គណបក្សសង្គ្រោះជាតិទៅពិនិត្យស្រះដែលវៀតណាមចូលមកជីកក្នុងខេត្តរតនគិរី។ រូបថត អាដហុក
ភ្នំពេញៈ ជាថ្មីម្តងទៀតរាជរដ្ឋាភិបាលកម្ពុជាបានស្នើឲ្យរដ្ឋាភិបាលវៀតណាមត្រូវតែបញ្ឈប់ជាបន្ទាន់នូវការជីកដី ដើម្បីចាក់គ្រឹះសាងសង់ប៉ុស្តិ៍យោធានៅជិតភូមិព្រែកស្បូវ ឃុំសំពៅពូន ស្រុកកោះធំ ខេត្តកណ្តាល ខណៈដែលវៀតណាមនៅតែស្ងៀមស្ងាត់មិនទាន់ឆ្លើយតបចំពោះសំណើសុំឲ្យលុបស្រះដែលបានជីកក្នុងទឹកដីកម្ពុជានៅខេត្តរតនគិរី។
ក្នុងកំណត់ទូតមួយទៀតដែលបានផ្ញើទៅស្ថានទូតវៀតណាម នៅភ្នំពេញ កាលពីម្សិលមិញ ក្រសួងការបរទេសកម្ពុជាបានប្រាប់ស្ថានទូតវៀតណាមអំពីកំណត់ទូតចុះថ្ងៃទី ៨ ខែមិថុនាឆ្នាំ ២០១៥ ដោយស្នើឲ្យរដ្ឋាភិបាលវៀតណាមបញ្ឈប់ភ្លាមនូវការជីកដីដើម្បីចាក់គ្រឹះសាងសង់ប៉ុស្តិ៍យោធាមួយនៅនិយាម WT-06065-07703 ជិតភូមិព្រែកស្បូវ ឃុំសំពៅពូន ស្រុកកោះធំ ខេត្តកណ្តាល។
កំណត់ទូតរបស់ក្រសួងការបរទេសបានសរសេរថា៖ «ក្នុងអំឡុងកិច្ចប្រជុំគណៈកម្មការព្រំដែនចម្រុះរបស់ប្រទេសទាំងពីរនៅក្រុងហាណូយកាលពីថ្ងៃទី ២៤ ខែមេសា ឆ្នាំ ២០១៥ ភាគីកម្ពុជាបានស្នើភាគីវៀតណាមឲ្យបញ្ឈប់ការសាងសង់នេះ»។
ក្រសួងការបរទេសបានប្រាប់ភាគីវៀតណាមថា អាជ្ញាធរកម្ពុជានៅខេត្តកណ្តាលបានស្នើឲ្យអាជ្ញាធរវៀតណាម ខេត្តអានយ៉ាង ចាប់តាំងពីថ្ងៃទី ២១ ខែមេសា និងទី ០៩ ខែមិថុនា ឆ្នាំ ២០១៥ ឲ្យបញ្ឈប់សកម្មភាពទាំងនេះ។
កំណត់ទូតបានបន្តថា៖ «ប៉ុន្តែអាជ្ញាធរវៀតណាមខេត្តអានយ៉ាង នៅតែបន្តសាងសង់ប៉ុស្តិ៍ក្នុងទ្រង់ទ្រាយធំជាងមុន»។
កំណត់ទូតបានបន្ថែមថា៖ «អាស្រ័យហេតុនេះរាជរដ្ឋាភិបាលកម្ពុជាស្នើសុំសាជាថ្មីចំពោះរដ្ឋាភិបាលសាធារណរដ្ឋសង្គមនិយមវៀតណាមឲ្យបញ្ឈប់ជាបន្ទាន់នូវសកម្មភាពទាំងនេះរហូតទាល់តែគណៈកម្មការព្រំដែនចម្រុះព្រំដែននៃប្រទេសទាំងពីរបានបោះបង្គោលព្រំដែនក្នុងតំបន់នេះចប់ជាស្ថាពរ»។
ទន្ទឹមនឹងនេះ លោក កឹម សុខា អនុប្រធានគណបក្សសង្គ្រោះជាតិក្នុងកិច្ចពិភាក្សាតុមូលនៅវិទ្យុសំឡេងប្រជាធិបតេយ្យ VOD កាលពីម្សិលមិញបានជំរុញឲ្យរដ្ឋាភិបាលដាក់ពាក្យបណ្តឹងទៅតុលាការយុតិ្តធម៌អន្ដរជាតិនៅពេលដែលកំណត់ទូតកម្ពុជាបានផ្ញើទៅវៀតណាមនៅតែមិនមានប្រសិទ្ធភាពដោយលោកបានអំពាវនាវឲ្យខ្មែរទាំងអស់គ្រប់និន្នាការនយោបាយផ្តោតលើបញ្ហាព្រំដែនទាំងអស់គ្នា ដើម្បីដោះស្រាយបញ្ហាព្រំដែនជាមួយនឹងវៀតណាម។
លោក សុខា ថ្លែងថា៖ «ខ្ញុំឮថាកំណត់ទូតចាប់តាំងពីឆ្នាំ ២០១៣ ដល់ ២០១៥ នៅតែជាកំណត់ទូតដដែលហើយបញ្ហាឈ្លានពាននៅតែមានដដែល។ ប្រសិនបើមិនមានប្រសិទ្ធភាពបែបនេះ តើយើងត្រូវធ្វើអ្វីថែមទៀតទៅ? ប្រសិនបើមិនមានប្រសិទ្ធភាពយើងត្រូវតែចាត់វិធានការមួយទៀត ដើម្បីដោះស្រាយ។ រដ្ឋាភិបាលក៏ធ្លាប់បានធ្វើជាមួយភាគីថៃដែរ ហើយប្រសិនបើមិនមានប្រសិទ្ធភាពរាជរដ្ឋាភិបាលត្រូវចាត់វិធានការមួយទៀតរហូតដល់ដាក់ពាក្យបណ្តឹងទៅតុលាការអន្តរជាតិ។ ដូច្នេះបញ្ហានេះបើសិនជាមិនមានប្រសិទ្ធភាពរាជរដ្ឋាភិបាលត្រូវតែបង្ហាញពីជំហររបស់ខ្លួនថាត្រូវធ្វើអ្វីថែមទៀត»។
លោក យ៉ែម បុញ្ញឫទ្ធិ អ្នកនាំពាក្យគណបក្សសង្គ្រោះជាតិបានថ្លែងកាលពីម្សិលមិញថា លោក សម រង្ស៊ី ប្រធានគណបក្សសង្គ្រោះជាតិ និងលោក កឹម សុខា អនុប្រធានបានជួបប្រជុំជាមួយនឹងសមាជិករដ្ឋសភារបស់គណបក្សដើម្បីពិភាក្សាពីបញ្ហាព្រំដែនដែលកំពុងតែឡើងកម្ដៅនេះដោយស្នើរដ្ឋាភិបាលផ្អាកការបោះបង្គោលព្រំដែនជាមួយប្រទេសវៀតណាមហើយថា លោក សម រង្ស៊ី ប្រហែលជានិយាយជាមួយនឹងលោកនាយករដ្ឋមន្រ្តី ហ៊ុន សែន លើបញ្ហាព្រំដែននៅក្នុងខែនេះ។
លោក បុញ្ញឫទ្ធិ បន្តថា៖ «ជាគោលការណ៍យើងបានស្នើសុំ [រដ្ឋាភិបាល] ពន្យារពេល [ការបោះបង្គោលព្រំដែន] រង់ចាំគណៈកម្មការអ្នកជំនាញវាស់តាមផែនទីត្រឹមត្រូវ»។
លោកបានបន្ថែមថា គណបក្សសង្គ្រោះជាតិបានទទួលស្គាល់សមាជិករដ្ឋសភាដែលកំពុងធ្វើការលើបញ្ហាព្រំដែនកន្លងមកដោយលោកបានបន្តថា លោក សម រង្ស៊ី នឹងប្រើវប្បធម៌សន្ទនា ដើម្បីពិភាក្សាជាមួយលោកនាយករដ្ឋមន្រ្តី ហ៊ុន សែន នៅពេលសមស្របណាមួយ។
ស្ថានទូតវៀតណាម ប្រចាំកម្ពុជាមិនអាចទាក់ទងសុំការអត្ថាធិប្បាយបានទេកាលពីម្សិលមិញ ខណៈដែលរដ្ឋាភិបាលវៀតណាមនៅតែមិនទាន់ឆ្លើយតបចំពោះកំណត់ទូតរបស់ក្រសួងការបរទេសកម្ពុជាពាក់ព័ន្ធនឹងករណីដែលវៀតណាមចូលមកជីកស្រះជាបន្តបន្ទាប់យ៉ាងហោចណាស់ចំនួន ៩ នៅក្នុងខេត្តរតនគិរីនាពេលថ្មីៗនេះ៕ TK
1 comment:
Did Khmer government authority have an international right to summon Vietnam ambassador to protest them about this incursion on the border matter? Why they not do that ? Why they need to send the protest by mail ? Did all of this is a trick to fake Khmer and yank away their boiling sentiment of border affair? This scheme of a delay tactic to appease Khmer anger is a professional tactic use by Yuon in Khmer political affair for 30 years, it's enough .
Post a Comment