ដោយ រដ្ឋា វិសាល
2015-06-17
លោក ម៉ៅ មុនីវណ្ណ តំណាងរាស្ត្រមណ្ឌលកំពង់ចាម ក្នុងវេទិកាអ្នកស្ដាប់វិទ្យុអាស៊ីសេរី កាលពីថ្ងៃទី២២ ខែឧសភា ឆ្នាំ២០១៥។
RFA
ថ្នាក់ដឹកនាំគណបក្សសង្គ្រោះជាតិ នៅឃុំចំនួនបី ក្នុងខេត្តរតនគិរី សម្ដែងការមិនពេញចិត្តចំពោះគម្រោងតែងតាំងគណៈកម្មាធិការប្រតិបត្តិខេត្ត ដែលមិនអនុលោមតាមលទ្ធិប្រជាធិបតេយ្យ និងលក្ខន្តិកៈបទបញ្ជាផ្ទៃក្នុងគណបក្ស។
ជម្លោះផ្ទៃក្នុងគណបក្សថ្នាក់មូលដ្ឋាននេះ នៅមិនទាន់រកដំណោះស្រាយបញ្ចប់វិវាទបាននៅឡើយ រហូតមានការទាមទារឲ្យមានដំណោះស្រាយយុត្តិធម៌ពីថ្នាក់ដឹកនាំកំពូលគណបក្ស។
ការទាមទារនេះ ធ្វើឡើងក្នុងកិច្ចប្រជុំកាលពីថ្ងៃទី១៦ ខែមិថុនា នៅការិយាល័យសមាគមអាដហុក (adhoc) ខេត្តរតនគិរី បន្ទាប់ពីមន្ត្រីតំណាងគណបក្សសង្គ្រោះជាតិ នៅឃុំចំនួនបី គឺឃុំប៉ាតេ ឃុំប៉ក់ញ៉ៃ និងឃុំសេសាន ក្នុងស្រុកអូរយ៉ាដាវ បានស្នើសុំការិយាល័យនោះផ្តល់ព័ត៌មានដល់ប្រព័ន្ធផ្សព្វផ្សាយ ជាសារដល់ប្រធានគណបក្សជួយដោះស្រាយ។
ប្រធានគណៈកម្មាធិការប្រតិបត្តិគណបក្សសង្គ្រោះជាតិ ខេត្តរតនគិរី លោក អំ ស៊ុនយីន រៀបរាប់ថា ខណៈលោកកំពុងឋិតក្នុងតំណែងស្រាប់ តែក្រុមការងារគណបក្សថ្នាក់ជាតិមួយក្រុមរួមមាន លោកស្រី ថាក់ ឡានី លោក ម៉ៅ មុនីវណ្ណ និងមន្ត្រីបក្សមួយចំនួនទៀត បានរៀបចំតែងតាំងគណៈកម្មាធិការប្រតិបត្តិខេត្តថ្មីមួយទៀត ដោយមិនបានជូនដំណឹង ឬបញ្ជាក់មូលហេតុពាក់ព័ន្ធនឹងការចាត់តាំងគណៈកម្មាធិការប្រតិបត្តិថ្មីនេះឡើយ៖ «គេតែងតាំងវាផ្ទុយលក្ខន្តិកៈបក្ស វាក្លាយជាអនាធិបតេយ្យ។ ពួកខ្ញុំទ្រឹស្ដីពួកខ្ញុំវាទន់ខ្សោយណាស់ វាចេះតែលាបពណ៌ ចេះតែមើលងាយប្រមាថជនជាតិដើមភាគតិច អាហ្នឹងអយុត្តិធម៌»។
ដូចគ្នានេះដែរ ប្រធានគណៈកម្មាធិការប្រតិបត្តិគណបក្សសង្គ្រោះជាតិ ឃុំប៉ក់ញ៉ៃ លោក ពូយ ផ្លុំ កត់សម្គាល់ដែរថា សមាសភាពគណៈកម្មការប្រតិបត្តិថ្មីមិនមានតំណាងជនជាតិដើមភាគតិចចារ៉ាយ ដែលភាគច្រើនបានចូលរួមជាមួយគណបក្សសង្គ្រោះជាតិ ហើយជាប់ឆ្នោតជាសមាជិកក្រុមប្រឹក្សាឃុំ ក្នុងការបោះឆ្នោតជ្រើសរើសក្រុមប្រឹក្សាឃុំ-សង្កាត់កន្លងទៅឡើយ៖ «តែងតាំងយកមនុស្សមកពីណាអត់មានសមាជិកម្នាក់ ក៏តែងតាំងដែរ ដូចជាទាត់ចោលជនជាតិដើមភាគតិចរបស់ខ្ញុំដែរ។ ឥឡូវតែងតាំង ១៥នាក់នេះទៀត ពួកខ្ញុំអត់យល់ព្រមទេ»។
យោងឯកសារសម្រេចស្ដីពីការតែងតាំងថ្នាក់ដឹកនាំគណៈកម្មាធិការប្រតិបត្តិគណបក្សសង្គ្រោះជាតិ ខេត្តរតនគិរី ប្រធានស្តីទី លោក កឹម សុខា កាលពីឆ្នាំ២០១៣ បានសម្រេចតែងតាំងសមាសភាព ៤រូប គឺលោក អំ ស៊ុនយីន ជាប្រធាន លោក រ៉ាន់ សាយលឿន ជាអនុប្រធាន លោក គង់ សាវុធ ជាលេខាធិការ និងលោក ស៊ិន ប៉ូណា ជាហេរញ្ញិក។ ដោយឡែកសមាសភាពគណៈកម្មាធិការប្រតិបត្តិថ្មីដែលគ្រោងនឹងតែងតាំងរួមមាន ១៥រូប ក្នុងនោះគណៈកម្មាធិការអចិន្ត្រៃយ៍រួមមាន ៥រូប គឺលោក ក្តិច ប៊ុនថា លោក រ៉ាន់ សាយលឿន លោក អៀម អឿន លោក វន ថុនា និងលោក ងិន សុផាត។ ដោយឡែក លោក អៀម អឿន ទំនងនឹងត្រូវបានតែងតាំងជាប្រធានគណៈកម្មាធិការប្រតិបត្តិគណបក្សសង្គ្រោះជាតិ ខេត្តរតនគិរី។
ទាក់ទិនការចោទប្រកាន់នេះ សមាជិកសភាមណ្ឌលកំពង់ចាម គណបក្សសង្គ្រោះជាតិ លោក ម៉ៅ មុនីវណ្ណ ដែលបានចូលរួមរៀបចំសមាសភាពថ្មីនៃគណៈកម្មាធិការប្រតិបត្តិខេត្តរតនគិរី បញ្ជាក់ថា មន្ត្រីបក្សមូលដ្ឋានខ្លះយល់ច្រឡំពីចំណាត់ការរៀបចំសមាសភាពដឹកនាំនៅមូលដ្ឋាន។ លោកថា សមាសភាពក្រុមគណៈកម្មាធិការប្រតិបត្តិចាស់ គឺជ្រើសរើសជាលក្ខណៈបណ្ដោះអាសន្ន ខណៈគណបក្ស សម រង្ស៊ី និងគណបក្សសិទ្ធិមនុស្ស បូកបញ្ចូលគ្នាបង្កើតជាគណបក្សសង្គ្រោះជាតិ។ ដោយឡែកសមាសភាពគណៈកម្មាធិការប្រតិបត្តិថ្មី ដែលរៀបចំពេលនេះ គឺបានស្ទាបស្ទង់មតិសមាជិកគណបក្សទាំងពីរនៅមូលដ្ឋានរួចហើយ ដូច្នេះលោកអំពាវនាវសុំឲ្យសមាជិកគណបក្សនៅមូលដ្ឋានរួបរួមគ្នាឡើងវិញ៖ «បើយើងទាំងអស់គ្នាគិតផលប្រយោជន៍ជាតិជាធំ បក្សជាធំ យើងរួបរួមគ្នាធ្វើការទៅ។ ខ្ញុំជឿថា ថ្នាក់ដឹកនាំនឹងពិចារណាថ្លឹងថ្លែងគ្រប់ជ្រុងជ្រោយណាស់បញ្ហាហ្នឹង»។
នៅខេត្តរតនគិរី មន្ត្រីគណបក្សសង្គ្រោះជាតិ ជាប់ឆ្នោតជាសមាជិកក្រុមប្រឹក្សាខេត្តមួយរូប សមាជិកក្រុមប្រឹក្សាស្រុក និងក្រុង ៦រូប និងជាក្រុមប្រឹក្សាឃុំ-សង្កាត់ ៣០រូប។
មន្ត្រីសម្របសម្រួលអង្គការអាដហុក លោក ឆាយ ធី ថ្លែងថា នេះជាបញ្ហាផ្ទៃក្នុងគណបក្ស ហេតុនេះត្រូវមានវិធីសាស្ត្រដោះស្រាយដោយថ្នាក់ដឹកនាំគណបក្ស។ លោកកត់សម្គាល់ថា លក្ខន្តិកៈ និងបទបញ្ជាផ្ទៃក្នុងគណបក្ស គឺជាគោលការណ៍គ្រឹះសម្រាប់សមាជិកសមាជិកាគណបក្សអនុវត្ត ទាក់ទិនការរៀបចំរចនាសម្ព័ន្ធគណបក្សថ្នាក់ជាតិ និងថ្នាក់ក្រោមជាតិ៖ «គឺអាស្រ័យទៅលើការបោះឆ្នោត វាមានតម្លាភាព វាមានយុត្តិធម៌ មិនមានរើសអើងថាអ្នកមានអ្នកក្រ អ្នកតស៊ូ ឬស៊ីលុយអ៊ីចឹងទៅ»។
កាលពីខែកក្កដា ឆ្នាំ២០១៤ សមាជិកក្រុមប្រឹក្សាឃុំ-សង្កាត់ នៃគណបក្សសង្គ្រោះជាតិ ខេត្តរតនគិរី ជិត ៣០នាក់ បានផ្ដិតមេដៃស្នើសុំដកបេក្ខភាព លោក អៀម អឿន ពីសមាជិកក្រុមប្រឹក្សាខេត្ត ដោយចោទថា លោកជេរប្រមាថសមាជិកក្នុងបក្ស ក៏ប៉ុន្តែរហូតពេលនេះ មិនឃើញមានដំណោះស្រាយនៅឡើយ៕
No comments:
Post a Comment