ដោយ យាង សុជាមេត្តា
2015-06-17
លោក ថាច់ ង៉ុក ថាច់ (ឆ្វេង) ប្រធានសហព័ន្ធខ្មែរកម្ពុជាក្រោម (KKF)
Photo: RFA
តំណាងសហព័ន្ធខ្មែរកម្ពុជាក្រោមពិភពលោក ជួបជាមួយសមាជិកសភាសហភាពអឺរ៉ុប នៅថ្ងៃទី១៦ និងថ្ងៃទី១៧ ខែមិថុនា នាទីក្រុងប្រ៊ុចសែល (Brussels) ប្រទេសបែលហ្ស៊ិក (Belgium)។
នៅក្នុងជំនួបនោះ សហព័ន្ធខ្មែរកម្ពុជាក្រោម បានលើកយកបញ្ហានៃការរំលោភសិទ្ធិមនុស្សនានានៅកម្ពុជាក្រោម ប្រាប់ដល់សមាជិកសភាសហភាពអឺរ៉ុប និងអំពាវនាវឲ្យពួកគេ ជំរុញទៅរដ្ឋាភិបាលវៀតណាម គោរពសិទ្ធិពលរដ្ឋខ្មែរក្រោមដែលជាម្ចាស់ស្រុក។
នៅក្នុងជំនួបជាមួយសមាជិកសភាសហភាពអឺរ៉ុប តំណាងខ្មែរក្រោមបានលើកឡើងពីបញ្ហាជាច្រើន ដែលខ្មែរក្រោមកំពុងជួបប្រទះ ក្នុងនោះមានដូចជា បញ្ហានៃការអភិវឌ្ឍសេដ្ឋកិច្ច គ្រួសារ ការបោះបង់ចោលដីស្រែចម្ការរបស់ពលរដ្ឋខ្មែរក្រោមទៅធ្វើជាកម្មកររោងចក្រ ឬអ្នកបម្រើគេនៅតាមទីក្រុង និងពីការរឹតត្បិតនានាពីសំណាក់អាជ្ញាធរវៀតណាម។
ប្រធានសហព័ន្ធខ្មែរកម្ពុជាក្រោមពិភពលោក លោក ថាច់ ង៉ុកថាច់ មានប្រសាសន៍តាមទូរស័ព្ទពីទីក្រុងប្រ៊ុចសែល ប្រទេសបែលហ្ស៊ិក នៅថ្ងៃទី១៧ មិថុនា ថា នៅក្នុងជំនួបនោះ សហព័ន្ធខ្មែរកម្ពុជាក្រោម បានបង្ហាញនូវការបារម្ភពីភាពក្រីក្រដែលពលរដ្ឋខ្មែរក្រោមកំពុងជួបប្រទះ។ លោកបញ្ជាក់ថា ភាពក្រីក្ររបស់ខ្មែរក្រោម មិនត្រឹមតែធ្វើឲ្យប៉ះពាល់តែទៅលើជីវភាពរស់នៅរបស់ពលរដ្ឋប៉ុណ្ណោះទេ ប៉ុន្តែវាក៏ជះឥទ្ធិពលអវិជ្ជមានទៅដល់ការប្រតិបត្តិព្រះពុទ្ធសាសនា និងការថែរក្សានូវប្រពៃណី ទំនៀមទម្លាប់របស់ខ្មែរក្រោមទៀតផង៖ «យើងបានជជែក ឧទាហរណ៍ថា ព្រោះខ្មែរក្រោមស្រែវាទាក់ទងដល់រឿងសេដ្ឋកិច្ច រឿងចិញ្ចឹមក្រពះ តែកាលណាយើងខ្វះខាត យើងក្រ លទ្ធិជំនឿសាសនាទៅណា ព្រោះថា បើកាលណាបងប្អូនក្ររត់ចោលស្រុកភូមិ ព្រះសង្ឃដែលជាអ្នកបណ្តុះបណ្តាលសាសនា ផ្សព្វផ្សាយសាសនា ក៏អន់ថយទៅតាមហ្នឹងដែរ។ ព្រះសង្ឃយើងត្រូវថយចង្ហាន់ មិនមានអ្នកសាងផ្នួសច្រើន នេះជាបញ្ហា»។
លោក ថាច់ ង៉ុកថាច់ អះអាងថា សហព័ន្ធខ្មែរកម្ពុជាក្រោម ចង់ឲ្យសហភាពអឺរ៉ុប ដែលជាដៃគូពាណិជ្ជកម្មដ៏សំខាន់មួយរបស់ប្រទេសវៀតណាម ដែរនោះ លើកយកបញ្ហានេះទៅជជែកជាមួយរដ្ឋាភិបាលវៀតណាម ធ្វើយ៉ាងណាឲ្យផលដែលទទួលបានពីការរីកចម្រើនសេដ្ឋកិច្ច ធ្លាក់ដល់ដៃជនជាតិទាំងអស់នៅក្នុងប្រទេសវៀតណាម គឺមិនត្រឹមតែជនជាតិវៀតណាម មួយនោះទេ។ លោកថា សមាជិកសភាសហភាពអឺរ៉ុប លោក គ្រីស្ទៀន ដែន ប្រេដា (Cristian Dan Preda) សន្យាថា នឹងលើកយកសំណើរបស់ខ្មែរក្រោមទៅជជែកជាមួយនឹងសមាជិកសភាសហភាពអឺរ៉ុប ដទៃទៀត។
ជំនួបរវាងតំណាងសហព័ន្ធខ្មែរកម្ពុជាក្រោមពិភពលោក និងសមាជិកសភាសហភាពអឺរ៉ុប និងមន្ត្រីមួយចំនួនទៀតរបស់សហភាពអឺរ៉ុប ទទួលបន្ទុកផ្នែកសិទ្ធិមនុស្ស ធ្វើឡើងក្នុងពេលដែលព្រះសង្ឃខ្មែរក្រោម ២អង្គ និងពលរដ្ឋមួយចំនួនទៀតនៅខេត្តឃ្លាំង ដែលត្រូវអាជ្ញាធរវៀតណាម ចាប់ដាក់គុកតាំងពីឆ្នាំ២០១៣ មិនទាន់ត្រូវបានដោះលែងឲ្យមានសេរីភាពនៅឡើយ។
លោក ថាច់ ង៉ុកថាច់ ឲ្យដឹងដែរថា ក្រៅពីជួបជាមួយសមាជិកសភាសហភាពអឺរ៉ុប តំណាងសហព័ន្ធខ្មែរកម្ពុជាក្រោម កាលពីថ្ងៃទី៩ មិថុនា ក៏បានជួបជាមួយតំណាងក្រុមប្រឹក្សាសិទ្ធិមនុស្សអង្គការសហប្រជាជាតិ ទទួលបន្ទុកសិទ្ធិជំនឿសាសនា និងតំណាងនៃឧត្តមស្នងការអង្គការសហប្រជាជាតិ ទទួលបន្ទុកជនភៀសខ្លួននៅក្នុងទីក្រុងហ្សឺណែវ (Geneva) ប្រទេសស្វីស (Switzerland) ផងដែរ។
លោក ថាច់ ង៉ុកថាច់ មានប្រសាសន៍ថា នៅក្នុងជំនួបពេលនោះ ខ្មែរក្រោមបានលើកឡើងពីករណីព្រះសង្ឃខ្មែរក្រោមចំនួន ២អង្គ គឺព្រះតេជព្រះគុណ លីវ នី និង ថាច់ ធឿន ដែលត្រូវអាជ្ញាធរវៀតណាម ចាប់ដាក់គុកដោយសារតែពួកគាត់តវ៉ាទាមទារឲ្យមានសាលារៀនភាសាខ្មែរនៅក្នុងវត្ត និងដោយសារតែពួកគាត់មានទំនាក់ទំនងជាមួយព្រះសង្ឃខ្មែរក្រោមនៅក្រៅប្រទេស។
ក្រៅពីនេះ សហព័ន្ធខ្មែរកម្ពុជាក្រោម ក៏បានលើកឡើងពីការរឹតត្បិតរបស់អាជ្ញាធរកុម្មុយនីស្តវៀតណាម ដែលហាមប្រាមមិនឲ្យព្រះសង្ឃខ្មែរក្រោម ប្រើប្រាស់ត្រាវត្តជាអក្សរខ្មែរ ហើយបានបង្ខំឲ្យព្រះសង្ឃខ្មែរប្ដូរឈ្មោះត្រាវត្តទៅជាភាសាវៀតណាម វិញ។ ខ្មែរក្រោម ចាត់ទុកសកម្មភាពរបស់អាជ្ញាធរវៀតណាម នេះ ថាជាការប៉ុនប៉ងលុបបំបាត់អត្តសញ្ញាណ និងឈ្មោះវត្តអារាមរបស់ខ្មែរនៅដែនដីកម្ពុជាក្រោម។
បន្ថែមពីលើនេះ ក្នុងជំនួបជាមួយតំណាងឧត្តមស្នងការអង្គការសហប្រជាជាតិ ទទួលបន្ទុកជនភៀសខ្លួនខ្មែរក្រោម ក៏បានលើកឡើងពីបញ្ហាលំបាករបស់ជនភៀសខ្លួនខ្មែរក្រោមក្នុងប្រទេសថៃ ដែលកំពុងព្យាយាមសុំសិទ្ធិជ្រកកោនទៅកាន់ប្រទេសទី៣ ផងដែរ។ បើតាមសហព័ន្ធខ្មែរកម្ពុជាក្រោម ជនភៀសខ្លួនខ្មែរក្រោមដែលកំពុងស្នាក់នៅក្នុងប្រទេសថៃ សព្វថ្ងៃមានប្រមាណ ១០០នាក់។ ពួកគេមកពីបណ្ដាខេត្តមួយចំនួននៅកម្ពុជាក្រោម ដូចជា ខេត្តព្រះត្រពាំង ខេត្តឃ្លាំង និងខេត្តពលលាវ ជាដើម។
លោក ថាច់ ង៉ុកថាច់ អះអាងថា ខ្មែរក្រោមទាំងអស់នោះភៀសខ្លួនទៅកាន់ប្រទេសថៃ គឺដើម្បីរត់គេចចេញពីការតាមធ្វើបាបពីសំណាក់អាជ្ញាធរវៀតណាម។
ជាទូទៅ តំណាងសហព័ន្ធខ្មែរកម្ពុជាក្រោមពិភពលោក ជួបជាមួយតំណាងក្រុមប្រឹក្សាសិទ្ធិមនុស្សអង្គការសហប្រជាជាតិ ចំនួន ២ដងក្នុងមួយឆ្នាំ ដើម្បីជជែកអំពីបញ្ហាខ្មែរក្រោម គឺនៅរៀងរាល់ខែមិថុនា នៅពេលដែលសហព័ន្ធខ្មែរកម្ពុជាក្រោមនៅទ្វីបអឺរ៉ុប រៀបចំពិធីរំឭកខួបបាត់បង់ទឹកដីកម្ពុជាក្រោម និងនៅខែវិច្ឆិកា នៅពេលដែលមានកិច្ចប្រជុំរបស់ក្រុមប្រឹក្សាសិទ្ធិមនុស្សរបស់អង្គការសហប្រជាជាតិ៕
1 comment:
Very good diplomacy.
Post a Comment