព្រំដែន៕
1 comment:
They let you know that who the Alpha is>?
Post a Comment