ក្រោយមរណភាពរបស់សម្តេចអគ្គមហាធម្មពោធិសាល កិត្តិព្រឹទ្ធបណ្ឌិត ជា ស៊ីម ប្រធានគណបក្សប្រជាជនកម្ពុជា និងជាប្រធានព្រឹទ្ធសភានៃព្រះរាជាណាចក្រកម្ពុជានីតិកាលទី៣ គឺទីប្រឹក្សា និងជំនួយការរបស់សពមេបក្សកាន់អំណាចរូបនេះចំនួន៣៤៣នាក់ នឹងប្រឈមការរំសាយ ឬវិលទៅកាន់មុខតំណែងដើមរៀងៗខ្លួនវិញ ប្រសិនបើមិនមានការតែងតាំងបន្តសាជាថ្មីណាមួយទេនោះ។
ពេលកាន់កាប់មុខតំណែងជាអតីតប្រធានព្រឹទ្ធសភានៃព្រះរាជាណាចក្រកម្ពុជានីតិកាលទី៣ សម្តេចអគ្គមហាធម្មពោធិសាល កិត្តិព្រឹទ្ធបណ្ឌិត ជា ស៊ីម មានទីប្រឹក្សា និងជំនួយការផ្ទាល់ខ្លួនរហូតដល់ទៅចំនួន៣៤៣នាក់ ក្នុងនោះមានឋានៈស្មើទេសរដ្ឋមន្ត្រី ចំនួន០៣នាក់, ឋានៈស្មើរដ្ឋមន្ត្រី ចំនួន៣៨នាក់, ឋានៈស្មើរដ្ឋលេខាធិការ ចំនួន២០៩នាក់, ឋានៈស្មើអនុរដ្ឋលេខាធិការ ចំនួន៥២នាក់ និងឋានៈស្មើអគ្គនាយក ចំនួន៤១នាក់ បើគិតត្រឹមខែឧសភា ឆ្នាំ២០១៥កន្លងទៅ ។
យោងតាមស្មារតីអនុក្រឹត្យរបស់រាជរដ្ឋាភិបាល មានសម្តេចអគ្គមហាសេនាបតីតេជោ បណ្ឌិតសភាចារ្យ ហ៊ុន សែន ហៅបុរសខ្លាំងជាប្រមុខ លេខ២៧៧អនក្រ.បក ចុះថ្ងៃទី១៣ ខែតុលា ឆ្នាំ២០១៤ ស្តីពីការកែសម្រួលមាត្រា២នៃអនុក្រឹត្យលេខ៦២អនក្រ.បក ចុះថ្ងៃទី៣០ ខែកញ្ញា ឆ្នាំ២០០៤ ស្តីពីប្រាក់បំណាច់របស់សមាជិករាជរដ្ឋាភិបាល អនុរដ្ឋលេខាធិការ ទីប្រឹក្សា ព្រមទាំងមន្ត្រីរាជការស៊ីវិល និងកងកម្លាំងប្រដាប់អាវុធ ចាប់ពីថ្នាក់អនុរដ្ឋលេខាធិការឡើងទៅនោះ គឺក្នុងចំណោមទីប្រឹក្សា និងជំនួយការរបស់សម្តេចអគ្គមហាធម្មពោធិសាល កិត្តិព្រឹទ្ធបណ្ឌិត ជា ស៊ីម អតីតប្រធានព្រឹទ្ធសភានីតិកាលទី៣ទាំង៣៤៣នាក់ ត្រូវចំណាយថវិកាជាតិយ៉ាងហោចណាស់អស់ចំនួន៥៦៦.៧០០.០០០រៀល ឬប្រមាណ១៤១.៦៧៥ដុល្លារអាមេរិកក្នុង១ខែ ។
ទោះយ៉ាងណា គេមិនទាន់អាចដឹងបានថា ទីប្រឹក្សា និងជំនួយការដ៏ច្រើនសន្ធឹករបស់មេបក្សកាន់អំណាចនោះ នឹងត្រូវតែងតាំងបន្តសាជាថ្មីសម្រាប់ប្រធានបក្សថ្មី ឬសម្រាប់ប្រធានព្រឹទ្ធសភាថ្មីនៅឡើយទេ ខណៈកងកម្លាំងឯកភាពអង្គរក្សរបស់អតីតប្រធានព្រឹទ្ធសភា ដែលមានឯកឧត្តម ឧត្តមសេនីយ៍ឯក យឹម លាង នាយទាហានជាន់ខ្ពស់នៃកងយោធពលខេមរភូមិន្ទ អត្តលេខ០០៥១៨២ ជាមេបញ្ជាការ និងជាទីប្រឹក្សា ព្រមទាំងជានាយករងខុទ្ទកាល័យអតីតប្រធានព្រឹទ្ធសភាផងនោះ ក៏ត្រូវប្រឈមនឹងការរំសាយដែរ ៕
No comments:
Post a Comment