2015-06-05
 |
| ក្រុមយុវជនសរសេរអក្សរ និងតុបតែងខ្លួនក្នុងន័យការពារបរិស្ថាន មុនចេញដំណើរដាក់ញត្តិ។ |
ក្រុមយុវជនប្រមាណជាង ១០០នាក់ បានប្រមូលផ្ដុំគ្នាធ្វើយុទ្ធនាការដោយជិះកង់ដាក់ញត្តិទៅកាន់រដ្ឋសភា ព្រមទាំងស្ថានទូត និងក្រុមហ៊ុនឯកជនពាក់ព័ន្ធនៅក្នុងរាជធានីភ្នំពេញ។ យុទ្ធនាការនេះផ្សព្វផ្សាយពីផលប៉ះពាល់ និងទាមទារឲ្យរដ្ឋសភា និងបណ្ដាស្ថានទូតទាំងនោះ អន្តរាគមន៍បញ្ឈប់គម្រោងសាងសង់ទំនប់វារីអគ្គិសនី ដន សាហុង (Don Sahong) ក្នុងប្រទេសឡាវ។
តំណាងរាស្ត្រគណបក្សសង្គ្រោះជាតិ និងគណបក្សប្រជាជនកម្ពុជា បានចេញមកទទួលញត្តិពីក្រុមយុវជន ហើយសន្យាថា នឹងយកបញ្ហានេះទៅពិភាក្សា ពិនិត្យស្រាវជ្រាវបន្ថែមធ្វើយ៉ាងណាឲ្យមានការអន្តរាគមន៍ពីរដ្ឋាភិបាលកម្ពុជា។
ញត្តិដែលគាំទ្រពីតំណាងសហគមន៍ សកម្មជនបរិស្ថានដែលមានស្ថាប័នចម្រុះផ្សេងៗគ្នា ដែលកំពុងធ្វើការលើការងារបរិស្ថាន ការពារលើធនធានធម្មជាតិ ប្រមាណ ៧ស្ថាប័ន បានបង្ហាញក្តីព្រួយបារម្ភ និងផលប៉ះពាល់ទៅលើជីវចម្រុះ និងជីវភាពប្រជាពលរដ្ឋរស់នៅតាមដងទន្លេមេគង្គនៅក្នុងប្រទេសកម្ពុជា។
សមាជិកគណៈកម្មការទី១ទទួលពាក្យបណ្ដឹង អង្កេត និងសិទ្ធិមនុស្សនៃរដ្ឋសភា មកពីគណបក្សសង្គ្រោះជាតិ ដែលបានចេញមកទទួលញត្តិពីក្រុមយុវជន លោក ងឹម ញេង មានប្រសាសន៍ថា លោកគាំទ្ររាល់សកម្មភាពយុវជនដើម្បីការពារបរិស្ថាននៅកម្ពុជា។ លោកថា ក្នុងនាមលោកជាតំណាងរាស្ត្រគណបក្សសង្គ្រោះជាតិ លោកនឹងលើកយកក្តីបារម្ភលើគម្រោងទំនប់វារីអគ្គិសនីទៅដាក់ជូនរដ្ឋសភាដើម្បីដោះស្រាយតាមនីតិវិធី៖ «ខ្ញុំនឹងចាត់តាមនីតិវិធីទៅកាន់គណៈកម្មការទី៣នៃរដ្ឋសភាឲ្យជួយអន្តរាគមន៍ ហើយយើងនឹងប្រឹងប្រែងធ្វើយ៉ាងណាមិនឲ្យប៉ះពាល់ដល់ជីវភាពរស់នៅរបស់ពលរដ្ឋ»។
ចំណែកឯតំណាងរាស្ត្រគណបក្សប្រជាជនកម្ពុជា និងជាសមាជិកគណៈកម្មការទី១ទទួលពាក្យបណ្តឹង អង្កេត និងសិទ្ធិមនុស្សនៃរដ្ឋសភា អ្នកស្រី ឡោក ខេង មានប្រសាសន៍ថា រាល់សំណើរបស់យុវជន និងតំណាងសហគមន៍នៅពេលនេះ សភាមិនប្រងើយកន្តើយនោះឡើយ ហើយអ្នកស្រីជឿជាក់ថា រដ្ឋាភិបាលកម្ពុជា អន្តរាគមន៍លើរឿងនេះ៖ «ខ្ញុំជឿថា រដ្ឋាភិបាលនឹងខិតខំប្រឹងប្រែង ពិភាក្សាជាមួយប្រទេសឡាវ ព្រោះថា យើងមិនអាចរស់នៅដោយគ្មានទន្លេនោះទេ»។
ការដាក់ញត្តិទាមទារបញ្ឈប់ការសាងសង់ទំនប់វារីអគ្គិសនីដន សាហុង របស់ក្រុមយុវជន ក្រៅពីបានដាក់ជូនរដ្ឋសភាជាតិ ក្រុមយុវជនទាំងនោះក៏បានបន្តដំណើរជិះកង់ដាក់ញត្តិទៅកាន់ស្ថានទូតឡាវ ម៉ាឡេស៊ី និងក្រុមហ៊ុនស្រាបៀរអង្គរ ដែលជាស្ថាប័នពាក់ព័ន្ធនឹងគម្រោងសាងសង់ទំនប់នេះ។
ទោះជាយ៉ាងណា តំណាងស្ថានទូតឡាវ និងម៉ាឡេស៊ី បានចេញមកទទួលញត្តិរបស់ក្រុមយុវជន តែមិនបានសន្យាយ៉ាងណានោះឡើយ ដោយឡែកក្រុមហ៊ុនស្រាបៀរអង្គរ ដែលមានភាគហ៊ុន ៥០% នៅក្នុងគម្រោងសាងសង់ទំនប់នេះ មិនបានចេញមកទទួលញត្តិរបស់ក្រុមយុវជនឡើយ។
ក្រុមសហគមន៍រងគ្រោះដោយសារគម្រោងសាងសង់ទំនប់វារីអគ្គិសនីដន សាហុង (Don មកពីខេត្តស្ទឹងត្រែង សង្ឃឹមថា រដ្ឋាភិបាល និងបណ្ដាស្ថានទូតដែលពាក់ព័ន្ធនឹងគម្រោងសាងសង់ទំនប់នេះ នឹងពិចារណាអំពីផលប៉ះពាល់ និងផ្អាកគម្រោងសាងសង់ទំនប់វារីអគ្គិសនីដន សាហុង។
ទោះជាយ៉ាងណា ក្រុមសហគមន៍រងគ្រោះ នឹងបន្តសកម្មភាពតវ៉ានានា រហូតគម្រោងសាងសង់ទំនប់វារីអគ្គិសនីដន សាហុង ផ្អាកដំណើរការ។
នាឱកាសទិវាបរិស្ថានពិភពលោក ខួបលើកទី៤៣ នៅថ្ងៃទី៥ ខែមិថុនា ឆ្នាំ២០១៥ នេះ ក្រសួងបរិស្ថានបានសហការជាមួយសាលារាជធានីភ្នំពេញ ក្រុមយុវជន ប្រជាពលរដ្ឋ និងស្ថាប័នពាក់ព័ន្ធមួយចំនួនទៀត ប្រមាណជាង ៥០០នាក់ បាននាំគ្នាដើរប្រមូលសំរាមនៅតាមតំបន់សួនច្បារ ទីផ្សារ និងតំបន់ទេសចរណ៍មួយចំនួននៅក្នុងរាជធានីភ្នំពេញ។
ការប្រារព្ធទិវាបរិស្ថានឆ្នាំនេះ ក្រសួងបរិស្ថានបានកំណត់យកប្រធានបទ "ខ្ញុំស្រឡាញ់ទីក្រុងខ្ញុំ" ដើម្បីលើកកម្ពស់គុណភាពបរិស្ថាន ឲ្យកាន់តែប្រសើរឡើងថែមទៀត និងធ្វើឲ្យការរស់នៅរបស់ពលរដ្ឋកម្ពុជា ប្រកបដោយចិរភាព ព្រមទាំងធ្វើឲ្យបរិស្ថានទីក្រុង មានអនាម័យ សោភ័ណភាពស្រស់បំព្រង៕
No comments:
Post a Comment