ស្ដាប់ ឬ ទាញយកសំឡេង 
លោកនាយករដ្ឋមន្ត្រី ហ៊ុន សែន (ឆ្វេង) និងកូនប្រុស លោក ហ៊ុន ម៉ាណែត។ លោក ហ៊ុន ម៉ាណែត កាលពីថ្ងៃទី៣ ខែមករា ឆ្នាំ២០១១ ត្រូវបានតែងតាំងជាមេបញ្ជាការរងនៃបញ្ជាការដ្ឋានកងទ័ពជើងគោកនៃកងយោធពលខេមរភូមិន្ទ។
Photo courtesy of camnews.com
ក្រុមអ្នកវិភាគនិយាយវាយតម្លៃថា នៅខណៈគណបក្សសង្គ្រោះជាតិ មិនទាន់សម្លឹងវែងឆ្ងាយក្នុងការបណ្ដុះយុវជនជំនាន់ក្រោយ ឲ្យបន្តវេនដឹកនាំបក្សនោះ លោកនាយករដ្ឋមន្ត្រី ហ៊ុន សែន កំពុងបោះពួយយ៉ាងខ្លាំងក្នុងការលើកតម្កើងត្រកូល ហ៊ុន របស់ខ្លួន ឲ្យមានមុខមាត់បុណ្យស័ក្តិ និងកេរ្តិ៍ឈ្មោះ ដែលអាចឈានទៅដល់ការស្នងតំណែងរបស់លោកទៀតផង។
មជ្ឈដ្ឋានជាច្រើនវាយតម្លៃថា ត្រកូល ហ៊ុន របស់លោកនាយករដ្ឋមន្ត្រី ហ៊ុន សែន កំពុងក្ដោបក្ដាប់វិស័យធំៗជាច្រើននៅក្នុងប្រទេស ក្នុងនោះរួមមាន វិស័យយោធា និងបណ្ដាញយុវជន ហើយថ្មីៗនេះត្រកូល ហ៊ុន កំពុងទាត់ចោលតួនាទីរបស់ក្រសួងវប្បធម៌ និងវិចិត្រសិល្បៈថែមទៀត។
សម្រាប់កិត្តិយស និងមុខមាត់ជូនកូនពៅរបស់លោក កម្មវិធីអង្គរសង្ក្រាន្តឆ្នាំ២០១៥ ត្រូវបានបង្កើតឡើងសម្រាប់ លោក ហ៊ុន ម៉ានី ជាអ្នកដឹកនាំដោយមិនប្រើប្រាស់យន្តការរបស់ក្រសួងវប្បធម៌ និងវិចិត្រសិល្បៈ ក្នុងការរៀបចំពិធីទាំងនេះ។
ចំណែកអំណាច និងយសស័ក្តិសម្រាប់កូនច្បងរបស់លោក គឺលោក ហ៊ុន ម៉ាណែត វិញកាន់តែឡើងខ្ពស់ត្រដែតទៅៗ។ លោកជាអគ្គមេបញ្ជាការរងនៅកងយោធពលខេមរភូមិន្ទផង និងជាអគ្គមេបញ្ជាការរងនៃកងអង្គរក្ស «ង៧០» ផង។ ជាងនេះទៅទៀត លោក ហ៊ុន ម៉ាណែត តែងបង្ហាញមុខក្នុងទូរទស្សន៍ក្នុងស្រុកដែលគ្រប់គ្រងដោយបក្សកាន់អំណាចជាញឹកញាប់ ក្នុងការចុះចែកអំណោយដល់កងទ័ព និងកម្មវិធីផ្សេងៗ។
ឋានន្តរស័ក្តិឧត្តមសេនីយ៍ផ្កាយបី ទទួលបានយ៉ាងឆាប់រហ័ស ខណៈមន្ត្រីយោធាឯទៀតៗដែលគ្មានសែស្រឡាយ ឬបក្ខពួក បើទោះខំតស៊ូសឹងអស់ជីវិតទៅទៀតក៏ដោយ ក៏មិនបានផ្កាយមកពាក់នៅលើស្មាដែរ។
អ្នកវិភាគឯករាជ្យ លោកបណ្ឌិត កែម ឡី មានប្រសាសន៍ថា កម្ពុជា កំពុងរៀនសូត្រតាមការដឹកនាំដោយការស្នងត្រកូលដូចប្រទេសកូរ៉េខាងជើង៖ «នៅស្រុកខ្មែរនេះរបៀបជាកូរ៉េខាងជើង មានន័យថា ឡើងកាន់អំណាចចេញពីទាហាន ដល់ពេលធ្វើជាប្រធានាធិបតី គឺចេញពីទាហាន។ នៅស្រុកខ្មែរយើងវិញអត់ខុសគ្នាប៉ុន្មានទេ ស្នងត្រកូល គឺស្នងរបៀបជាទាហាន ពីព្រោះតាមការយល់ឃើញរបស់គាត់ ប្រសិនបើត្រួតត្រាកងកម្លាំងប្រដាប់អាវុធមិនបាន មិនបាច់ចាំធ្វើជានាយករដ្ឋមន្ត្រីទេ។ ពាក្យពេចន៍ទាំងអស់ហ្នឹងហើយ ដែលជំរុញឲ្យមានការរៀបចំជាស្រេចនៅក្នុងការចងជាបណ្ដាញយុវជន តាមរយៈសែស្រឡាយហ្នឹង ហើយឲ្យអាចក្លាយទៅជានាយករដ្ឋមន្ត្រី»។
ប៉ុន្តែ អ្នកនាំពាក្យគណបក្សប្រជាជនកម្ពុជា លោក ឈឹម ផលវរុណ បានប្រាប់វិទ្យុអាស៊ីសេរី តាមទូរស័ព្ទថា លោក ហ៊ុន ម៉ាណែត មានសមត្ថភាពគ្រប់គ្រាន់សមនឹងធ្វើជានាយករដ្ឋមន្ត្រី៖ «ហ៊ុន ម៉ាណែត គេរៀនបានខ្ពស់រហូតបានដល់ទៅ ភី.អេច្ឆ.ឌី (Phd) ហើយគេមានចំណេះខាងយោធានៅអាមេរិក និងខាងផ្សេងៗទៀត។ បើយើងយកអាយុមកគិត យកសមត្ថភាពមកគិត ម៉ាណែត គេមានអាយុចូលសែសិបហើយ គេមានសមត្ថភាព រឿងអីមិនឲ្យគេមានសិទ្ធិ និងលទ្ធភាពចូលរួមក្នុងតួនាទី។ អ៊ីចឹងមិនមែនរឿងចេតនាស្នង ឬមិនស្នងនោះទេ រឿងសំខាន់ ថាតើអ្នកដែលមកទទួលតួនាទីគេមានសមត្ថភាពប៉ុណ្ណា?»។
ទោះជាយ៉ាងណាក៏ដោយ ក្រុមយុវជនរិះគន់ថា ប្រសិនបើ លោក ហ៊ុន ម៉ាណែត ឡើងកាន់តំណែងស្នងពីឪពុកមែន មិនតាមរយៈការបោះឆ្នោតត្រឹមត្រូវទេនោះ កម្ពុជា នឹងមានឈ្មោះថា ជាប្រទេសពាក់ស្រោមប្រជាធិបតេយ្យ តែខ្លឹមសារខាងក្នុងជារបបផ្ដាច់ការ បក្ខពួកនិយម និងគ្រួសារនិយមដូចនៅប្រទេសកូរ៉េខាងជើង។
កាលពីខែកុម្ភៈ លោក ហ៊ុន សែន បានបញ្ចូលយុវជនជំនាន់ក្រោយដែលជាកូនរបស់មន្ត្រីមានអំណាចជាច្រើន ទៅក្នុងសមាសភាពគណៈកម្មាធិការអចិន្ត្រៃយ៍របស់គណបក្សប្រជាជនកម្ពុជា។ ក្នុងចំណោមសមាជិកថ្មីទាំង ៣០៦នាក់ មាន ៧០នាក់ គឺស្មើនឹង ២២ភាគរយ ជាសមាសភាពយុវជនដែលគេទើបបញ្ចូលថ្មី។
មេដឹកនាំចលនាយុវជនក្រៅប្រព័ន្ធ លោក សន តារា មានប្រសាសន៍ថា ការបញ្ចូលចំនួនយុវជនដ៏ច្រើននេះ ទំនងដូចជាការរៀបចំទុករួចជាស្រេចក្នុងការបង្កើនសំឡេងរបស់ខ្លួនសម្រាប់គ្រប់គ្រងលើគណៈអចិន្ត្រៃយ៍បក្សទាំងមូល និងអាចត្រៀមឆ្ពោះទៅរកការសម្រេចឲ្យ លោក ហ៊ុន ម៉ាណែត ជាបេក្ខភាពនាយករដ្ឋមន្ត្រីនៅថ្ងៃណាមួយដែលឱកាសមកដល់៖ «ការបញ្ចូលហ្នឹងអាចជាយុទ្ធសាស្ត្រមួយដែរ ពីព្រោះអាហ្នឹងធម្មតា គណបក្សជាអ្នកតែងតាំង ហើយអាចជាយុទ្ធសាស្ត្រក្នុងការបង្កើនកម្លាំងរបស់លោកនាយករដ្ឋមន្ត្រី ហ៊ុន សែន ហើយគាត់ចង់មានការតែងតាំងកូនគាត់ គឺមានសំឡេងគ្រប់តែម្តង»។
លោកបន្តថា ការរៀបចំទាយាទរបស់ លោក ហ៊ុន សែន ទំនងជាបានជោគជ័យច្រើនដូចការគ្រោងទុករបស់លោក គឺនៅគ្រាដែលប្រធានគណបក្សប្រជាជនកម្ពុជា និងជាប្រធានព្រឹទ្ធសភា លោក ជា ស៊ីម បានស្លាប់ ដោយសាររោគាពាធ។
មរណភាពរបស់ លោក ជា ស៊ីម ហាក់ធ្វើឲ្យ លោក ហ៊ុន សែន កាន់តែមានឥទ្ធិពលប្រៀបដូចជារាជិសីដុះស្លាប និងប្រៀបដូចជាការដកបន្លាចេញពីកែវភ្នែក ដោយសារអំណាចប្រឆាំងក្នុងជួរគណៈអចិន្ត្រៃយ៍របស់គណបក្សប្រជាជនកម្ពុជា កាន់តែចុះទន់ខ្សោយ ហើយអាចនាំឲ្យ លោក ហ៊ុន សែន អាចជិះសេះលែងដៃបានយ៉ាងងាយ។
ភាពតានតឹងរវាង លោក ហ៊ុន សែន និងលោក ជា ស៊ីម ធ្លាប់កើតមានឡើងកន្លងមក ដែលគេនៅចាំបានថា ក្នុងពេលកម្ពុជា ជាប់គាំងនយោបាយនៅក្រោយការបោះឆ្នោតជ្រើសតាំងតំណាងរាស្ត្រឆ្នាំ២០០៣ លោកនាយករដ្ឋមន្ត្រី ហ៊ុន សែន បានជំរុញឲ្យមានការកែប្រែរដ្ឋធម្មនុញ្ញ ដោយបង្កើតនូវរដ្ឋធម្មនុញ្ញបន្ថែមមួយ ធានាឲ្យមានការបោះឆ្នោតជាកញ្ចប់ ដើម្បីបង្កើតរដ្ឋាភិបាលថ្មីតាមរយៈការបោះឆ្នោតជ្រើសរើសថ្នាក់ដឹកនាំរដ្ឋសភា និងនាយករដ្ឋមន្ត្រីក្នុងពេលតែមួយ ដែលអ្នកវិភាគ និងអ្នកច្បាប់និយាយថា ជាការធ្វើរដ្ឋប្រហាររដ្ឋធម្មនុញ្ញ។ យ៉ាងណាក៏ដោយ ក្នុងនាមជាប្រមុខរដ្ឋស្តីទីនៅពេលនោះ លោក ជា ស៊ីម មិនព្រមចុះហត្ថលេខាលើរដ្ឋធម្មនុញ្ញបន្ថែមនោះទេ។
ក្នុងពេលប្រឈមមុខគ្នានោះ លោក ជា ស៊ីម ក៏ត្រូវបាន លោក ហុក ឡង់ឌី អតីតអគ្គស្នងការនគរបាលជាតិ បង្ខំឲ្យចាកចេញទៅទីក្រុងបាងកក ប្រទេសថៃ ដើម្បីយកឱកាសនោះទុកឲ្យ លោក ញឹក ប៊ុនឆៃ ដែលពេលនោះជាអនុប្រធានព្រឹទ្ធសភា ចុះហត្ថលេខាលើរដ្ឋធម្មនុញ្ញបន្ថែមនោះនៅថ្ងៃទី១៣ ខែកក្កដា ឆ្នាំ២០០៤។
បើទោះជាគណបក្សប្រជាជនកម្ពុជា អះអាងនៅពេលនោះថា លោក ជា ស៊ីម ទៅក្រៅប្រទេសដើម្បីព្យាបាលជំងឺក៏ដោយ ប៉ុន្តែការចាកចេញរបស់លោកនៅពេលនោះ ត្រូវបានគេមើលឃើញថាជាការខ្វែងគំនិតគ្នារវាង លោក ជា ស៊ីម និងលោក ហ៊ុន សែន។
ក្រុមអ្នកឃ្លាំមើលនិយាយថា បរិបទនយោបាយរបស់កម្ពុជា នៅរយៈពេលចុងក្រោយនេះ អាចជំរុញឲ្យផែនការទាយាទរបស់ លោក ហ៊ុន សែន ធ្វើដំណើរទៅមុខយ៉ាងរលូនដោយគ្មានការភ័យខ្លាច បើទោះបីជាចំហាយអំណាចរបស់ លោក ជា ស៊ីម នៅមានតិចតួចក៏ដោយ ក៏វាមិនមែនជាឧបសគ្គនោះដែរ។
ក្រៅពីមានអំណាចសស្ត្រាវុធដ៏សម្បើម ជាមេដឹកនាំបក្សកាន់អំណាចអមទៅដោយកម្លាំងចារកម្មយ៉ាងច្រើន និងមានមហាសេដ្ឋីទុច្ចរិតក្នុងស្រុកសម្រាប់រកចំណូលបំប៉នទៀតនោះ លោក ហ៊ុន សែន ប្រហែលជានឹងមិនរារែកទេក្នុងការសម្រេចបំណងធំរបស់លោក គឺការប្រគល់នាទីនាយករដ្ឋមន្ត្រីឲ្យទៅកូនប្រុសច្បងរបស់លោក៕
No comments:
Post a Comment