2015-06-05
 |
| ជនជាតិចាមចូលរួមក្នុងសិក្ខាសាលាអន្តរជាតិស្ដីពីការអភិវឌ្ឍវិស័យអប់រំ និងសេដ្ឋកិច្ច នារាជធានីភ្នំពេញ នៅថ្ងៃទី៥ មិថុនា ឆ្នាំ២០១៥។
RFA/Khe Sonorng
|
ថ្នាក់ដឹកនាំ តំណាងអង្គការសមាគម អ្នកជំនាញ អ្នកវិនិយោគ និងនិស្សិតប្រមាណ ១០០នាក់ បានជួបជុំគ្នារិះគន់យុទ្ធសាស្ត្រដើម្បីកសាងសហគមន៍ខ្មែរឥស្លាមនៅកម្ពុជា។ ការជួបជុំគ្នានេះធ្វើឡើងនៅក្នុងសិក្ខាសាលាអន្តរជាតិ ស្ដីពីការអភិវឌ្ឍវិស័យអប់រំ និងសេដ្ឋកិច្ចរយៈពេល ២ថ្ងៃ នៅថ្ងៃទី៥ និងទី៦ ខែមិថុនា ក្នុងរាជធានីភ្នំពេញ។
ស្ថាប័នពាក់ព័ន្ធមួយចំនួនកំពុងប្រមូលយកអនុសាសន៍ដោះស្រាយបញ្ហាប្រឈមនានា ពិសេសបញ្ហាអប់រំ និងសេដ្ឋកិច្ចគ្រួសារដែលកើតមាននៅក្នុងសហគមន៍ខ្មែរឥស្លាម។
ប្រធានក្រុមប្រឹក្សាឥស្លាមអភិវឌ្ឍន៍កម្ពុជា លោក ហូសេន មហាម៉ាត់ ហ្វារីត ថ្លែងនៅថ្ងៃទី៥ មិថុនា ថា ថ្វីត្បិតតែសហគមន៍ខ្មែរឥស្លាមមានការរីកចម្រើនក្នុងរយៈពេលចុងក្រោយនេះក្ដី ប៉ុន្តែមានបញ្ហាប្រឈមមួយចំនួន ពិសេសការអប់រំ និងរឿងសេដ្ឋកិច្ចគ្រួសាររបស់ខ្មែរឥស្លាមដែលត្រូវដោះស្រាយថែមទៀត។
លោកបញ្ជាក់ថា អត្រាបោះបង់ចោលការសិក្សារបស់សិស្សខ្មែរឥស្លាមមានកម្រិតខ្ពស់ ហើយពួកគេពុំមានលទ្ធភាពបង់ថ្លៃសិក្សានៅឯសាកលវិទ្យាល័យ។ រីឯបញ្ហាវិស័យអប់រំឥស្លាមក៏មិនទាន់ឆ្លើយតបនឹងកម្រិតបទដ្ឋានជាតិ។ ទន្ទឹមនឹងគ្នានេះ គ្រឹះស្ថានឧត្ដមសិក្សាសម្រាប់សិក្សាផ្នែកសាសនាក៏មិនទាន់មាន។
លោក ហូសេន មហាម៉ាត់ ហ្វារីត អះអាងថា នៅពេលរកដំណោះស្រាយបានពីកិច្ចជំនួបនេះ ពួកគេនឹងយកទៅអភិវឌ្ឍន៍ក្នុងសហគមន៍ផ្ទាល់៖ «យើងនឹងពិភាក្សាបានអនុសាសន៍ និងរកកន្លែងគោលដៅណាដែលនឹងត្រូវអភិវឌ្ឍន៍មុន»។
ការថ្លែងនេះនៅក្នុងសិក្ខាសាលាអន្តរជាតិ ស្ដីពីការអភិវឌ្ឍវិស័យអប់រំ និងសេដ្ឋកិច្ច រយៈពេល ២ថ្ងៃ ក្នុងរាជធានីភ្នំពេញ។
ឆ្លើយតបបញ្ហានេះ រដ្ឋលេខាធិការក្រសួងសង្គមកិច្ច អតីតយុវជន និងយុវនីតិសម្បទា លោក អៈម៉ាត់ យ៉ះយ៉ា មានប្រសាសន៍ទទួលស្គាល់ថា ជនជាតិចាមទទួលបានការអប់រំតិចនៅឡើយ។ ចំណែកឯការកសាងផ្នែកសេដ្ឋកិច្ចក៏នៅមានកម្រិតដែរ។ លោកថា បញ្ហានេះទាមទារឲ្យមានការបណ្ដុះបណ្ដាលមនុស្សជំនាន់ក្រោយធ្វើយ៉ាងណាឲ្យទទួលបានការអប់រំខ្ពង់ខ្ពស់ និងយកចិត្តទុកដាក់កសាងសេដ្ឋកិច្ចគ្រួសារក្នុងសហគមន៍ ថែមទាំងចូលរួមអភិវឌ្ឍន៍ប្រទេសជាតិ។ បញ្ហានេះគឺពាក់ព័ន្ធនឹងសហគមន៍ខ្មែរឥស្លាមទាំងមូល ត្រូវជួបជុំពិគ្រោះយោបល់គ្នា ដើម្បីរកដំណោះស្រាយ៖ «ការងារនេះមិនអាចធ្វើលឿនបានទេ អាច ១០ឆ្នាំ ២០ឆ្នាំ ឬដល់ ១០០ឆ្នាំ ឯណោះ ទើបមើលឃើញការអភិវឌ្ឍច្បាស់លាស់»។
នៅកម្ពុជាមានជនជាតិចាមប្រមាណ ៥០ម៉ឺននាក់ កំពុងរស់នៅក្នុងភូមិជាង ៦០០ តាមតំបន់ដងទន្លេដែលមានដូចជាខេត្តកំពង់ចាម និងខេត្តស្ទឹងត្រែង ជាដើម៕
No comments:
Post a Comment