2015-06-12
 |
| នាយកប្រតិបត្តិទទួលបន្ទុកកិច្ចការតំបន់អាស៊ីរបស់អង្គការឃ្លាំមើលសិទ្ធិមនុស្សអន្តរជាតិ យូមែន រ៉ៃត៍ វ៉ច្ឆ (Human Rights Watch) លោក ប៊្រែដ អាដាម (Brad Adams) ក្នុងបន្ទប់ផ្សាយរបស់វិទ្យុអាស៊ីសេរី នាទីក្រុងវ៉ាស៊ីនតោន (Washington DC) សហរដ្ឋអាមេរិក កាលពីថ្ងៃទី២៨ ខែមិថុនា ឆ្នាំ២០១៣។
Photo: RFA
|
អង្គការសិទ្ធិមនុស្សអន្តរជាតិ យូមែន រ៉ៃត៍ វ៉ច្ឆ (Human Rights Watch) ដែលឃ្លាំមើលបញ្ហាសិទ្ធិមនុស្សនៅលើពិភពលោកនេះនិយាយថា ប្រសិនបើរដ្ឋសភាកម្ពុជា អនុម័តសេចក្តីព្រាងច្បាប់សមាគម និងអង្គការក្រៅរដ្ឋាភិបាល ដែលគណៈរដ្ឋមន្ត្រីទើបអនុម័តនោះ នឹងមានផលប៉ះពាល់យ៉ាងខ្លាំងដល់ដំណើរការងាររបស់អង្គការសមាគមជាតិ និងអន្តរជាតិ។
លោក ប្រ៊ែដ អាដាម (Brad Adams) នាយកប្រតិបត្តិនៃអង្គការសិទ្ធិមនុស្សអន្តរជាតិ យូមែន រ៉ៃត៍ វ៉ច្ឆទទួលបន្ទុកផ្នែកអាស៊ីនិយាយថា អង្គការសមាគមក្នុងស្រុក និងក្រៅស្រុករាប់ពាន់អង្គការនៅកម្ពុជា មានសារសំខាន់ណាស់ក្នុងការជួយអភិវឌ្ឍលើគ្រប់វិស័យសម្រាប់ប្រទេសក្រីក្រមួយនេះ។ អង្គការសមាគមទាំងនេះ អាចនឹងត្រូវបិទទ្វារ ប្រសិនបើសេចក្តីព្រាងច្បាប់ដែលមានចេតនាគាបសង្កត់ក្រុមសង្គមស៊ីវិលមួយនេះត្រូវបានអនុម័ត៖ «ប្រសិនបើសេចក្តីព្រាងច្បាប់នេះក្លាយទៅជាច្បាប់ អង្គការសមាគមមួយចំនួន នឹងឈប់ដំណើរការ មួយចំនួននឹងត្រូវបញ្ជាឲ្យឈប់ធ្វើសកម្មភាព និងមួយចំនួនទៀតនឹងត្រូវក្លាយជាផ្ទាំងស៊ីបផ្នែកនយោបាយដែលធ្វើឲ្យពួកគេភ័យខ្លាច ក្នុងការបញ្ចេញមតិតទៅទៀត ពីព្រោះសេចក្តីព្រាងច្បាប់នេះ ដាក់បញ្ចូលពាក្យពេចន៍ដែលបង្កប់អត្ថន័យសម្រាប់អាជ្ញាធរងាយស្រួលក្នុងការបកស្រាយតាមអំពើចិត្ត ដើម្បីធ្វើបាប ឬបិទមាត់អង្គការសមាគមណាដែលរដ្ឋាភិបាលមិនពេញចិត្ត។ ពាក្យពេចន៍ទាំងនោះ ដែលមានចែងក្នុងសេចក្តីព្រាងច្បាប់នេះ រួមមាន រដ្ឋាភិបាលអាចបញ្ចប់សុពលភាព ឬបញ្ឈប់អង្គការសមាគមណាដែលមានសកម្មភាពប៉ះពាល់ដល់សន្តិសុខសង្គម ស្ថិរភាព និងសណ្ដាប់ធ្នាប់សាធារណៈ ឬបង្កនូវភាពអន្តរាយដល់សន្តិសុខជាតិ ឯកភាពជាតិ វប្បធម៌ប្រពៃណី និងទំនៀមទម្លាប់របស់សង្គមជាតិកម្ពុជា។ តើអ្វីទៅដែលហៅថា ការបង្កភាពអន្តរាយដល់សន្តិសុខជាតិ ឯកភាពជាតិ វប្បធម៌ប្រពៃណី និងទំនៀមទម្លាប់របស់សង្គមជាតិកម្ពុជា? ឧទាហរណ៍មួយ គឺថា ទំនៀមទម្លាប់វប្បធម៌មួយរបស់រដ្ឋាភិបាលកម្ពុជា គឺប្រព្រឹត្តអំពើពុករលួយ។ ដូច្នេះ អង្គការដែលហ៊ាននិយាយរិះគន់បញ្ហាពុករលួយនៃមន្ត្រីរដ្ឋាភិបាល អាចនឹងត្រូវបិទទ្វារ។ តើពាក្យថា សន្តិសុខជាតិ តើពាក្យថា ស្ថិរភាព មានន័យថាយ៉ាងម៉េច? មានអ្នកណាអាចបកស្រាយបានទេ?»។
លោក ប្រ៊ែដ អាដាម បន្តថា អង្គការសមាគមមានសារសំខាន់ខ្លាំងណាស់សម្រាប់កសាងសេដ្ឋកិច្ចនៅកម្ពុជា។ ពួកគេផ្តល់សេវាជួយសម្រាលបន្ទុកយ៉ាងច្រើនមហាសាលដល់ប្រជាជាតិកម្ពុជា ទាំងមូល ក្នុងនោះមានបញ្ហាសង្គម បញ្ហាសុខភាព បញ្ហាអប់រំ ជួយប្រឆាំងអំពើពុករលួយ និងជួយដល់ការដោះមីន ជាដើម។
ប្រសិនបើសេចក្តីព្រាងបែបច្បាប់នេះត្រូវបានអនុម័តក្លាយជាច្បាប់ ប្រទេសម្ចាស់ជំនួយនានានឹងត្រូវបញ្ឈប់ជំនួយ នាំឲ្យអង្គការសង្គមស៊ីវិលទាំងនោះលែងដំណើរការ ហើយពលរដ្ឋខ្មែរដែលទទួលផលប្រយោជន៍ពីអង្គការទាំងនោះ នឹងរងការលំបាក។ លោក ប្រ៊ែដ អាដាម បញ្ជាក់ថា ច្បាប់កម្ពុជា មានគ្រប់គ្រាន់សម្រាប់គ្រប់គ្រងអង្គការមិនមែនរដ្ឋាភិបាល ហើយមិនចាំបាច់ត្រូវការច្បាប់នេះទេ។ លោកថា គឺលោកនាយករដ្ឋមន្ត្រី ហ៊ុន សែន ទេដែលចង់បានច្បាប់នេះ ដើម្បីបិទមាត់អង្គការដែលរិះគន់រដ្ឋាភិបាលរបស់លោក៕
No comments:
Post a Comment