PPP Mon, 1 June 2015
 |
ពលរដ្ឋដែលរងប៉ះពាល់ពីការបណ្តេញស្នើឲ្យរដ្ឋាភិបាលជួយដោះស្រាយ។ រូបថត ឃុត សភចរិយា |
បន្ទាយមានជ័យៈ ប្រជាពលរដ្ឋប្រមាណជិត ១០០ គ្រួសារដែលរស់នៅលើដីចំណីផ្លូវ ក្នុងភូមិក្បាលស្ពាន១ សង្កាត់ប៉ោយប៉ែតក្រុងប៉ោយប៉ែត បានសម្ដែងនូវក្ដីព្រួយកង្វល់ជាខ្លាំង អំពីការបណ្ដេញចេញពីលំនៅឋានទាំងបង្ខំ បន្ទាប់ពីអាជ្ញាធរក្រុងបានចេញសេចក្ដីជូនដំណឹងមួយ ដោយតម្រូវឲ្យពួកគាត់ធ្វើការរុះរើផ្ទះចេញពីតំបន់ដែលពួកគាត់កំពុងរស់នៅឲ្យបានមុនថ្ងៃទី ៣១ ខែឧសភា ឆ្នាំ ២០១៥។
លោក ប៉ែន ស៊ីកែវ អាយុ ៣៦ ឆ្នាំ ដែលអះអាងថា បានរស់នៅក្នុងតំបន់នោះនៅអស់រយៈពេល ១៥ ឆ្នាំ បាននិយាយថា កាលពីថ្ងៃទី ២២ ខែ ឧសភាអាជ្ញាធរភូមិ បានយកសេចក្ដីជូនដំណឹងមួយដែលមានចុះហត្ថលេខា និងត្រា របស់លោកអភិបាលក្រុងប៉ោយប៉ែត ង៉ោ ម៉េងជ្រួន ចុះថ្ងៃទី ១៩ ខែឧសភា ឆ្នាំ ២០១៥ មកបិទលើជញ្ជាំងផ្ទះរបស់ពួកគាត់ និងដែលក្នុងសេចក្ដីជូនដំណឹងនោះ បានបញ្ជាក់ថា អាជ្ញាធរនឹងចាត់វិធានការរដ្ឋាបាលក្នុងការរុះរើលំនៅឋានរបស់ពួកគាត់ ប្រសិនបើពួកគាត់មិនរុះរើចេញដោយស្ម័គ្រចិត្តពីទីតាំងដែលពួកគាត់កំពុងរស់នៅនេះទេ។
លោក ស៊ីកែវ បានបន្តថា៖ «ពួកយើងនៅទីនេះ យ៉ាងតិចជាង ១៥ ឆ្នាំទៅហើយ គឺនៅតាំងពីតំបន់នេះ នៅជាបឹងមកម្ល៉េះ ពេលនេះមានការអភិវឌ្ឍ បែរជាដេញពួកយើងចេញដោយគ្មានដំណោះស្រាយគោលនយោបាយដីធ្លីសម្រាប់ពួកយើងរស់នៅអ្វីទាំងអស់។ ពួកយើងនឹងមិនចាកចេញទេ ប្រសិនបើគ្មានដីឲ្យពួកយើងរស់នៅក្បែរទីផ្សារ និងសាលារៀនសម្រាប់កូនតូចៗរបស់យើង»។
ពាក់ព័ន្ធបញ្ហានេះ លោក នុត លី ចៅសង្កាត់ប៉ោយប៉ែត បានប្រាប់ឲ្យដឹងកាលពីម្សិលមិញថា អ្នកភូមិទាំងនោះរស់នៅលើដីចំណីផ្លូវ ដែលរដ្ឋត្រូវការជាចាំបាច់ដើម្បីធ្វើការអភិវឌ្ឍ និងពង្រីកផ្លូវចំនួន ២ ខ្សែនៅក្នុងតំបន់នេះ ប៉ុន្តែយ៉ាងណាក្ដី អាជ្ញាធរនឹងមិនបណ្ដេញពួកគាត់ឲ្យចាកចេញដោយដៃទទេនោះទេ។
លោកថ្លែងថា៖ «នៅពេលនេះអាជ្ញាធរក្រុងកំពុងពិនិត្យមើលដីសង្គមកិច្ចដែលនៅសេសសល់ សម្រាប់យកមកធ្វើការគណនា និងបែងចែកជូនអ្នកភូមិដែលស្ម័គ្រចិត្តចាកចេញ»។
លោក បានបញ្ជាក់ទៀតថា៖ «ដរាបណាគ្មានការឯកភាពយល់ព្រមពីប្រជាពលរដ្ឋ នោះគ្មានការរុះរើ ឬ បណ្ដេញចេញនោះទេ»។
ទោះជាបែបណាប្រជាពលរដ្ឋ ដែលស្ថិតនៅលើតំបន់នៃគម្រោងសាងសង់ផ្លូវពីរខែ្សនោះកំពុងរង់ចាំពិនិត្យមើលថាតើអាជ្ញាធរផ្ដល់ដំណោះស្រាយឲ្យពួកគាត់យ៉ាងដូចម្ដេច ឬ មួយចាំបាច់ត្រូវធ្វើការរុះរើលំនៅឋានពួកគាត់មុនពេលផ្ដល់ដំណោះស្រាយ។
លោក ស៊ុំ ចន្ទគា មន្ត្រីសម្របសម្រួលសមាគមការពារសិទ្ធិមនុស្សអាដហុក បានថ្លែងឲ្យដឹងថា លោកកំពុងធ្វើការចុះអង្កេតនៅក្នុងរឿងនេះ ពីព្រោះករណីនេះហាក់ដូចជាអយុត្តិធម៌សម្រាប់ពលរដ្ឋដែលរងគ្រោះទាំងអស់នោះ ដោយសារពួកគេបានរស់នៅតាំងពីយូរឆ្នាំណាស់មកហើយ ដូច្នេះរដ្ឋាភិបាលត្រូវតែផ្តល់សំណងសមរម្យសម្រាប់គាត់។
លោកបានថ្លែងថា៖ «យើងកំពុងចុះស៊ើប បើនិយាយតាមច្បាប់ភូមិបាលគឺពួកគាត់ជាម្ចាស់ដី នោះស្របច្បាប់»។
លោកថា បើតាមការកត់សម្គាល់គឺមន្ត្រីរបស់រាជរដ្ឋាភិបាលពុំដែលគិតគូរអំពីផលប៉ះពាល់ជាមុន មុននឹងចាប់ផ្តើមធ្វើការអភិវឌ្ឍនេះទេ បង្កើតបញ្ហាហើយទើបដោះជាក្រោយ។
យោងទៅតាមសេចក្តីថ្លែងការណ៍របស់អង្គការលីកាដូ ដែលចេញផ្សាយនៅថ្ងៃទី ១៩ ខែកុម្ភៈ បានរកឃើញថា មានពលរដ្ឋ ១០៦២៥ គ្រួសារប្រមាណ ៤៩៥១៩ នាក់ ដែលបានរងផលប៉ះពាល់ថ្មីដោយសារជម្លោះដីធ្លី ក្នុងខេត្តចំនួន ១៣ បើធៀបនឹងឆ្នាំ ២០១៣ ដែលមាន ៣៤៧៥ គ្រួសារ និងកើនជាង ២ ដង បើធៀបនឹង ឆ្នាំ ២០១២ ដែលមានចំនួន ៥៦៧២ គ្រួសារ៕
No comments:
Post a Comment