ដោយ៖ ណុល ដារ៉ា | ថ្ងៃអាទិត្យ ទី14 មិថុនា 2015,
ស្ថានទូតវៀតណាម ប្រចាំនៅកម្ពុជា
ក្រសួងការបរទេសកម្ពុជា នៅថ្ងៃអាទិត្យនេះ បានចេញកំណត់ទូតលើកទី២ទៅស្ថានទូតវៀតណាមប្រចាំកម្ពុជា បញ្ជាក់ថា កម្ពុជាបានរកឃើញមានស្រះទឹកបីបន្ថែមទៀត ដែលវៀតណាមបានជីកក្នុងទឹកដីកម្ពុជា និងសំណូមពរឲ្យរដ្ឋាភិបាលវៀតណាមគោរពបន្ទាត់ព្រំដែនតាមផែនទីខ្នាត ១/១០០០០០ ។
កំណត់ទូតរបស់ក្រសួងការបរទេសកម្ពុជា ចុះលេខ ១៣៨៨ ចេញថ្ងៃអាទិត្យ ទី១៤ ខែមិថុនា នេះបញ្ជាក់ថា ក្រុមបច្ចេកទេសគណៈកម្មាធិការព្រំដែនកម្ពុជា និងអាជ្ញាធរខេត្តរតនគិរីបានរកឃើញស្រះចំនួន៣បន្ថែមទៀតនៅក្នុងព្រៃជ្រៅ ដែលវៀតណាមបានជីកចន្លោះបង្គោលព្រំដែនលេខ ៣០ និង៤០ ក្នុងភូមិឡំ ឃុំប៉ក់ញ៉ៃ ស្រុកអូរយ៉ាដាវ ខេត្តរតនគិរី ដែលកន្លែងនោះមិនទាន់បានកំណត់ព្រំដែនច្បាស់លាស់នៅឡើយ ។
កំណត់ទូតដដែលបញ្ជាក់ថា ផ្អែកលើផែនទីខ្នាត១/១០០០០០ ស្រះទឹកទាំងបីនោះបានជីកចូលក្នុងបូរណភាពទឹកដីកម្ពុជាយ៉ាងជ្រៅ ។ កំណត់ទូតបញ្ជាក់ថា ស្រះទឹកទី១មានទំហំ ១២ម៉ែត្រ គុណនឹង១៨ម៉ែត្រ មានកូអ័រដោណេ E775587, N1516394 មានចម្ងាយប្រហែល៣១៥ ម៉ែត្រពីខ្សែបន្ទាត់ព្រំដែន ។ ស្រះទឹកទី២ មានទំហំ ១៤,៥ម៉ែត្រ គុណនឹង ១៧ម៉ែត្រ មានកូអ័រដោណេ E775648, N1515857 មានចម្ងាយប្រហែល៤២៥ម៉ែត្រពីខ្សែបន្ទាត់ព្រំដែន ។ ស្រះទឹកទី៣ មានទំហំ ១០ម៉ែត្រ គុណនឹង ២៤,៥ម៉ែត្រ មានកូអ័រដោណេ E775744, N1515661 មានចម្ងាយប្រហែល៣៩០ម៉ែត្រពីខ្សែបន្ទាត់ព្រំដែន ។
ក្រសួងការបរទេសកម្ពុជាបញ្ជាក់ថា ខណៈព្រំដែននៅតំបន់នោះមិនទាន់បានបោះបង្គោលច្បាស់លាស់នៅឡើយ កម្ពុជាទាមទារឲ្យវៀតណាមគោរពបន្ទាត់ព្រំដែនតាមផែនទីខ្នាត១/១០០០០០ ដែលមូលដ្ឋាននៃសន្ធិសញ្ញាកំណត់ព្រំដែនជាតិ ដែលបានចុះហត្ថលេខាកាលពីថ្ងៃទី២៧ ខែធ្នូ ឆ្នាំ១៩៨៥ និងសន្ធិសញ្ញាបំពេញបន្ថែមដែលបានចុះហត្ថលេខានៅថ្ងៃទី១០ ខែតុលា ឆ្នាំ២០០៥ សម្រាប់ការកំណត់ព្រំដែនគោករវាងប្រទេសវៀតណាម និងកម្ពុជា ។
កំណត់ទូតបន្ថែមថា រដ្ឋាភិបាលកម្ពុជាសូមស្នើឲ្យរដ្ឋាភិបាលវៀតណាមគោរពតាមចំណុចទី៨ នៃសេចក្ដីថ្លែងការណ៍រួមរវាងកម្ពុជា-វៀតណាម ដែលបានធ្វើនៅថ្ងៃទី១៧ ខែមករា ឆ្នាំ១៩៩៥ ។
សូមជម្រាបថា កាលពីថ្ងៃទី១២ ខែមិថុនា ថ្មីៗនេះ ក្រសួងការបរទេសកម្ពុជា បានចេញកំណត់ទូតទៅស្ថានទូតវៀតណាមអំពីការរកឃើញថា វៀតណាមបានជីកស្រះទឹកចំនួន៥ ក្នុងភូមិឡំ ឃុំប៉ក់ញ៉ៃ ស្រុកអូរយ៉ាដាវ ខេត្តរតនគិរីរួចម្ដងមកហើយ ៕
សូមសរសេរមកលោក ណុល ដារ៉ា តាមរយៈ dara@vodhotnews.com
No comments:
Post a Comment