ដោយ៖ ស៊ុន ណារិន | ថ្ងៃចន្ទ ទី15 មិថុនា 2015 |
មើលរូបភាពបន្ថែម
លោកដេវីដ ប៊ែកខេម សួរសុខទុក្ខកុមារនៅមណ្ឌលជួយកុមាររងគ្រោះដោយអំពើហិង្សានៅខេត្តសៀមរាប(រូបថតដោយយូនីសេហ្វ)
អតីតតារាបាល់ទាត់ជនជាតិអង់គ្លេស លោក ដេវីដ ប៊ែកខេម(David Beckham) បានមកបំពេញទស្សនកិច្ចនៅកម្ពុជារយៈពេល២ថ្ងៃ ក្នុងនាមជាឯកអគ្គរាជទូតសុច្ឆន្ទៈរបស់អង្គការយូនីសេហ្វ ដោយផ្តោតទៅលើការយកចិត្តទុកដាក់កុមាររងគ្រោះនៅកម្ពុជា។
សេចក្តីប្រកាសព័ត៌មានរបស់យូនីសេហ្វ ផ្សាយនៅថ្ងៃទី១៥ ខែមិថុនានេះ ឲ្យដឹងថាលោក ដេវីដ ប៊ែកខេម ឯកអគ្គរាជទូតសុច្ឆន្ទៈអង្គការយូនីសេហ្វ បានធ្វើដំណើរមកកាន់ប្រទេសកម្ពុជា ក្នុងគោលបំណងស្វែងយល់ពីការងាររបស់អង្គការយូនីសេហ្វ និងដៃគូ ដែលកំពុងជួយគាំទ្រដល់កុមាររងគ្រោះពីការរំលោភបំពានលើរាងកាយ ផ្លូវភេទ និងផ្លូវចិត្ត និងកុមារដែលងាយរងគ្រោះពីសំណាក់គ្រោះថ្នាក់ផ្សេងៗទៀត។ សេចក្តីប្រកាសព័ត៌មានបន្តថា នៅដើមឆ្នាំ២០១៥នេះ គឺជាទិវាខួបលើកទី១០របស់លោក ដេវីដ ប៊ែកខេម ដែលបានទទួលភារកិច្ចជាឯកអគ្គរាជទូតសុច្ឆន្ទៈអង្គការយូនីសេហ្វ ហើយរូបលោករួមទាំងអង្គការបានបង្កើតនូវមូលនិធិមួយដែលមានឈ្មោះថា“លេខ៧ - មូលនិធិដេវីដ ប៊ែកខេម និងយូនីសេហ្វ” ដើម្បីជួយការពារកុមារពីគ្រោះថ្នាក់។
សេចក្តីប្រកាសព័ត៌មានបញ្ជាក់ថា«លោក ដេវីដ បានប្តេជ្ញាចិត្តប្រើនូវសំឡេង ឥទ្ធិពល និងទំនាក់ទំនងដ៏មានកិត្យានុភាពរបស់លោក ដើម្បីប្រមូលនូវថវិកា និងជំរុញមេដឹកនាំពិភពលោក ឲ្យធ្វើការផ្លាស់ប្តូរប្រកបដោយភាពវិជ្ជមានយូរអង្វែងសម្រាប់កុមារ» ។ សេចក្តីប្រកាសឲ្យដឹងទៀតថាមូលនិធិនេះនឹងគាំទ្រដល់អង្គការយូនីសេហ្វ ឲ្យអនុវត្តនូវកម្មវិធីអភិវឌ្ឍន៍ជីវិតកុមារនៅទូទាំងពិភពលោក រួមទាំងកុមាររងគ្រោះដោយអំពើហិង្សានៅក្នុងប្រទេសកម្ពុជាផងដែរ។
នៅក្នុងសេចក្តីប្រកាសព័ត៌មាន លោក ដេវីដ ប៊ែកខេម មានប្រសាសន៍ថា«ខ្ញុំមកកាន់ប្រទេសកម្ពុជា ដើម្បីជួបកុមាររងគ្រោះពីអំពើហិង្សា ស្តាប់នូវរឿងរ៉ាវរបស់ពួកគេ និងស្វែងយល់ពីការងាររបស់អង្គការយូនីសេហ្វ និងដៃគូ ក្នុងការជួយកុមារទាំងនោះឲ្យមានសុវត្ថិភាព។ សម្រាប់ខ្ញុំ វាតក់ស្លុតណាស់ ដែលមានកុមារម្នាក់នៅររៀងរាល់ប្រាំនាទី បានស្លាប់ដោយសារអំពើហិង្សា នៅកន្លែងណាមួយនៅក្នុងពិភពលោក»។
ប្រធានស្តីទីផ្នែកទំនាក់ទំនងរបស់អង្គការយូនីសេហ្វ លោកស្រី អ៊ីម៉ាន ម៉ូរូខា(Iman Morooka) ប្រាប់VODថាលោកដេវីដ ប៊ែកខេម នឹងចាកចេញពីកម្ពុជានៅថ្ងៃនេះ ក្រោយពីបានបំពេញទស្សនកិច្ច២ថ្ងៃ។ លោកស្រីបន្តថាលោកដេវីដ ប៊ែកខេម បានធ្វើទស្សនកិច្ចនៅមណ្ឌលជួយកុមាររងគ្រោះដោយអំពើហិង្សាពីរបីនៅខេត្តសៀមរាប ដែលគាំទ្រដោយអង្គការយូនីសេហ្វ៕
សរសេរមកកាន់លោក ស៊ុន ណារិន តាមរយៈsun_narin@vodhotnews.com
No comments:
Post a Comment