2015-06-05
 |
| ពលរដ្ឋចូលរួមក្នុងវេទិកាប្រឆាំងអំពើពុករលួយ និងនិទ្ទណ្ឌភាព ឡើងមានមតិ និងនាំយកឯកសារពីការរំលោភដីធ្លីពីសំណាក់អាជ្ញាធរ ដើម្បីឲ្យក្នុងអង្គពិធីដោះស្រាយ នាសួននាគសន្តិភាព ក្រុងបាត់ដំបង ខេត្តបាត់ដំបង កាលពីព្រឹកថ្ងៃទី៥ មិថុនា ឆ្នាំ២០១៥។
RFA/Hum Chamroeun
|
គណៈកម្មការកម្ពុជាឯករាជ្យប្រឆាំងអំពើពុករលួយ ធ្វើវេទិកាសាធារណៈមួយអំពីការប្រយុទ្ធប្រឆាំងអំពើពុករលួយ និងវប្បធម៌និទ្ទណ្ឌភាព ដែលមានប្រជាពលរដ្ឋចូលរួមប្រមាណ ២០០នាក់ នៅសួននាគសន្តិភាព ក្រុងបាត់ដំបង ខេត្តបាត់ដំបង កាលពីព្រឹកថ្ងៃទី៥ ខែមិថុនា។
ប្រធានគណៈកម្មការកម្ពុជាឯករាជប្រឆាំងអំពើពុករលួយ អ្នកស្រី ម៉ក់ ស៊ីថា មានប្រសាសន៍ទៅកាន់អ្នកសារព័ត៌មាននៅក្នុងវេទិកានោះថា វេទិកានេះធ្វើឡើងក្នុងគោលបំណងដើម្បីសិក្សាស្រាវជ្រាវករណីជម្លោះដីធ្លី និងរឿងព្រហ្មទណ្ឌ ដែលពាក់ព័ន្ធទៅនឹងនិទ្ទណ្ឌភាព និងការប្រព្រឹត្តអំពើពុករលួយនៅតាមបណ្ដាខេត្តចំនួន ៣ រួមមានខេត្តបាត់ដំបង ខេត្តបន្ទាយមានជ័យ និងខេត្តកំពង់ធំ។
អ្នកស្រី ម៉ក់ ស៊ីថា៖ «ការបកស្រាយពីទុក្ខលំបាករបស់ប្រជាពលរដ្ឋនៅព្រឹកមិញនេះ គ្រាន់តែជាលក្ខណៈទូទៅទេ។ ចំពោះមុខករណីដែលយើងរកឃើញនេះ យើងនឹងនាំរឿងរបស់បងប្អូនដាក់ទៅថ្នាក់ជាតិបន្តទៀត»។
ប្រជាពលរដ្ឋដែលចូលរួមក្នុងវេទិកាភាគច្រើន លើកឡើងពីទុក្ខកង្វល់រឿងទំនាស់ដីធ្លីជាបញ្ហាសំខាន់។ ពួកគាត់សង្កត់ធ្ងន់ថា អាជ្ញាធរពាក់ព័ន្ធមិនយកចិត្តទុកដាក់ដោះស្រាយរឿងទំនាស់ដីរបស់ពួកគាត់នោះទេ បណ្ដោយឲ្យឈ្មួញ និងក្រុមអ្នកមានលុយមានអំណាច រំលោភយកដីរបស់ប្រជាពលរដ្ឋតាមអំពើចិត្ត។
ឆ្លើយតបប្រជាពលរដ្ឋក្នុងវេទិកានោះ អភិបាលរងខេត្តបាត់ដំបង លោក ប៊ុត គិមស៊ាន មានប្រសាសន៍បញ្ជាក់ថា កន្លងមកអាជ្ញាធរខេត្តបាត់ដំបង យកចិត្តទុកដាក់ដោះស្រាយបញ្ហាទំនាស់ដីធ្លីរបស់ប្រជាពលរដ្ឋជាប្រចាំ។ លោកអភិបាលរងខេត្តជំរុញឲ្យអាជ្ញាធរពាក់ព័ន្ធចាត់វិធានការទៅលើក្រុមមន្ត្រីខិលខូចប្រព្រឹត្តអំពើពុករលួយ និងអំពើនិទ្ទណ្ឌភាពផ្ដន្ទាទោសតាមច្បាប់។
ប្រជាពលរដ្ឋជាច្រើននាក់បាននាំគ្នាយកឯកសារពាក់ព័ន្ធ និងការរំលោភដីធ្លីពីសំណាក់អ្នកមានលុយ មានអំណាច ដាក់ឲ្យលោកអភិបាលរងខេត្តដោះស្រាយបន្ត។
អ្នករៀបចំកម្មវិធីបញ្ជាក់ថា អ្នកស្រីនឹងតាមដានបញ្ហាទុក្ខលំបាករបស់ប្រជាពលរដ្ឋបន្តទៀត ហើយប្រសិនបើការដោះស្រាយរបស់អាជ្ញាធរនៅតែមិនមានប្រសិទ្ធភាព អ្នកស្រីនឹងនាំរឿងនេះដាក់ទៅអាជ្ញាធរពាក់ព័ន្ធថ្នាក់ជាតិទៀត៕
No comments:
Post a Comment