ដោយ សុជីវី
2015-06-03
លោក វ៉ា គឹមហុង ទេសរដ្ឋមន្ត្រី និងប្រធានគណៈកម្មាធិការព្រំដែនកម្ពុជា បង្ហាញផែនទីប្រទេសកម្ពុជា។
RFA/Uon Chhin
តំណាងរាស្ត្រគណបក្សសង្គ្រោះជាតិ ចំនួន ១៤រូប ស្នើមន្ត្រីជាន់ខ្ពស់រដ្ឋាភិបាលបង្ហាញផែនទីដែលកម្ពុជា កំពុងប្រើប្រាស់សព្វថ្ងៃ និងពន្យល់ពីនីតិវិធីក្នុងដំណើរការបោះបង្គោលព្រំដែន។ សំណើនេះ ត្រូវប្រធានរដ្ឋសភា លោក ហេង សំរិន ចុះហត្ថលេខាបញ្ជូនទៅមន្ត្រីរដ្ឋាភិបាលរូបនោះនៅថ្ងៃទី៣ ខែមិថុនា។
សំណើរបស់អ្នកតំណាងរាស្ត្រដែលចង់ឲ្យមន្ត្រីរដ្ឋាភិបាលផ្ដល់ផែនទី បានលើកហេតុផលថា កន្លងមកមានការអះអាងផ្សេងគ្នារវាងពលរដ្ឋដែលរស់នៅតាមព្រំដែន និងមន្ត្រីជំនាញកិច្ចការព្រំដែនរបស់កម្ពុជា។
តំណាងរាស្ត្រមួយរូបក្នុងចំណោមអ្នកតំណាងរាស្ត្រទាំង ១៥រូប លោក ម៉ៅ មុនីវណ្ណ មានប្រសាសន៍ថា លោកទេសរដ្ឋមន្ត្រី វ៉ា គឹមហុង ទទួលបន្ទុកកិច្ចការព្រំដែន តែងតែអះអាងថា ការបោះបង្គោលព្រំដែនរវាងកម្ពុជា និងវៀតណាម ធ្វើឡើងផ្អែកលើមូលដ្ឋានផែនទីដែលតម្កល់នៅអង្គការសហប្រជាជាតិ។ លោកបន្តថា ប្រសិនបើរដ្ឋាភិបាលមិនបង្ហាញផែនទីដែលតែងតែអះអាងថាជាមូលដ្ឋាននោះទេ មានន័យថា ការបោះបង្គោលព្រំដែននាពេលកន្លងទៅ អាចមានមូលដ្ឋានផ្សេងទៅវិញ៖ «ប្រសិនបើរដ្ឋាភិបាលមិនព្រមបង្ហាញប្រជាពលរដ្ឋខ្មែរយល់ថា រដ្ឋាភិបាលនិយាយភូតភរកុហកប្រជាពលរដ្ឋ ហើយថាបោះបង្គោលព្រំដែនឈរលើមូលដ្ឋាន ១/១០០.០០០ នោះ គឺគ្រាន់តែថា តាមពិតខ្លួនបោះតាមសន្ធិសញ្ញា ៨៣ ៨៥ និងសន្ធិសញ្ញាបន្ថែម២០០៥ ទៅវិញទេ»។
ផែនទីដែលមន្ត្រីតែងអះអាងថាជាមូលដ្ឋានបោះបង្គោលព្រំដែន ហើយមានតម្កល់នៅអង្គការសហប្រជាជាតិនោះ គឺផែនទីដែលមានខ្នាត ១/១០០.០០០ ឬមានន័យថា ១មិល្លីម៉ែត្រនៅលើផែនទី ស្មើ ១គីឡូម៉ែត្រលើផែនដី។
នៅក្នុងលិខិតរបស់អ្នកតំណាងរាស្ត្រ បានលើកមកបង្ហាញពីភាពចម្រូងចម្រាសគ្នារវាងការអះអាងរបស់ពលរដ្ឋ និងការបកស្រាយរបស់មន្ត្រីកិច្ចការព្រំដែន ទាក់ទងនឹងបញ្ហាព្រំដែននៅចំណុចជាំប្រាំល្វែង ភូមិជើង ឃុំជាំ ស្រុកមេមត់ ខេត្តត្បូងឃ្មុំ ជាទីដែលស្រូវអ្នកភូមិត្រូវអាជ្ញាធរវៀតណាម បាញ់ថ្នាំ និងរារាំងមិនឲ្យពួកគេបន្តការងារកសិកម្មនៅទីនោះទៀត។ អ្នកភូមិអះអាងថា ទីនោះជាដីខ្មែរ ប៉ុន្តែអាជ្ញាធរមានសមត្ថកិច្ចថាទីនោះឋិតក្នុងដីវៀតណាម។
លោកទេសរដ្ឋមន្ត្រី វ៉ា គឹមហុង ពុំបានអធិប្បាយតបនឹងសំណើនេះទេ ដោយបញ្ជាក់យ៉ាងខ្លីថា លោកនៅពុំទាន់ទទួលលិខិតរបស់អ្នកតំណាងរាស្ត្រនោះនៅឡើយ។ ទោះយ៉ាងនេះក្ដី លោកបានបញ្ជាក់ថា ផែនទីជាបញ្ហាបច្ចេកទេស ដែលពិបាកក្នុងការពន្យល់ ជាពិសេសពន្យល់ទៅក្រុមអ្នកដែលមិនចង់យល់។
នៅក្នុងឃ្លីបវីដេអូជាកិច្ចពិភាក្សាតុមូលដែលផ្សព្វផ្សាយដោយអង្គភាពព័ត៌មាន និងប្រតិកម្មរហ័សនៃទីស្ដីការគណៈរដ្ឋមន្ត្រី នៅថ្ងៃទី២ ខែមិថុនា លោក វ៉ា គឹមហុង បានលើកឡើងថា ពុំមានផែនទីណាផ្សេងដែលក្រុមជំនាញយកមកប្រើ ក្រៅពីផែនទីដែលតម្កល់ទុកនៅអង្គការសហប្រជាជាតិនោះឡើយ៖ «រដ្ឋាភិបាលតាំងពីឆ្នាំ១៩៧៩ រហូតដល់ឆ្នាំ២០០៥ លោកតែងតែយោងទៅលើផែនទីហ្នឹងខ្នាត ១/១០០.០០០ របស់ក្រុមភូមិសាស្ត្រឥណ្ឌូចិន ជាខ្សែព្រំដែនយោងសម្រាប់ដោះស្រាយបញ្ហាព្រំដែនជាមួយប្រទេសវៀតណាម ជាដរាប»។
ទោះយ៉ាងណា សម្រាប់អ្នកតំណាងរាស្ត្រគណបក្សសង្គ្រោះជាតិ ចាត់ទុកការអះអាងនោះ គឺពុំគ្រប់គ្រាន់ឡើយ។
លោក ម៉ៅ មុនីវណ្ណ បញ្ជាក់ថា ផ្ដល់ផែនទីគឺសំដៅដល់លេខកូដរបស់ផែនទី ដែលគេអាចទៅស្រាវជ្រាវបានពីប្រភពពិតប្រាកដបាន។ លោកថា បើរដ្ឋាភិបាលនៅតែគេចវេសមិនបង្ហាញផែនទីដែលរដ្ឋាភិបាលកំពុងប្រើប្រាស់សព្វថ្ងៃនេះទេ អ្នកតំណាងរាស្ត្រអាចនឹងធ្វើលិខិតស្ដីបន្ទោស៖ «ចឹងបានន័យថា គាត់មិនគោរពរដ្ឋធម្មនុញ្ញ ហើយក្រុមតំណាងរាស្ត្រត្រូវតែអនុវត្តតាមរដ្ឋធម្មនុញ្ញក្នុងការធ្វើញត្តិបន្ទោស»។
ទាក់ទិននឹងបញ្ហាព្រំដែននេះដែរ អ្នកតំណាងរាស្ត្រគណបក្សសង្គ្រោះជាតិ លោក អ៊ុំ សំអាន បានដាក់លិខិតទៅលោកនាយករដ្ឋមន្ត្រី ហ៊ុន សែន ដែរ ដោយស្នើឲ្យពិនិត្យមើលការរំកិលព្រំដែនចូលមកក្នុងទឹកដីកម្ពុជា ដោយប្រទេសវៀតណាម នៅច្រកព្រំដែនកម្ពុជា-វៀតណាម ក្នុងឃុំភ្នំដិន ស្រុកគិរីវង់ ខេត្តតាកែវ។ ក្នុងលិខិតបានភ្ជាប់របាយការណ៍មួយរបស់នាយឧត្តមសេនីយ៍ កែ គឹមយ៉ាន កាលពីឆ្នាំ១៩៩៩ ដែលរាយការណ៍ថា មានការរំលោភចូលមកក្នុងដីខ្មែរពីសំណាក់វៀតណាម នៅតាមខេត្តចំនួន៣ ជាប់ព្រំដែន មានខេត្តតាកែវ ខេត្តស្វាយរៀង និងខេត្តកំពង់ចាម។ ក្នុងនោះ បានរាយការណ៍តាមទម្លាប់របស់ពលរដ្ឋថា ព្រែកជីករបស់វៀតណាម ក្នុងឆ្នាំ១៩៧៩ បានចូលក្នុងទឹកដីខ្មែរចំនួន ១.២៧០ម៉ែត្រ ដោយគិតពីព្រែកវិញតេ ដែលជីកក្នុងជំនាន់អាណាព្យាបាលបារាំង។
យ៉ាងណា លោក វ៉ា គឹមហុង ធ្លាប់បានអះអាងដែរថា ព្រែកជីកក្នុងឆ្នាំ១៩៧៩ នោះ គឺពុំមែនជាបន្ទាត់ព្រំដែនឡើយ៕
No comments:
Post a Comment