ដោយ សេក បណ្ឌិត
2015-06-18
លោក អ៊ុំ សំអាន តំណាងរាស្ត្របក្សសង្គ្រោះជាតិ មណ្ឌលសៀមរាប ក្នុងវេទិកាអ្នកស្ដាប់វិទ្យុអាស៊ីសេរី កាលពីថ្ងៃទី២២ ខែឧសភា ឆ្នាំ២០១៥។
RFA
តំណាងរាស្ត្របក្សប្រឆាំង ប្រកាសលើកពេលធ្វើសន្និសីទកាសែតស្ដីពីបញ្ហាព្រំដែនរវាងកម្ពុជា និងវៀតណាម ដោយគ្មានកាលកំណត់។ ការប្រកាសលើកពេលនេះ ដោយសារលិខិតស្នើសុំរបស់អ្នកតំណាងរាស្ត្រមណ្ឌលកំពង់ចាម លោក ម៉ៅ មុនីវណ្ណ ត្រូវបានប្រធានរដ្ឋសភា លោក ហេង សំរិន បដិសេធ។
អ្នកតំណាងរាស្ត្រ និងមន្ត្រីសិទ្ធិមនុស្ស ប្រតិកម្មតបចំពោះការរឹតត្បិតរបស់ប្រធានរដ្ឋសភា ដែលមិនឲ្យយកទីតាំងរដ្ឋសភាធ្វើសន្និសីទកាសែត បង្ហាញពីបញ្ហាជម្លោះព្រំដែនរវាងកម្ពុជា និងវៀតណាម នៅថ្ងៃទី១៨ មិថុនា។
តំណាងរាស្ត្រគណបក្សសង្គ្រោះជាតិ មណ្ឌលកំពង់ចាម លោក ម៉ៅ មុនីវណ្ណ បានដាក់លិខិតទៅប្រធានរដ្ឋសភា លោក ហេង សំរិន កាលពីថ្ងៃទី១៧ មិថុនា ដើម្បីស្នើសុំទីកន្លែងធ្វើសន្និសីទកាសែតនៅវិមានរដ្ឋសភា ស្ដីពីបញ្ហាព្រំដែនកម្ពុជា-វៀតណាម ដែលគ្រោងធ្វើនៅថ្ងៃទី១៩ ខែមិថុនា ប៉ុន្តែសំណើនេះត្រូវបាន លោក ហេង សំរិន ចារដោយដៃយ៉ាងខ្លីនៅលើលិខិតស្នើសុំនោះ ហើយផ្ញើត្រឡប់មកវិញនៅថ្ងៃដដែល។
ចំណាររបស់ លោក ហេង សំរិន បញ្ជាក់ថា រដ្ឋសភាពុំដែលចេញលិខិតបេសកកម្មដល់តំណាងរាស្ត្រគណបក្សសង្គ្រោះជាតិ ឲ្យចុះទៅធ្វើកិច្ចការទាក់ទងនឹងបញ្ហាព្រំដែនរវាងកម្ពុជា និងវៀតណាម នោះទេ។ ដូច្នេះ លោកមិនអនុញ្ញាតឲ្យធ្វើសន្និសីទកាសែតនៅវិមានរដ្ឋសភានោះឡើយ។
ប្រតិកម្មតបនឹងសេចក្តីបដិសេធនេះ លោក អ៊ុំ សំអាន អ្នកតំណាងរាស្ត្រមណ្ឌលសៀមរាប ដែលសកម្មក្នុងការឃ្លាំមើលកិច្ចការព្រំដែន បានហៅការរារាំងនេះ គឺជាការរំលោភលើបទបញ្ជាផ្ទៃក្នុងរដ្ឋសភា និងរដ្ឋធម្មនុញ្ញ ដែលចែងពីសិទ្ធិ និងកាតព្វកិច្ចរបស់អ្នកតំណាងរាស្ត្រ៖ «ប្រធានរដ្ឋសភាអត់មានចែងក្នុងបទបញ្ជាផ្ទៃក្នុង ឬរដ្ឋធម្មនុញ្ញឲ្យប្រើសិទ្ធិហ្នឹងទេ អ៊ីចឹងសិទ្ធិហ្នឹង គឺគាត់ប្រើលើសព្រំដែនជាប្រធានរដ្ឋសភា»។
លោកបន្តថា អ្នកតំណាងរាស្ត្រមានសិទ្ធិចុះធ្វើការងារជួបជាមួយពលរដ្ឋគ្រប់ទីកន្លែង ដោយមិនចាំបាច់មានលិខិតអនុញ្ញាតបេសកកម្មពីប្រធានសភានោះទេ ហើយម្យ៉ាងទៀត រដ្ឋសភា គឺជារបស់សភាជាតិទាំងមូល មិនមែនសម្រាប់តែ លោក ហេង សំរិន ឬសម្រាប់តែតំណាងរាស្ត្ររបស់គណបក្សប្រជាជនកម្ពុជា ប្រើប្រាស់នោះទេ៖ «ជាធម្មតាទាក់ទងនឹងបញ្ហាព្រំដែន គឺជារឿងរសើប ដូច្នេះរដ្ឋាភិបាលតែងតែខ្លាច ជាពិសេសរឿងព្រំដែនជាមួយយួន។ អ៊ីចឹងហើយបានជាគាត់មិនឲ្យធ្វើសន្និសីទកាសែតជុំវិញរឿងនេះ»។
សម្រាប់មន្ត្រីសិទ្ធិមនុស្សវិញ ក៏មិនសប្បាយចិត្តចំពោះការឆ្លើយបដិសេធ មិនឲ្យអ្នកតំណាងរាស្ត្រប្រើប្រាស់ទីតាំងរដ្ឋសភា ដែលជាកន្លែងធ្វើការរបស់គាត់ ដើម្បីប្រាប់ព័ត៌មានទៅប្រជាពលរដ្ឋនោះដែរ។
ប្រធានក្រុមអ្នកស៊ើបអង្កេតនៃអង្គការលីកាដូ (Licadho) លោក អំ សំអាត មានប្រសាសន៍ថា បើគិតពីផលប្រយោជន៍រួម អ្នកតំណាងរាស្ត្រត្រូវមានសិទ្ធិប្រើប្រាស់ទីតាំងរដ្ឋសភា ដើម្បីជួបប្រជុំផ្តល់ព័ត៌មានផ្សេងៗដល់អ្នកពាក់ព័ន្ធទៅតាមសិទ្ធិ និងកាតព្វកិច្ចរបស់អ្នកតំណាងរាស្ត្រ៖ «ប៉ុន្តែបើគេគិតពីផលប្រយោជន៍នយោបាយ ឬផលប្រយោជន៍បក្ស ការហាមឃាត់របៀបនេះវាមិនមែនជាផ្នែកមួយ ដើម្បីបម្រើផលប្រយោជន៍សាធារណៈរបស់ប្រជាពលរដ្ឋនោះទេ»។
តែទោះយ៉ាងណា តំណាងរាស្ត្រគណបក្សសង្គ្រោះជាតិ បានប្រកាសលើកពេលធ្វើសន្និសីទកាសែតនេះទៅពេលក្រោយទៀត ពីព្រោះមិនចង់ទៅធ្វើនៅកន្លែងផ្សេងដែលមិនមែនជាកន្លែងធ្វើការងារផ្លូវការរបស់អ្នកតំណាងរាស្ត្រ ប៉ុន្តែនៅតែព្យាយាមចរចាដោយសន្តិវិធី ដើម្បីសុំទីតាំងវិមានរដ្ឋសភាធ្វើសន្និសីទកាសែតនៅពេលក្រោយទៀត៕
No comments:
Post a Comment