ដោយ សេក បណ្ឌិត
2015-06-11
អគ្គនាយកដ្ឋានអន្តោប្រវេសន៍នៃក្រសួងមហាផ្ទៃ បង្កើនការរឹតបន្តឹងតាមច្រកព្រំដែន ដើម្បីទប់ស្កាត់ការហូរចូលជនអន្តោប្រវេសន៍ខុសច្បាប់ និងភាពមិនប្រក្រតីនៃការស្នាក់នៅរបស់ពួកគេក្នុងប្រទេសកម្ពុជា។ ជាលទ្ធផល ជនបរទេសខុសច្បាប់ ជាពិសេសជនជាតិវៀតណាម រាប់ពាន់នាក់ ត្រូវចាប់បញ្ជូនទៅប្រទេសដើមវិញ។
អគ្គនាយកដ្ឋានអន្តោប្រវេសន៍នៃក្រសួងមហាផ្ទៃ រកឃើញជនអន្តោប្រវេសន៍ខុសច្បាប់មានចំនួនកើនឡើងជាបន្តបន្ទាប់ ក្រោយពីការរឹតបន្តឹងលើការត្រួតពិនិត្យកន្លែងស្នាក់នៅរបស់ពួកគេនៅដើមឆ្នាំ២០១៥ នេះ។
ប្រធាននាយកដ្ឋានស៊ើបអង្កេត និងអនុវត្តនីតិវិធី នៃអគ្គនាយកដ្ឋានអន្តោប្រវេសន៍ លោក អ៊ុក ហៃសិលា។ លោកមានប្រសាសន៍ថា កាលពីយប់ថ្ងៃទី១០ មិថុនា សមត្ថកិច្ចឆែកឆេររកឃើញស្ត្រីជនជាតិវៀតណាម ៦នាក់ ដែលបម្រើសេវាកម្សាន្តខារ៉ាអូខេនៅសង្កាត់វត្តភ្នំ និងភ្ញៀវ ២នាក់ផ្សេងទៀត ហើយនៅថ្ងៃទី១១ មិថុនា រកឃើញជាង ៤០នាក់ថែមទៀតនៅសង្កាត់ផ្សារដើមថ្កូវ។ ភាគច្រើននៃជនជាតិវៀតណាម ទាំងនោះ គឺជាជាងឈើធ្វើតុទូ៖ «អ៊ីចឹងឃើញថាក្នុងចំណោមវៀតណាម ៤១នាក់ គាត់មានលិខិតឆ្លងដែន ២១នាក់ ហើយ ៩នាក់ លិខិតឆ្លងដែនគាត់មានទិដ្ឋាការពីរ តែគាត់អត់សៀវភៅការងារ អ្នកផ្សេងទៀតដែលមិនមានឯកសារនោះ គឺយើងប្រកាសបណ្ដេញចេញដូចជនជាតិដទៃទៀតដែរ»។
លោកឲ្យដឹងទៀតថា គិតចាប់ពីខែកក្កដា ឆ្នាំ២០១៤ រហូតបច្ចុប្បន្ននេះ អគ្គនាយកដ្ឋានអន្តោប្រវេសន៍ បណ្ដេញចេញជនអន្តោប្រវេសន៍ខុសច្បាប់បានជាង ២ពាន់នាក់ ក្នុងនោះមានជនជាតិវៀតណាម ចំនួនជិត ២ពាន់នាក់។
កាលពីឆ្នាំ២០១៤ គេរកឃើញជនបរទេស ១.៣០៧នាក់ ក្នុងនោះមានជនជាតិវៀតណាម ១.០៥៩នាក់ ហើយនៅ ៦ខែដើមឆ្នាំ២០១៥ នេះ សមត្ថកិច្ចរកឃើញជាង ៧០០នាក់ថែមទៀត ក្នុងនោះមានជនជាតិវៀតណាម មានជាង ៥០០នាក់។
លោក អ៊ុក ហៃសិលា បានបញ្ជាក់មូលហេតុនៃចំនួនជនជាតិវៀតណាម និងចិន នេះច្រើនជាងគេ ដោយសារតែចរន្តស្វែងរកការងារធ្វើ និងអាជីវកម្ម ព្រមទាំងមានអ្នកវិយោគកើនឡើងច្រើនដែលត្រូវការធនធានមនុស្ស៖ «ជនជាតិវៀតណាម មក ដោយសារមានជនជាតិវៀតណាម ដូចគាត់ដែរមករស់នៅស្រុកខ្មែរយូរមក ធ្វើជាមេការសំណង់ ជាងឈើ ដល់ពេលគាត់ខ្វះកម្មករអ៊ីចឹង ភាគច្រើនគាត់ទៅយកកម្មករពីវៀតណាម មកធ្វើការឲ្យគាត់ អ៊ីចឹងបានចេះតែមានជនជាតិវៀតណាម ចេះតែលួចចូលមកខុសច្បាប់»។
ទាក់ទងបញ្ហានេះដែរ អ្នកស្រាវជ្រាវបញ្ហាសង្គម លោកបណ្ឌិត កែម ឡី សង្កេតឃើញថា ការចុះអង្កេតស្វែងរកជនអន្តោប្រវេសន៍ខុសច្បាប់នេះមិនមានតម្លាភាព និងពិបាកជឿលើរបាយការណ៍របស់សមត្ថកិច្ចនេះ ពីព្រោះការចុះធ្វើការអង្កេតរកជនបរទេសកន្លងមកពុំមានការប្រឹក្សាយោបល់គ្នា ខ្វះកិច្ចសហការពីអ្នកពាក់ព័ន្ធនានា ដែលអាចឲ្យការអង្កេតនោះមានភាពត្រឹមត្រូវ និងតម្លាភាព៖ «វាត្រូវនឹងយើងធូររលុងតាមព្រំដែន ធូររលុងខាងគ្រប់គ្រងរដ្ឋបាល អ៊ីចឹងអាការមកហ្នឹងវាលឿន តាមរយៈទេសចរណ៍ ច្រករបៀងជាដើម។ ទីពីរដោយសារកម្រិតនៃការអនុវត្តច្បាប់អន្តោប្រវេសន៍ហ្នឹងមិនបានល្អ ហើយពេលខ្លះមិនហ៊ាននឹងអនុវត្តទៅទៀត បញ្ហានេះធ្វើឲ្យមានការព្រួយបារម្ភ»។
រហូតមកដល់ពេលនេះ មិនមានទិន្នន័យជាក់លាក់ណាមួយបង្ហាញថា មានជនជាតិចិន និងវៀតណាម ចំនួនប៉ុន្មានរស់នៅកម្ពុជា នោះទេ ប៉ុន្តែតាមការប៉ាន់ស្មានរបស់សមាគមវៀតណាម និងចិន បានបង្ហាញថា ប្រជាពលរដ្ឋចិន រស់នៅកម្ពុជា មានចំនួន ១លាននាក់ និងជនជាតិវៀតណាម មានចំនួនជាង ១លាននាក់។
មន្ត្រីអគ្គនាយកដ្ឋានអន្តោប្រវេសន៍នៃក្រសួងមហាផ្ទៃ មានការពិបាកក្នុងការបង្ហាញទិន្នន័យមួយជាក់ស្តែងពីចំនួនជនអន្តោប្រវេសន៍ ដែលកំពុងរស់នៅក្នុងប្រទេសកម្ពុជា។ ចំពោះទិន្នន័យជនអន្តោប្រវេសន៍វៀតណាម ដែលកំពុងរស់នៅក្នុងប្រទេសកម្ពុជា សព្វថ្ងៃ ហើយកំពុងមានបញ្ហាប្រឈមនោះ ក៏មានការអះអាងខុសគ្នាដែរ ដូចជាខាងគណបក្សប្រឆាំងថាមានចំនួនប្រមាណ ៥សែននាក់ ចំណែកខាងរដ្ឋាភិបាលវិញធ្លាប់អះអាងដោយយោងតាមជំរឿនឆ្នាំ២០០២ ថា មានចំនួនតែជាង ១សែននាក់ប៉ុណ្ណោះ៕
No comments:
Post a Comment