Wed, 10 June 2015 ppp
Add caption |
ខណៈសេចក្តីព្រាងច្បាប់ស្តីពីឧក្រិដ្ឋកម្មតាមប្រព័ន្ធបច្ចេកវិទ្យាគមនាគមន៍ និងព័ត៌មានវិទ្យា កំពុងតែស្ថិតនៅក្នុងភាពចម្រូងចម្រាស កាលពីពេលថ្មីៗនេះ អ្នកនាំពាក្យទីស្តីការគណៈរដ្ឋមន្ត្រីលោក ផៃ ស៊ីផាន បានអំពាវនាវជាផ្លូវការទៅក្រសួងមហាផ្ទៃ និងក្រសួងទូរគមនាគមន៍ឲ្យ “ចាត់វិធានការផ្លូវច្បាប់“ ចំពោះមនុស្សដែលប្រើប្រព័ន្ធផ្សព្វផ្សាយសង្គម ដើម្បីវាយប្រហារមន្ត្រីរាជការ និងថ្នាក់ដឹកនាំរដ្ឋាភិបាល។
ក្នុងលិខិតនេះ លោក បានសរសេរនៅក្នុងសមត្ថភាពរបស់លោកជាអនុប្រធានអចិន្រៃ្តយ៍នៃ «អន្តរក្រសួងក្រុមការងារសម្របសម្រួលព័ត៌មានសមរភូមិ»។ លោក ផៃ ស៊ីផាន បានថ្លែងថា លោកទើបតែបានកត់សម្គាល់ឃើញថា «មានបុគ្គលខ្លះ បានប្រើនៅលើប្រព័ន្ធផ្សព្វផ្សាយសង្គមដ៏គួរស្អប់ខ្ពើម និងពាក្យប្រមាថ» ដើម្បីបង្ខូចកេរ្តិ៍ឈ្មោះរបស់មន្ត្រីរដ្ឋាភិបាល។
នៅក្នុងលិខិតដដែល លោក ផៃ ស៊ីផាន បានបន្តថា៖ «ប្រមាថ និងបទបរិហារកេរ្តិ៍ មិនមែនជាផ្នែកនៃសេរីភាពនៃការបញ្ចេញមតិទេ ប៉ុន្តែជាការរំលោភលើសិទ្ធិ និងសេចក្តីថ្លៃថ្នូររបស់បុគ្គលដែលប្រឈមនឹងការប្រមាថមួយ»។
លិខិតរបស់លោក ផៃ ស៊ីផាន មានខ្លឹមសារបន្តដូច្នេះថា៖ «ការប្រមាថ និងការបរិហារបង្កាច់កេរ្តិ៍ គឺមិនស្ថិតនៅក្នុងសេរីភាពក្នុងការបញ្ចេញមតិយោបល់ឡើយ ក៏ប៉ុន្តែវាជាការរំលោភសិទ្ធិ និងសេចក្ដីថ្លៃថ្នូររបស់បុគ្គលដែលត្រូវទទួលបានការគោរព រួមទាំងច្បាប់ជាតិ និងអន្តរជាតិ»។
សំណើរបស់លោក ផៃ ស៊ីផាន ក៏ត្រូវបានគាំទ្រដោយ រដ្ឋមន្ត្រីក្រសួងប្រៃសណីយ៍ និងទូរគមនាគមន៍ លោក ប្រាក់ សុខុន និងរដ្ឋមន្ត្រីក្រសួងព័ត៌មាន លោក ខៀវ កាញារីទ្ធផងដែរ។
ទាក់ទិននឹងបញ្ហានេះ មានការជជែកពិភាក្សាជាច្រើន នៅក្នុងចំណោមយុវជន អ្នកប្រើប្រាស់បណ្តាញសង្គមហ្វេសប៊ុក សាធារណជនទូទៅ និងអង្គការសង្គមស៊ីវិលនានា។
ជាក់ស្តែង កញ្ញា កែវ គូនីឡា ដែលជាអ្នកសរសេរប្លុកមួយរូបបាននិយាយថា៖ «សិទ្ធិសេរីភាពនៅក្នុងការបញ្ចេញមតិ គឺជាសិទិ្ធមូលដ្ឋានរបស់មនុស្ស មិនមែនផ្តល់ដោយអ្នកណានោះឡើយ ខណៈពេលដែលអ៊ីនធឺណិត គឺជាមធ្យោបាយក្នុងការផ្លាស់ប្តូរយោបល់ និងបង្ហាញថា ជាឱកាសមួយដែលមិនធ្លាប់មានសម្រាប់ប្រជាជនកម្ពុជា ក្នុងការធ្វើឲ្យជីវិតរបស់ពួកគេកាន់តែប្រសើរ»។
កញ្ញា បន្តថា៖ «ប្រសិនបើជាដូច្នេះមែន សិទ្ធិសេរីភាពនៅក្នុងបញ្ចេញមតិ ហាក់ត្រូវបានស្ថិតនៅក្រោមការគ្រប់គ្រងរបស់រដ្ឋាភិបាល»។
យុវជននិស្សិត គឹម ហុង វ័យ ២១ ឆ្នាំ និស្សិតនៅវិទ្យាស្ថានបច្ចេកវិទ្យាកម្ពុជា បានលើកឡើងថា៖ «ខ្ញុំជាមនុស្សចូលចិត្តចែករំលែកព័ត៌មាន នយោបាយ បើសិនជាមានច្បាប់នេះ បង្កើតឡើងវាអាចជាបញ្ហាធំនៅក្នុងសិទិ្ធនៅក្នុងបញ្ចេញមតិ បើសិនជាអ្នកបង្កើតច្បាប់នេះ បង្កើតមិនបានល្អ វានឹងប៉ះពាល់ដល់សិទិ្ធនៅក្នុងសង្គមតែម្តង»។
លោកបន្តថា បណ្តាញអ៊ីនធឺណិត ជាកន្លែងទូលាយមួយសម្រាប់ឲ្យមនុស្សបញ្ចេញមតិ និងយោបល់ ព្រោះដើម្បីស្ថាបនា និងធ្វើឲ្យប្រសើរសម្រាប់ជាតិ វាតែងតែមានហើយចំពោះការនិយាយប៉ះពាល់ ឬក៏រិះគន់តិចតួចដល់នយោបាយ ក៏មានទោស ឬក៏ជាប់គុកដែរនោះ វានឹងក្លាយជាបញ្ហាដែលគួរឲ្យបារម្ភ។
ស្របគ្នានេះដែរ កញ្ញា បញ្ញា ដែលជានិស្សិត កំពុងសិក្សានៅទីក្រុងភ្នំពេញ បានបង្ហាញនូវទស្សនៈរបស់ខ្លួនដែរថា៖ «ដើម្បីអភិវឌ្ឍប្រទសមួយវាទាល់តែមានការរិះគន់ដើម្បីស្ថាបនាមន្ត្រីរដ្ឋាភិបាលដែលប្រព្រឹត្តខុសច្បាប់ នោះក៏ខុស វាហាក់បីដូចជាហួសហេតុបន្តិចហើយ»។
កញ្ញា បន្តថា៖ «វាមិនមានអ្វីកំណត់ច្បាស់លាស់ថា តើការរិះគន់ ឬប្រមាថបែបណា ទើបខុសច្បាប់នោះដែរ»។
ដោយឡែក លោក ដារ៉ា ជានិស្សិតនៃសាកលវិទ្យាល័យភូមិន្ទភ្នំពេញ បាននិយាយថា៖ «ការដាក់ទោសទៅលើអ្នកដែលជេរប្រមាថ ឬរិះគន់នៅលើបណ្តាញសង្គមហ្វេសប៊ុក ទៅលើអ្នកដែលរិះគន់ទៅលើមន្ត្រីរដ្ឋាភិបាលមួយនោះវាមិនត្រឹមត្រូវទេ ប៉ុន្តែវាគួរតែមានការដាក់ទោសផងដែរ ចំពោះអ្នកដែលជេរប្រមាថទៅលើមន្ត្រីគណៈបក្សប្រឆាំងផងដែរ ដូច្នេះទើបវាមានសមភាព»។
លោក បន្ថែមថា៖ «យ៉ាងណាក៏ខ្ញុំគិតថា វាមិនគួរឲ្យមាននោះទេ ព្រោះថាវាខុសនឹងសិទ្ធិសេរីភាពនៅក្នុងការបញ្ចេញមតិ»។
ពាក់ព័ន្ធនឹងបញ្ហានេះ លោក សុក សំអឿន អ្នកឯកទេសច្បាប់ និងមេធាវីឯករាជ្យ បានរៀបរាប់ថា វានឹងអាចប៉ះពាល់ដល់សិទិ្ធសេរីភាពនៅក្នុងការបញ្ចេញមតិនៅលើប្រព័ន្ធអ៊ីនធឺណិត ពិសេស គឺបណ្តាហ្វេសប៊ុក ពាក់ព័ន្ធនឹងការបញ្ចេញមតិនៅក្នុងបញ្ហានយោបាយ។ លោក សំណូមពរឲ្យអ្នកនយោបាយ កុំឲ្យធ្វើដើម្បីទៅបម្រើផលប្រយោជន៍និនា្នការនយោបាយណាមួយ។
ទន្ទឹមគ្នានេះដែរ កញ្ញា ឆាយ ឈុនលី មន្ត្រីសម្រួបសម្រួលគម្រោងសិទិ្ធមូលដ្ឋានរបស់មជ្ឈមណ្ឌលសិទិ្ធមនុស្សកម្ពុជា បានរៀបរាប់ថា៖ «រាល់ការធ្វើសេចក្តីព្រាងច្បាប់ ឬបង្កើតច្បាប់នានា គួរតែបម្រើដល់ប្រយោជន៍សាធារណជន មិនមែនដើម្បីបម្រើផលប្រយោជន៍ក្រុមណាមួយជាក់លាក់ណាមួយឡើយ»។
ប៉ុន្តែ មន្ត្រីសម្របសម្រួលរូបនេះ បានសង្កត់ធ្ងន់ថា៖ «ប្រសិនបើការរិះគន់នៅក្នុងន័យស្ថាបនារាជរដ្ឋាភិបាលនោះ ដូចជាបញ្ហាទាក់ទងនឹងបញ្ហាសិទ្ធិមនុស្ស ឬបញ្ហាផ្សេងៗនោះ វាគួរតែជាបញ្ហាមួយដែលរាជរដ្ឋាភិបាលគួរតែពិចារណា»។
ទស្សនាវដ្ដី LIFT បានព្យាយាមទាក់ទងទៅលោក ផៃ ស៊ីផាន សុំធ្វើអត្ថាធិប្បាយពីដំណើរការនៃការ «ចាត់វិធានការផ្លូវច្បាប់»នេះថា វាបានវិវឌ្ឍដល់ណាហើយ ប៉ុន្តែយើងមិនអាចទាក់ទងលោកបាននៅឡើយរហូតមកដល់ពេលនេះ។
សម្រាប់ កញ្ញា ធី សុវណ្ណថា ជាសកម្មជនគណបក្សសង្គ្រោះជាតិ អ្វីដែលលោក ផៃ ស៊ីផាន បានធ្វើនេះវាហាក់បីដូចជាមើលងាយទៅដល់ក្រសួងប្រៃសណីយ៍ និងទូរគមនាគមន៍ ព្រមទាំង ក្រសួងមហាផ្ទៃ គាត់ធ្វើបែបនេះដូចជារំលោភដែនអាជ្ញាធរ ដូចជាក្រសួងទាំងពីរនេះមិនបានធ្វើការងារអ៊ីចឹង។
កញ្ញា បានបន្តទៀតថា៖ «ចំណាត់ការនេះ នឹងអាចធ្វើឲ្យប្រជាជនបាក់ស្បាត និងមិនហ៊ាននៅក្នុងការបញ្ចេញមតិ»។
អ្នកនាំពាក្យគណបក្សសង្គ្រោះជាតិ លោក យ៉ែម បុញ្ញប្ញទ្ឋិ ក៏ធ្លាប់លើកឡើងដែរថា សំណើរបស់លោកផៃ ស៊ីផាន ហាក់ «ចម្លែក»។ លោកថា៖ «លោក ផៃ ស៊ីផាន គ្មានអំណាចណាដើម្បីបញ្ជារដ្ឋមន្ត្រីក្រសួងមហាផ្ទៃ ដែលជាឧបនាយករដ្ឋមន្ត្រីផងនោះទេ ឬក៏រដ្ឋមន្ត្រីក្រសួងទូរគមនាគមន៍នោះឡើយ។ លោកគ្រាន់តែជាអ្នកនាំពាក្យម្នាក់ប៉ុណ្ណោះ។ យើងកម្រឃើញប្រទេសប្រជាធិបតេយ្យណា ព្យាយាមដាក់ពាក្យបណ្តឹងប្រឆាំងនឹងប្រជាជនខ្លួនឯងណាស់»៕
អត្ថបទដោុ ឃុន ពិសិដ្ឋ & សរ ពិសី
No comments:
Post a Comment