Wed, 3 June 2015 ppp
 |
| រថយន្តយោធាទាំងនេះ ជាជំនួយរបស់ចិនផ្ដល់ឲ្យកម្ពុជា នាពេលកន្លងមក។ ហេង ជីវ័ន |
ផ្តើមចេញពីភាពខ្លាំងក្លារបស់ខ្លួនលើគ្រប់វិស័យ ជាហេតុធ្វើឲ្យចិនព្យាយាមរក្សាឥទ្ធិពល ក៏ដូចជា អំណាចរបស់ខ្លួន តាមរយៈការអនុវត្តនយោបាយការទូតរបស់ខ្លួន។ «នយោបាយចិនតែមួយ» ជាគោលនយោបាយការបរទេសរបស់ចិន ដែលអនុញ្ញាតឲ្យខ្លួនឈរជើងលើពិភពលោក នាក្នុងសម័យសកលភាវូបនីយកម្មនេះ។
ដូច្នេះអ្វីទៅគឺជានយោបាយចិនតែមួយ? នយោបាយចិនតែមួយ គឺជានយោបាយដែលត្រូវបានបង្កើតឡើងក្នុងឆ្នាំ ១៩៧២ នាទីក្រុងស៊ាងហៃ សាធារណរដ្ឋប្រជាមានិតចិន ស្របពេលដែលមាន តំបន់ពីរ គឺចិនដីគោក និងចិនតៃវ៉ាន់ កំពុងអះអាងថា ខ្លួនជាតំណាងរដ្ឋាភិបាលស្របច្បាប់របស់ចិន។ ក្នុងគោលនយោបាយនោះក៏បានបញ្ជាក់ថា ប្រទេសទាំងឡាយដែលភ្ជាប់ទំនាក់ទំនងការទូតជាមួយសាធារណរដ្ឋប្រជាមានិតចិន ត្រូវតែផ្តាច់ទំនាក់ទំនងជាមួយសាធារណរដ្ឋចិន (Taiwan)។
ដោយសារតែនយោបាយនេះត្រូវបានបង្កើតក្នុងសម័យសង្គ្រាមត្រជាក់ ដូច្នេះវាហាក់បីដូចជាពិបាកឲ្យចិនទទួលបានជោគជ័យក្នុងការអនុវត្តគោលនយោបាយមួយនេះ តែក្រោយពីសង្គ្រាមត្រជាក់ត្រូវបានបញ្ចប់ សេដ្ឋកិច្ចចិនត្រូវបានគេមើលឃើញថា មានកំណើនគួរឲ្យភ្ញាក់ផ្អើល នេះក៏ដោយសារតែការដាក់ចេញនូវនយោបាយសេដ្ឋកិច្ចថ្មីរបស់ តេង ស៊ីវពីង ដែលអនុញ្ញាតឲ្យចិនធ្វើការអភិវឌ្ឍលឿនបែបនេះ។
ចេញពីកំណើនសេដ្ឋកិច្ចដ៏ខ្លាំងក្លារបស់ខ្លួន ជាហេតុធ្វើឲ្យចិនយកនយោបាយខាងលើមកអនុវត្តជាថ្មីម្តងទៀត។ លទ្ធផលគឺចិនទទួលបានជោគជ័យជាទីមោទនៈ មានអ្នកមួយចំនួនសួរថា កត្តាអ្វីដែលធ្វើឲ្យចិនជោគជ័យក្នុងការអនុវត្តគោលនយោបាយមួយនេះ? សព្វថ្ងៃនេះ ចិនកំពុងប្រើប្រាស់សេដ្ឋកិច្ចរបស់ខ្លួន ជានុយ សម្រាប់បណ្តាប្រទេសជាច្រើនលើពិភពលោកយល់ព្រមដើរតាមនយោបាយរបស់ខ្លួនក្នុងនោះក៏មានកម្ពុជា។
ទំនាក់ទំនងការទូតរវាងប្រទេសទាំងពីរ ចិន និងកម្ពុជា អាចនិយាយបានល្អ ជាពិសេសប៉ុន្មានឆ្នាំចុងក្រោយនេះ។ យើងសង្កេតឃើញ ការដាក់ទុនវិនិយោគនៅកម្ពុជាពីសំណាក់វិនិយោគទុនចិន មានការកើនឡើងគួរឲ្យកត់សម្គាល់។
គួរបញ្ជាក់ផងដែរថា កំណើននៃអ្នកវិនិយោគទុនចិនមកកម្ពុជាពុំមែនជារឿងចៃដន្យនោះទេ កំណើនទាំងអស់នោះបាន និងកំពុងកើនឡើង ស្របពេលដែលអំណាចនយោបាយ យោធា ជាពិសេសសេដ្ឋកិច្ចរបស់ចិនបានរីកសុសសាយក្នុងតំបន់ក៏ដូចជាសកលលោក។
តាមរយៈការអនុវត្តនយោបាយចិនតែមួយ ចិនចង់ផ្ញើសារដល់ពិភពលោក ជាពិសេសសហរដ្ឋអាមេរិកថា ក្រៅពីអាមេរិកក៏មានចិនដែរ ដែលជាប្រទេសខ្លាំង ហើយសហរដ្ឋអាមេរិក និងពិភពលោក ត្រូវតែគោរពភាពខ្លាំងក្លាមួយនេះ។
មានរឿងមួយដែលយើងមិនអាចបដិសេធបានថា ការទទួលស្គាល់នយោបាយចិនតែមួយរបស់កម្ពុជា បានធ្វើឲ្យកំណើនសេដ្ឋកិច្ចកម្ពុជាកើនឡើងគួរឲ្យកត់សម្គាល់។ កម្ពុជា បានជាប់ចំណាត់ថ្នាក់ជាប្រទេសដែលមានការអភិវឌ្ឍសេដ្ឋកិច្ចលឿនបំផុតក្នុងឆ្នាំ ២០១៤។
នេះក៏បញ្ជាក់ឲ្យពិភពលោកឃើញផងដែរថា ប្រទេសណាក៏ដោយឲ្យតែដើរតាមចិន នឹងមានកំណើនសេដ្ឋកិច្ចកើនលឿនដូចកម្ពុជា។
ការជួយរបស់ចិននៅកម្ពុជា ត្រូវបានធ្វើក្រោមរូបភាពជាជំនួយឥតសំណង កម្ចីការប្រាក់ទាប ក៏ដូចជាការលើកទឹកចិត្តឲ្យអ្នកវិនិយោគទុនចិនមកវិនិយោគនៅកម្ពុជាជាដើម។
កំណើនសេដ្ឋកិច្ចរបស់កម្ពុជាបានជួយកម្ពុជាឲ្យមានស្មើមុខស្មើមាត់នៅលើឆាកអន្តរជាតិ ជាពិសេសនៅក្នុងឥណ្ឌូចិន ក៏ដូចជាអាស៊ាន។
វត្តមានចិននៅកម្ពុជា ក៏បានរុញច្រានឥទ្ធិពលរបស់វៀតណាមដែលធ្លាប់មាននៅលើកម្ពុជាកាលពីមុននោះ ឲ្យចេញផុតឆ្ងាយពីមួយថ្ងៃទៅថ្ងៃ។
ការពង្រីកឥទ្ឋិពលចិននៅកម្ពុជា ក៏បានអនុញ្ញាតឲ្យប្រទេសតូចមួយនេះរួចផុតពីការគំរាមកំហែងទាំងផ្នែកសេដ្ឋកិច្ច និងផ្នែកយោធាពីប្រទេសជិតខាង។
ស្របពេលដែលកំណើនសេដ្ឋកិច្ចរបស់ខ្លួនកំពុងតែឡើងខ្ពស់បែបនេះមានរឿងមួយចំនួនដែលកម្ពុជាត្រូវតែទទួលស្គាល់ថា ទន្ទឹមនឹងប្រយោជន៍ដែលខ្លួនបានមកពីការទទួលស្គាល់នយោបាយចិនតែមួយ ខ្លួនក៏ត្រូវនឹងពើបប្រទះនឹងបញ្ហាមួយចំនួនទាំងក្នុងស្រុកក៏ដូចជាលើឆាកអន្តរជាតិ។
ជំនួយរបស់ចិននៅកម្ពុជា បានកើនឡើង ពីមួយឆ្នាំទៅមួយឆ្នាំ ជំនួយទាំងអស់នោះ គឺជាប្រភេទជំនួយគ្មានលក្ខខណ្ឌ (No strings attached aid) ព្រមជាមួយគ្នានោះដែរ វាពុំត្រូវបានយកចិត្តទុកដាក់តាមដាន និងអង្កេតពីសំណាក់រដ្ឋាភិបាលចិន ដែលជាហេតុធ្វើឲ្យរាជរដ្ឋាភិបាលកម្ពុជាប្រើប្រាស់ជំនួយទាំងអស់មិនមានប្រសិទ្ឋភាព មិនតែប៉ុណ្ណោះ ជំនួយអភិវឌ្ឍន៍របស់ចិនពុំបានផ្តោតលើការថែទាំសុខភាព ឬក៏លើកតម្កើងប្រជាធិបតេយ្យនោះទេ។
ដោយសារអ៊ីចឹងហើយ បានជាខ្ញុំនិយាយថា ជំនួយរបស់ចិនមិនធានាឲ្យមានការអភិវឌ្ឍប្រកបដោយនិរន្តរភាពនៅកម្ពុជាឡើយ។ ប្រជាជាតិទាំងពីរមានទំនាក់ទំនងល្អជាមួយគ្នា ដែលជាហេតុធ្វើឲ្យលំហូរនៃជនអន្តោប្រវេសន៍ចិនមកកម្ពុជាកើនឡើងយ៉ាងគំហុក។ ពួកគេមកកម្ពុជា ដោយនាំមកនូវចរិតក្រអឺតក្រទម មិនគោរពច្បាប់ទម្លាប់កម្ពុជា ប៉ុន្តែសកម្មភាពរបស់ពួកគេនៅបន្តធ្វើដោយពុំមានការអើពើណាមួយពីសំណាក់រាជរដ្ឋាភិបាលកម្ពុជា។
បរាជ័យក្នុងការចេញនូវសេចក្តីថ្លែងការណ៍រួមលើបញ្ហាសមុទ្រចិនខាងត្បូងនាកិច្ចប្រជុំអាស៊ាន ២០១២ បានធ្វើឲ្យពិភពលោកក៏ដូចជាប្រទេសជាសមាជិកអាស៊ានផ្សេងមិនពេញចិត្តក៏ដូចជាសោកស្តាយចំពោះអ្វីដែលរដ្ឋាភិបាលក្រុងភ្នំពេញបានធ្វើ។ នេះបង្ហាញនូវកម្សោយផ្នែកការទូតរបស់កម្ពុជា ដែលត្រូវរណបប្រទេសមហាអំណាច ហើយការរណបនេះបានធ្វើឲ្យគេវាយតម្លៃកម្ពុជា នៅក្នុងផ្លូវមួយផ្សេងទៀត។
ការអនុវត្តគោលនយោបាយចិនតែមួយនៅកម្ពុជា បានរុញច្រានអាស៊ានទាំងមូលបែកបាក់សាមគ្គីផ្ទៃក្នុងក៏ដូចជាធ្វើឲ្យអាស៊ានទាំងមូលត្រូវប្រកាន់បក្ខពួក ហើយនយោបាយចិនតែមួយក៏បានធ្វើឲ្យពិភពលោកមើលមកកម្ពុជាក្នុងន័យអាក្រក់ ឬក៏ជាកូនអុករបស់ចិនក្នុងការរក្សាលំនឹងរបស់ខ្លួននៅអាស៊ាន។
ការគាំទ្រនយោបាយចិនតែមួយពីសំណាក់រាជរដ្ឋាភិបាលកម្ពុជាបានធ្វើឲ្យទំនាក់ទំនងរវាងកម្ពុជា និងសហរដ្ឋអាមេរិកពីមួយថ្ងៃទៅមួយថ្ងៃកាន់តែត្រជាក់។ កម្ពុជាខ្លួនឯងត្រូវដឹងថា នៅក្នុងបរិបទនៃសកលភាវូបនីយកម្មនេះ តម្រូវឲ្យប្រទេសនីមួយៗធ្វើកិច្ចសហប្រតិបត្តិការទៅវិញទៅមក ហើយការពឹងផ្អែកលើបណ្តាមហាអំណាចលើពិភពលោកក៏មិនត្រូវមើលរំលងដែរ។
កម្ពុជាគួរព្យាយាមរក្សាតុល្យភាពអំណាចរបស់ចិនហើយក៏ត្រូវបង្កើនឲ្យមានភាពជិតស្និទ្ធជាមួយសហរដ្ឋអាមេរិក ព្រោះសហរដ្ឋអាមេរិកជាទីផ្សារនាំចេញដ៏ធំមួយរបស់កម្ពុជា។ វិស័យកាត់ដេរនៅកម្ពុជា មានសន្ទុះខ្លាំងក៏ដោយសារតែសហរដ្ឋអាមេរិកបង្កើនកូតានាំចេញពីកម្ពុជាដោយក្នុងនោះសម្លៀកបំពាក់កម្ពុជា ៧០ ភាគរយត្រូវបាននាំទៅកាន់ទីផ្សារសហរដ្ឋអាមេរិក។
សរុបសេចក្តីមក លទ្ធផលនៃការគាំទ្រគោលនយោបាយចិនតែមួយ គឺចំណេញតិចជាងខាត ពីព្រោះ វាជាការធ្វើឲ្យនយោបាយការទូតផ្កាប់មុខលើប្រទេសមួយ ដោយពុំបានព្យាយាមបង្កើតទំនាក់ទំនងសេដ្ឋកិច្ចជាមួយបណ្តាប្រទេសផ្សេងទៀតលើសកលលោក។ ហាក់បីដូចជារស់ដោយពឹងផ្អែកគេខ្លាំងពេក យើងរស់នៅសម័យសកលភាវូបនីយកម្ម ហើយការបង្កើតមិត្តភក្តិបរទេសច្រើនជារឿងល្អ ព្រោះវាបង្កើនឲ្យមានឱកាសពាណិជ្ជកម្មច្រើន។ វាជារឿងសំខាន់ណាស់ដែលកម្ពុជាត្រូវលើកតម្លៃរបស់ខ្លួនឲ្យបានខ្ពស់ ដើម្បីកុំឲ្យមហាអំណាចវាយតម្លៃថា ឲ្យតែមានលុយ គឺមានកម្ពុជាក្នុងដៃ។
កម្ពុជា ត្រូវព្យាយាមឈរដោយខ្លួនឯង ជាជាងពឹងលើការជួយទាំងស្រុងពីសំណាក់មហាអំណាច ដែលការជួយទាំងនោះពុំមែនជាការជួយដោយស្មោះសរឡើយ។ រាជរដ្ឋាភិបាលកម្ពុជា គួរព្យាយាមដោះស្រាយបញ្ហាដែលមានស្រាប់នៅកម្ពុជាជាពិសេសបញ្ហាពុករលួយ ការគោរពសិទ្ធិមនុស្ស ការគោរពច្បាប់ ក៏ដូចជាការការពារបរិស្ថានដែលមានស្រាប់ ដើម្បីធ្វើឲ្យអ្នកវិនិយោគទុនបរទេសគេទុកចិត្ត ហើយបោះទុនវិនិយោគនៅកម្ពុជា៕
ជូ វិធុរ័ក្សបណ្ឌិត
អ៊ីមែលៈ borndidh@yahoo.com
No comments:
Post a Comment