2015-06-09 rfa
 |
| តំណាងក្រុមប្រឹក្សាឃ្លាំមើលកម្ពុជា និងជាប្រធានសហព័ន្ធនិស្សិតបញ្ញវន្តកម្ពុជា ផ្ដល់បទសម្ភាសន៍នៅមុខបង្គោលព្រំដែនកម្ពុជា-វៀតណាម លេខ៩៤ នៅក្នុងភូមិជើង ឃុំជាំ ស្រុកមេមត់ ខេត្តត្បូងឃ្មុំ នៅថ្ងៃទី១៧ ឧសភា ឆ្នាំ២០១៥។
RFA/Saut Sokprathna
|
សមាជិកក្រុមប្រឹក្សាឃ្លាំមើលកម្ពុជា និងក្រុមនិស្សិតបញ្ញវន្តកម្ពុជា គ្រោងជួបប្រជុំគ្នានៅទីលានប្រជាធិបតេយ្យនៅថ្ងៃអាទិត្យ ទី១៧ ខែមិថុនា ចុងសប្ដាហ៍នេះ ដើម្បីបង្ហាញដល់សាធារណជនពីលទ្ធផលនៃការចុះស្រាវជ្រាវពីបញ្ហាព្រំដែនកម្ពុជា-វៀតណាម ក្នុងឃុំជាំ ស្រុកមេមត់ ខេត្តត្បូងឃ្មុំ។ លើសពីនេះពួកគេនឹងនាំគ្នាហែញត្តិទាមទារអោយមានការយកចិត្តទុកដាក់ដល់បញ្ហាព្រំដែនទៅទូលព្រះមហាក្សត្រ ដាក់ទៅខុទ្ទកាល័យនាយករដ្ឋមន្ត្រី រដ្ឋសភា និងប្រធានក្រុមភាគតិចនៃរដ្ឋសភា។
ក្រុមនិស្សិតបញ្ញវន្តដែលបានចុះទៅពិនិត្យព្រំដែន បានចងក្រងលទ្ធផលនៃការរកឃើញរបស់ក្រុមខ្លួនជារបាយការណ៍ត្រៀមបង្ហាញជូនសាធារណជន និងភ្ជាប់ជាមួយញត្តិដែលគ្រោងនឹងដាក់ទៅស្ថាប័នពាក់ព័ន្ធ។
សមាជិកក្រុមប្រឹក្សាឃ្លាំមើលកម្ពុជា និងជាប្រធានសហព័ន្ធនិស្សិតបញ្ញវន្តកម្ពុជា លោក ម៉ៅ ពិសេស មានប្រសាសន៍នៅថ្ងៃទី៩ ខែមិថុនា ថា ក្រុមរបស់លោកបានជូនដំណឹងទៅសាលារាជធានីភ្នំពេញ ពីការជួបប្រជុំនៅទីលានប្រជាធិបតេយ្យ។ លោកអះអាងថា ក្រុមរបស់លោកបានរកឃើញថា ពលរដ្ឋដែលរស់នៅជាប់ព្រំដែនក្នុងឃុំជាំ ស្រុកមេមត់ គឺជាម្ចាស់ពិតប្រាកដរបស់ដីស្រែចម្ការដែលត្រូវអាជ្ញាធរវៀតណាម បាញ់ថ្នាំបំផ្លាញដំណាំ ដែលមិនមែនជាដីវៀតណាម ឡើយ។ ករណីនេះទើបនៅក្នុងញត្តិរបស់ក្រុមលោក ទាមទារអោយស្ថាប័នពាក់ព័ន្ធពិចារណា និងយកចិត្តទុកដាក់ជួយដោះស្រាយការពារទឹកដីពីការរំលោភយករបស់វៀតណាម។ ក្រៅពីនេះក្រុមរបស់លោកទាមទារអោយដកតំណែងមន្ត្រីជាន់ខ្ពស់ ២រូប។
លោក ម៉ៅ ពិសេស៖ «បញ្ហាដែលវៀតណាម ចូលមកឈ្លានពានបំផ្លាញដំណាំប្រជាពលរដ្ឋហ្នឹង អោយគាត់បានចូលទៅដំណាំវិញដោយពុំមានការរារាំង ហើយនិងស្នើអោយដកលោក ហោ ណាំហុង និងលោក វ៉ា គឹមហុង ពីតំណែង ដោយយល់ថា ពួកគាត់ពុំបានបំពេញភារកិច្ច កាតព្វកិច្ចរបស់គាត់តាមរដ្ឋធម្មនុញ្ញទេ គាត់អសមត្ថភាពផងដែរ។ ក្នុងនាមប្រមុខការទូតគេមិនដែលចេញមកការពារផលប្រយោជន៍ប្រទេសដទៃ ជនជាតិដទៃទេ ខុសត្រូវយ៉ាងម៉េចគេត្រូវតែការពារពលរដ្ឋគេ និងប្រជាជាតិរបស់គេ»។
កាលពីថ្ងៃទី១៧ ខែឧសភា ក្រុមប្រឹក្សាឃ្លាំមើលកម្ពុជា និងនិស្សិតមួយក្រុមបានធ្វើទស្សនកិច្ចសិក្សាទៅតំបន់ព្រំដែនក្នុងឃុំជាំ ស្រុកមេមត់ ខេត្តត្បូងឃ្មុំ។ ដំណើរទៅព្រំដែនរបស់ក្រុមនេះ គឺបន្ទាប់ពីផលដំណាំរបស់អ្នកភូមិចំនួន ១៦ហិកតារ ត្រូវអាជ្ញាធរវៀតណាម បាញ់ថ្នាំបំផ្លាញចោល កាលពីថ្ងៃទី១៩ ខែមេសា ដោយចោទប្រកាន់ថា ពួកគេបានឆ្លងចូលទៅធ្វើស្រែចម្ការក្នុងទឹកដីវៀតណាម។
ភ្លាមៗនោះប្រមុខការទូតកម្ពុជា លោកឧបនាយករដ្ឋមន្ត្រី ហោ ណាំហុង បានថ្លែងការណ៍ថា អ្នកភូមិពិតជាបានបង្កបង្កើនផលលើដីវៀតណាម។ ចំណែកលោកទេសរដ្ឋមន្ត្រី វ៉ា គឹមហុង ទទួលបន្ទុកបញ្ហាព្រំដែនក៏បានបកស្រាយជាសាធារណៈថា ទីកើតហេតុពិតជាឋិតក្នុងដីវៀតណាមដែរ បើប្រៀបធៀបនឹងបន្ទាត់ព្រំដែនដែលបោះបង្គោលរួច។ លោកក៏បានបន្ទោសអ្នកភូមិថា មិនបានជូនដំណឹងពីទំហំដីរបស់ខ្លួននៅពេលបោះបង្គោល ដែលជាមូលហេតុអាជ្ញាធរសមត្ថកិច្ចមិនបានចរចាសម្របសម្រួលផ្លាស់ប្ដូរជាជាមួយភាគីវៀតណាម។
ទាក់ទិនដល់គម្រោងរបស់ក្រុមនិស្សិតនេះអ្នកនាំពាក្យសាលារាជធានីភ្នំពេញ លោក ឡុង ឌីម៉ង់ មានប្រសាសន៍ថា សាលារាជធានីបានទទួលលិខិតរបស់លោក ម៉ៅ ពិសេស ហើយកំពុងដាក់ឆ្លង លោក ប៉ា សុជាតិវង្ស អភិបាលរាជធានីសម្រេច។
ក្នុងគម្រោងជួបប្រជុំនៅទីលានប្រជាធិបតេយ្យរបស់សហព័ន្ធនិស្សិតបញ្ញវន្តកម្ពុជា នឹងមានអ្នកចូលរួមជាង ៥០នាក់ ហើយក្រុមនេះសង្ឃឹមថា នឹងមានសាធារណជនទូទៅដែលយកចិត្តទុកដាក់ដល់បញ្ហាព្រំដែនចូលរួមបន្ថែមទៀត៕
No comments:
Post a Comment