លោកនាយករដ្ឋមន្ត្រី ហ៊ុន សែន ចាត់ទុកការចោទប្រកាន់របស់តំណាងរាស្ត្រគណបក្សសង្គ្រោះជាតិ លោក អ៊ុំ សំអាន មកលើរដ្ឋាភិបាលរបស់លោកថា ធ្វើឲ្យបាត់ទឹកដីនៅច្រកព្រំដែនភ្នំដិន ខេត្តតាកែវនោះ គឺជាសកម្មភាពធ្វើឲ្យខាតបង់ប្រយោជន៍ជាតិ និងផ្ទុយពីការពិត។ ប្រតិកម្មរបស់លោក ហ៊ុន សែន ធ្វើឡើងតាមរយៈលិខិតរបស់ខ្លួនចុះថ្ងៃទី ១២ ខែមិថុនា ដែលផ្ញើទៅប្រធានរដ្ឋសភា ដើម្បីឆ្លើយតបនឹងការចោទប្រកាន់របស់លោក អ៊ុំ សំអាន។
លោក ហ៊ុន សែន បានចាត់ទុកការចោទប្រកាន់របស់លោក អ៊ុំ សំអាន ថា ជារឿងដដែលៗ និងធ្វើឲ្យខូចខាតប្រយោជន៍របស់ប្រទេសជាតិ។ លិខិតរបស់ខ្លួនផ្ញើទៅលោក ហេង សំរិន ឲ្យប្រាប់ទៅលោក អ៊ុំ សំអាន នៅថ្ងៃទី ១២ ខែមិថុនា លោក ហ៊ុន សែន បញ្ជាក់ដូច្នេះថា៖« ការលើកឡើងរបស់លោក អ៊ុំ សំអាន ថា វៀតណាមបានរំកិលព្រំដែនចូលក្នុងទឹកដីកម្ពុជា ប្រមាណ ១២៧០ ពីព្រែកវិញតេ នៅច្រកភ្នំដិន នាពេលនេះ ពុំមានអ្វីថ្មីនោះទេ ព្រោះថា ការលើកឡើងនេះ កើតឡើងតាំងពីឆ្នាំ ២០០៥ មកម្លេះ ដែលកាលនោះ និស្សិត អ៊ុំ សំអាន បានកាន់ក្បាលមេក្រូស្រែកចោទប្រកាន់ធ្ងន់ៗថា រាជរដ្ឋាភិបាលលោក ហ៊ុន សែន លក់ដីព្រែកវិញតេឲ្យយួន» ។ លោក ហ៊ុន សែន បន្ថែមថា ពេលដែលលោក អ៊ុំ សំអាន ចោទប្រកាន់រដ្ឋាភិបាលកាលខ្លួនជានិស្សិតនោះ លោក សុខ អាន បានឆ្លើយបំភ្លឺសព្វគ្រប់អស់ហើយ ទៅនឹងការចោទប្រកាន់ទាំងនោះ នៅក្នុងបទអន្តរាគមន៍នៅរដ្ឋសភា នាថ្ងៃទី ១១ ខែ១០ ឆ្នាំ ២០០៥ ។ ពេលនោះ លោក សុខ អាន បានចាត់ទុកទង្វើនិស្សិត អ៊ុំ សំអាន ថា រៀបចំផែនការប្រើប្រាស់បញ្ហាព្រំដែន ដើម្បីបង្កចលាចលតែប៉ុណ្ណោះ។
កាលពីថ្ងៃទី ២៧ ខែឧសភា កន្លងទៅ លោក អ៊ុំ សំអាន តំណាងរាស្ត្រគណបក្សសង្គ្រោះជាតិ បានផ្ញើលិខិតទៅលោក ហ៊ុន សែន ឲ្យបំភ្លឺស្តីពី ករណីរំកិលព្រំដែនប្រមាណ ១២៧០ ម៉ែត្រ ចូលក្នុងទឹកដីកម្ពុជានៅច្រកព្រំដែន កម្ពុជា-វៀតណាម ភ្នំដិន ។ លិខិតនោះ លោក សំអាន បានអះអាងថា ខ្លួនបានទៅមើលតំបន់ព្រំដែននៅច្រកព្រំដែនអន្តរជាតិកម្ពុជា-វៀតណាម ភ្នំដិន ស្ថិតនៅក្នុងស្រុកគិរីវង់ ខេត្តតាកែវ ហើយបានពិនិត្យឃើញថា វៀតណាម បានរំកិលព្រំដែនចូលទឹកដីកម្ពុជា ប្រមាណ ១២៧០ ម៉ែត្រ ដោយគិតពីព្រំដែនចាស់នៅព្រែកវិញតេ (ព្រែកក្របៅ) មកប្រឡាយ ៧៩ ដែលវៀតណាមជីកក្នុងឆ្នាំ១៩៧៩ ។ ការលើកឡើងរបស់លោកបែបនេះ ក៏ផ្អែកតាមរបាយការណ៍របស់លោក កែ គឹមយ៉ាន កាលនៅជាអគ្គមេបញ្ជាការកងយោធពលខេមរភូមិន្ទ ឆ្នាំ ១៩៩៩ ។ របាយការណ៍របស់លោក កែ គឹមយ៉ាន បានបញ្ជាក់ថា វៀតណាមបានជីកព្រែកតាមបន្ទាត់ព្រំដែនពីកើតទៅលិច ចូលដីខ្មែរ ១២៧០ ម៉ែត្រ ដោយគិតពីព្រែកវិញតេ។
តែយ៉ាងណាលោក ហ៊ុន សែន បានស្នើឲ្យលោក អ៊ុំ សំអាន សិក្សាឲ្យបានច្បាស់មុននឹងចោទប្រកាន់រដ្ឋាភិបាលរបស់លោក។លិខិតរបស់លោក ហ៊ុន សែន ខាងលើ បរិយាយដូច្នេះថា៖« លោក អ៊ុំ សំអាន ដែលតាំងខ្លួនជាអ្នកជំនាញព្រំដែន ហើយដែលជាអ្នកស្រឡាញ់ជាតិតែម្នាក់ឯងនោះ គួរសិក្សាស្រាវជ្រាវឲ្យបានស៊ីជម្រៅ ត្រឹមត្រូវលើរាល់ចំណុចដែលលើកឡើង ចៀសវាងការយកបញ្ហាព្រំដែនមកបក្សប្រជាប្រិយភាពហួសហេតុ និងរំខានដល់ដំណើរការឆ្ពោះទៅមុខរដ្ឋាភិបាល ក្នុងការធ្វើព្រំដែនជាមួយប្រទេសជិតខាង ដែលនាំឲ្យខូចប្រយោជន៍ជាតិរបស់យើងទាំងអស់គ្នាតែប៉ុណ្ណោះ» ។
No comments:
Post a Comment