រថយន្តជាង ១០គ្រឿងរបស់ក្រុមតំណាងរាស្ត្រគណបក្សសង្គ្រោះជាតិ និងយុវជន រួមទាំងព្រះសង្ឃ បានធ្វើដំណើរទៅខេត្តរតនគិរី ដើម្បីត្រួតពិនិត្យរណ្ដៅស្រះទឹក នៅថ្ងៃទី៧ ខែមិថុនា ឆ្នាំ២០១៥។
Photo Provided
ក្រុមតំណាងរាស្ត្រ រួមទាំងយុវជនជាង ១០០នាក់ នៅថ្ងៃទី៧ មិថុនា ធ្វើដំណើរពីភ្នំពេញទៅខេត្តរតនគិរី ក្នុងគោលដៅដើម្បីត្រួតពិនិត្យព្រំដែនកម្ពុជា-វៀតណាម ដែលអ្នកភូមិជនជាតិដើមភាគតិច រួមទាំងមន្ត្រីសង្គមស៊ីវិលអះអាងថា វៀតណាម បានជីកស្រះទឹកនៅលើខ្សែបន្ទាត់ព្រំដែនត្រួតគ្នានៃភាគីកម្ពុជា-វៀតណាម។
ក្រុមតំណាងរាស្ត្រចំនួន ៤រូប និងយុវជន រួមទាំងព្រះសង្ឃផង គ្រោងនឹងចេញដំណើរទៅភូមិឡំ ឃុំប៉ក់ញ៉ៃ ស្រុកអូរយ៉ាដាវ នៅព្រឹកថ្ងៃទី៨ មិថុនា ចម្ងាយប្រហែលជាង ៧០គីឡូម៉ែត្រពីទីរួមខេត្តរតនគិរី ដើម្បីត្រួតពិនិត្យវៀតណាម ជីករណ្ដៅស្រះទឹកចំនួន៧ ក្នុងដីដែលត្រួតស៊ីគ្នានៃភាគីកម្ពុជា-វៀតណាម នៅតំបន់មានជម្លោះនោះ។
តំណាងរាស្ត្រគណបក្សសង្គ្រោះជាតិ លោក ម៉ៅ មុនីវណ្ណ ដែលដឹកនាំក្រុមតំណាងរាស្ត្រ និងយុវជន រួមទាំងព្រះសង្ឃផង ឲ្យដឹងថា លោកនឹងរកយន្តការតាមផ្លូវច្បាប់ ព្រមទាំងភស្តុតាងជាក់លាក់ ហើយនឹងធ្វើរបាយការណ៍ទៅប្រធានរដ្ឋសភា ដើម្បីជំរុញឲ្យរដ្ឋាភិបាលអន្តរាគមន៍ទៅប្រទេសវៀតណាម ទាក់ទិនការជីករណ្ដៅស្រះនេះ ថារំលោភកិច្ចព្រមព្រៀងទីក្រុងប៉ារីស ដែលវៀតណាម ជាម្ចាស់ហត្ថលេខី៖ «វាជាការរំលោភដែនអធិបតេយ្យរបស់ប្រទេសកម្ពុជា ហើយ យើងអង្កេតឃើញថា រដ្ឋាភិបាលគាត់បានឆ្លើយតបដែរថា កន្លែងហ្នឹងយួន រំលោភអធិបតេយ្យយើងហើយ»។
ក្រុមយុវជនដែលធ្វើដំណើរដោយរថយន្តផ្ទាល់ខ្លួន និងរថយន្តឈ្នួលផងជាង ១០រថយន្ត នឹងរកមធ្យោបាយដាក់សម្ពាធឲ្យរដ្ឋាភិបាល យកចិត្តទុកដាក់ការពារដែនអធិបតេយ្យដែលរងការរំលោភពីប្រទេសវៀតណាម កន្លងមក និងនៅពេលបច្ចុប្បន្ន។
តំណាងយុវជន លោក អៀ ចាន់ណា អង្កេតឃើញថា បច្ចុប្បន្នប្រទេសវៀតណាម នៅតែបន្តរំលោភទឹកដីខ្មែរជាបន្តបន្ទាប់ ដែលរដ្ឋាភិបាលនៅមិនទាន់មានយន្តការទប់ស្កាត់ ដែលអាចជឿទុកចិត្តបាននោះឡើយ។ លោកបារម្ភថា ប្រទេសកម្ពុជា នឹងមានវាសនាដូចទឹកដីកម្ពុជាក្រោម បើរដ្ឋាភិបាលនៅតែព្រងើយកន្តើយបញ្ហាព្រំដែន៖ «រឿងនេះជារឿងប្រទេសជារបស់យើងទាំងអស់គ្នា ដូច្នេះប្រជាពលរដ្ឋយុវជន ព្រះសង្ឃ ដូចជាអ្នកនយោបាយទាំងអស់គ្នា គឺមានសុឆន្ទៈក្នុងការការពារទឹកដីក្នុងការស្រឡាញ់ជាតិនេះ»។
មន្ត្រីសង្គមស៊ីវិលឲ្យដឹងថា មកដល់បច្ចុប្បន្ន វៀតណាម បានជីករណ្ដៅស្រះទឹកចំនួន៧ ក្នុងនោះមានស្រះចំនួន៤ ដែលវៀតណាម បានជីកតាំងពីឆ្នាំ២០១៤ ឋិតនៅភូមិឡំ ឃុំប៉ក់ញ៉ៃ ស្រុកអូរយ៉ាដាវ ខេត្តរតនគិរី។ ចំណែករណ្ដៅស្រះនោះមានជម្រៅជាង ៤ម៉ែត្រ ទទឹង ៥ម៉ែត្រ និងបណ្តោយ ១០ម៉ែត្រ។
វិទ្យុអាស៊ីសេរី មិនអាចទាក់ទងអ្នកនាំពាក្យសាលាខេត្តរតនគិរី លោក ញ៉ែម សំអឿន បានទេនៅថ្ងៃទី៧ មិថុនា ដើម្បីសុំការបំភ្លឺបន្ថែមពីបញ្ហានេះ។ ប៉ុន្តែលោកធ្លាប់ប្រាប់វិទ្យុអាស៊ីសេរី ថា គណៈប្រតិភូថ្នាក់ខេត្ត និងថ្នាក់ក្រសួង បានចុះទៅពិនិត្យកន្លែងមានជម្លោះនោះហើយ។ លោកថា អាជ្ញាធរខ្មែរនឹងស្នើឲ្យភាគីវៀតណាម លុបស្រះនោះវិញ។
មន្ត្រីសម្របសម្រួលសមាគមអាដហុក (adhoc) ខេត្តរតនគិរី លោក ឆាយ ធី មានប្រសាសន៍ថា លោកសាទរចំពោះវត្តមានក្រុមតំណាងរាស្ត្រ និងក្រុមយុវជន ក្នុងការចុះពិនិត្យព្រំដែននេះ។ តែទោះយ៉ាងណា លោករិះគន់សមត្ថកិច្ចព្រំដែនតំបន់នោះ ថាមិនបំពេញភារកិច្ចការពារដែនអធិបតេយ្យ និងឃ្លាំមើលសកម្មភាពការជីកស្រះដោយភាគីវៀតណាម ទេ។ លោកអំពាវនាវឲ្យសមត្ថកិច្ចការពារព្រំដែន យកចិត្តទុកដាក់ត្រួតពិនិត្យតំបន់នោះឲ្យបានច្បាស់លាស់៖ «យើងគិតថានៅពេលដែលបោះបង្គោលព្រំដែន គេនឹងខិតមកបន្ថែមទៀត គេនឹងចាត់ទុកថាកន្លែងហ្នឹងជាដីរបស់គេហើយ»។
លោក ឆាយ ធី បន្ថែមទៀតថា ដីនៅតំបន់នោះស្ថិតនៅចន្លោះបង្គោលព្រំដែនលេខ៣១ ដល់បង្គោលលេខ៣៩ ឋិតនៅភូមិឡំ ឃុំប៉ក់ញ៉ៃ ស្រុកអូរយ៉ាដាវ ដែលភាគីទាំងពីរមិនទាន់ឯកភាពបោះបង្គោលព្រំដែននៅឡើយទេ។
យ៉ាងនេះក្តី តំណាងសហគមន៍ភូមិឡំ លោក រចំ ខាំ ថ្លែងថា ទីតាំងដីវៀតណាម ជីករណ្ដៅស្រះនេះ កន្លងមកជាដីចម្ការអ្នកភូមិជនជាតិដើមភាគតិចអាស្រ័យផល៖ «កាលមុនហ្នឹងវាចម្ការភូមិឡំ អាហ្នឹងដីហ្នឹងដីភូមិឡំ»។
កាលពីថ្ងៃទី៣ មិថុនា ក្រុមការងារគណបក្សសង្គ្រោះជាតិ ប្រចាំខេត្តរតនគិរី រួមទាំងសមាជិកសហគមន៍ជនជាតិដើមភាគតិចភូមិឡំ ស្រុកអូរយ៉ាដាវ ត្រូវបានតម្រួតវៀតណាម គំរាមបាញ់សម្លាប់មិនឲ្យទៅពិនិត្យមើលតំបន់នោះទេ ដោយសំអាងថា ជាទឹកដីវៀតណាម។
ទាក់ទិនបញ្ហានេះដែរ មន្ត្រីឃ្លាំមើលសិទ្ធិមនុស្សអះអាងថា ជនជាតិដើមភាគតិចចារ៉ាយខ្មែរ លោក សេវ ហ្វិញ ត្រូវបានរថយន្តធុនតូចពណ៌ខ្មៅស្រដៀងកាម៉ារី (Camry) និងលុច្យស៊ីស (Luxus) ប៉ងសម្លាប់ដោយរូបភាពគ្រោះថ្នាក់ចរាចរណ៍បើកបុកពីក្រោយ កាលពីរសៀលថ្ងៃទី៦ មិថុនា បណ្ដាលឲ្យរងរបួសយ៉ាងដំណំ ៤នាក់ រួមទាំងកូនស្រីលោកពីរនាក់ និងចៅស្រីម្នាក់ ឋិតនៅឃុំសោម ស្រុកអូរយ៉ាដាវ។ បន្ទាន់ពីកើតហេតុភ្លាម រថយន្តនោះបានបើកសំដៅទៅប្រទេសវៀតណាម។ បញ្ហានេះ លោក ឆាយ ធី ដាក់ការសង្ស័យថា ការប៉ងសម្លាប់នេះជាលើកទីពីរហើយ បន្ទាប់ពី លោក សេវ ហ្វិញ គ្រោងដឹកនាំក្រុមតំណាងរាស្ត្រពិនិត្យរណ្ដៅស្រះទឹក ដែលវៀតណាម បានជីកនោះ៕
No comments:
Post a Comment