(ចុះផ្សាយនៅថ្ងៃ 15-06-2015, 8:39 pm) | ដោយ : ធឿន បញ្ញាឬទិ្ធ
ក្រសួងមហាផ្ទៃ ព្រមានលោក Brad Adamsនាយកអង្គការ Human Rights Watchប្រចាំតំបន់អាស៊ីថា មិនគួរឈានជើងចូលប្រទេសកម្ពុជាទៀតនោះទេ បើសិនជានាយកអង្គការមួយនេះ នៅតែបន្ដជំហររិះគន់រដ្ឋាភិបាល ដោយនិន្នាការមិនអព្យាក្រឹត្យ ដែលធ្វើប៉ះពាល់ដល់ប្រទេសកម្ពុជា។ ការព្រមានរបស់ក្រសួងមហាផ្ទៃនេះ ធ្វើឡើងក្រោយពេលដែលលោក Brad Adams បានចេញអត្ថបទមានចំណងជើងថា ការស្លាប់របស់លោក ជា ស៊ីម ជាការបរាជ័យនៃតុលាការខ្មែរក្រហម «Cambodia Chea Sim Death Shows Failings of Khmer Rouge Court»។
សេចក្ដីថ្លែងការណ៍ របស់ក្រសួងមហាផ្ទៃចុះថ្ងៃទី ១៤ មិថុនា ចោទប្រកាន់ថា អត្ថបទរបស់លោក Brad Adamsនេះត្រូវបានរៀបចំគ្រោងទុកជាមុន ក្នុងចេតនាមួលបង្កាច់ និង បង្កប់នូវគំនុំគុំគួនមកលើលោក ជា ស៊ីម ថ្នាក់ដឹកនៃកំពូលនៃប្រទេសកម្ពុជា។ អ្នកនាំពាក្យក្រសួងមហាផ្ទៃ លោក ខៀវ សុភ័គ ថា លោកBrad Adams មិនមានឱកាសបានរស់នៅឆ្លងកាត់បទពិសោធន៍ ជូរចត់ក្នុងរបបខ្មែរក្រហម ។ ការមិនធ្លាប់បានស្គាល់នូវរស់ជាតិនៃរបបខ្មែរក្រហមធ្វើឲ្យលោកនាយក អង្គការសិទ្ធិមនុស្សរូបនេះ មិនបានដឹងនូវការពិត ហើយថែមទាំងធ្វើការវិភាគ និងវាយតម្លៃបែប មនុស្សមានភ្នែកតែគ្មានប្រស្រីឬបែប មនុស្សភ្នែកភ្លឺតែធ្វើជាខ្វាក់។
លោក ខៀវ សុភ័គ បន្ថែមថា ការលើកឡើងរបស់លោក Brad Adams ចំពោះមរណភាពរបស់លោក ជា ស៊ីម ជាការចោទប្រកាន់ដែលគ្មានសតិសម្បជញ្ញៈ និងជាការប្រមាថចំពោះថ្នាក់ដឹកនាំកំពូល នៃប្រទេសកម្ពុជា ។អ្នកនាំពាក្យក្រសួងមហាផ្ទៃរូបនេះ ក៏បានព្រមានយ៉ាងដូច្នេះថា៖« សម្រាប់ពេលអនាគត ប្រសិនបើលោកនាយកនៅតែប្រកាន់ជំហរ និងទស្សនៈប្រកបដោយ និន្នាការមិនអព្យាក្រឹត ដែលធ្វើឲ្យប៉ះពាល់ដល់សង្គមកម្ពុជាបែបនេះតទៅទៀត ខ្ញុំយល់ថា លោកមិនគួរឈានជើងចូលមកកាន់ព្រះរាជាណាចក្រកម្ពុជាទៀតទេ »។
សេចក្ដីថ្លែងការណ៍ ក្រសួងមហាផ្ទៃ បញ្ជាក់ថា លោក ជា ស៊ីម គ្រាន់តែជាមន្ត្រីមូលដ្ឋានមួយរូប នៃរបបកម្ពុជាប្រជាធិបតេយ្យ ហើយលោកមិនមែនជាមេដឹកនាំជាន់ខ្ពស់ ឬជាអ្នកទទួលខុសត្រូវខ្ពស់បំផុតនៅក្នុងរបបនោះទេ ។ លើសពីនេះលោក ជា ស៊ីម និងក្រុមគ្រួសារក៏ជាជនរងគ្រោះ ដូចប្រជាពលរដ្ឋរាប់លាននាក់ដទៃទៀត នៅក្នុងរបបនេះដែរ ។
គួរ បញ្ជាក់ថា ការព្រមានរបស់ក្រសួងមហាផ្ទៃ ចំពោះការលើកឡើងរបស់លោក Brad Adams នេះ គឺដោយសារនាយកអង្គការសិទ្ធិមនុស្សមួយនេះ បានចេញអត្ថបទកាលពីថ្ងៃទី៩ ខែមិថុនា មានចំណងជើងថា ការស្លាប់របស់លោក ជា ស៊ីម ជាការបរាជ័យនៃតុលាការខ្មែរក្រហម។ក្នុងអត្ថបទរបស់អង្គការឃ្លាំមើល សិទ្ធិមនុស្សអន្តរជាតិ (Human Right Watch ) នេះបានសរសេរថាលោក ជា ស៊ីម គឺជាអតីតកម្មាភិបាលខ្មែរក្រហមមួយរូប ដែលមិនទាន់បានស៊ើបអង្កេតពីបទឧក្រិដ្ឋអន្តរជាតិធ្ងន់ធ្ងរ ចោទប្រកាន់ពីបទប្រល័យពូជសាសន៍ និងឧក្រិដ្ឋកម្មប្រឆាំងមនុស្សជាតិ នៅក្នុងរបបខ្មែរក្រហម៕
No comments:
Post a Comment