លោក ដាវីត ប៊េកខេម កំពុងជជែកលេងជាមួយកុមារកំព្រាកម្ពុជា។ រូបថត យូនីសេហ្វ
សៀមរាបៈ កីឡាករបាល់ទាត់ដ៏ល្បីល្បាញ និងចូលនិវត្តន៍របសអង់គ្លេស លោក ដាវីត ប៊េកខេម បានឡើងយន្តហោះចាកចេញពីទឹកដីប្រាសាទអង្គរនៅរសៀលម៉ោង ៣ រសៀលថ្ងៃចន្ទទី១៥ ខែមិថុនាឆ្នាំ២០១៥នេះហើយ បន្ទាប់ពីបានមកដល់ខេត្តសៀមរាបនាល្ងាចថ្ងៃអាទិត្យទី១៤ ខែមិថុនាដោយបានស្នាក់នៅសណ្ឋាគារ Amansra Hotel មួយរាត្រី និងបានទៅទទួលទានអាហារខ្មែរភោជណីយដ្ឋានខ្មែរ ច័ន្ទរីទ្រី និងបានបន្សល់នូវអំពើល្អមួយក្នុងសកម្មភាពមនុស្សធម៌លើទឹកដីអង្គរនេះ ជាមួយនឹងអង្គការយូនីសេហ្វ (Unicef) ដែលបានធ្វើឲ្យអ្នកគាំទ្រជាច្រើនបានសម្តែងការភ្ញាក់ផ្អើលពីវត្តមានរបស់លោកផងដែរ។
លោក ដាវីត ប៊េកខេម ដែលជាឯកអគ្គរដ្ឋទូតសុឆន្ទៈ របស់អង្គការ យូនីសេហ្វជាង ១០ឆ្នាំមកនេះ បានមកទស្សនាតំបន់ប្រាង្គប្រាសាទអង្គរ ដែលជាបិតកភណ្ឌពិភពលោកនៃអង្គការយូណេស្កូស្ថិតនៅលើទឹកដីខេត្តសៀមរាបនៃប្រទេសកម្ពុជា បន្ទាប់ពីតារាបាល់ទាត់ចូលនិវត្តន៍ដ៏ល្បីឈ្មោះរបស់អង់គ្លេសរូបនេះ បានចាកចេញពីទីក្រុងម៉ាកាវប្រទេសចិនក្នុងពិធីសម្ពោធហាងសម្លៀកបំពាក់ H & M នាថ្ងៃសៅរ៍ ទី ១៣ ខែមិថុនាឆ្នាំ ២០១៥ រួចមកនោះ។
លោក បេកខាំ បានបង្ហាញពីអារម្មណ៍រីករាយរបស់ខ្លួនពេលទស្សនាអង្គរវត្តតាមរយៈអ៊ីនស្តាក្រាមរបស់លោកថា៖ «នេះជាថ្ងៃដ៏អស្ចារ្យនៅកម្ពុជា ព្រោះបានមកដល់តំបន់ប្រាង្គប្រាសាទអង្គរវត្ត ដែលជាទីកន្លែងមួយក្នុងចំណោមកន្លែងដ៏ស្រស់ស្អាតបំផុតនៅលើពិភពលោក»។
រូបភាពថតមុខអង្គរវត្ត ដែល ដាវីត បេកខាំ បានបង្ហោះនោះមានអ្នកចុច «Like» ជាង ៦ សែននាក់តែត្រឹមរយៈប៉ុន្មានម៉ោងក្រោយមក៕
លោកដាវីត ប៊េកខេម ជួយបោកខោអាវក្មេងៗ។ រូបថត យូនីសេហ្វ
No comments:
Post a Comment