ដោយ៖ ញឹម សុខន | ថ្ងៃព្រហស្បតិ៍ ទី11 មិថុនា 2015,
ស្តាប់សំឡេង៖ | ចម្លងទុក |
សាស្ត្រាចារ្យនយោបាយមួយចំនួន បង្ហាញការយល់ឃើញថា មន្ត្រីស្និទ្ធនឹងលោក ជា ស៊ីម នឹងត្រូវលោក ហ៊ុន សែន យកចិត្តវិញ ដើម្បីពង្រឹងផ្ទៃក្នុងបក្ស ខណៈអាណត្តិទី៥នេះ បក្សប្រឆាំង ដណ្តើមបានអាសនៈក្នុងសភា ប្រហាក់ប្រហែលនឹងបក្សកាន់អំណាច ។
លទ្ធផលបោះឆ្នោតអាណត្តិទី៥នេះ បក្សកាន់អំណាចទទួលបាន៦៨អាសនៈ បក្សប្រឆាំងបាន ៥៥អាសនៈ ក្នុងចំណោមអាសនៈសរុប១២៣ ពោលគឺគណបក្សប្រជាជនកម្ពុជា បាត់អស់២២អាសនៈ ។
សាស្ត្រាចារ្យប្រវត្តិសាស្ត្រនយោបាយ លោក សូ ចន្ថា ឲ្យ VOD ដឹងនៅថ្ងៃទី១១ ខែមិថុនា ឆ្នាំ២០១៥ នេះថា ការបាត់បង់សំឡេងគាំទ្ររបស់បក្សកាន់អំណាចនេះ ធ្វើឲ្យលោកនាយករដ្ឋមន្ត្រី ហ៊ុន សែន ដែលលោកថា ធ្លាប់តែរៀបចំយុទ្ធសាស្ត្របន្សាបឥទ្ធិពលមេរបស់ខ្លួន គឺលោក ជា ស៊ីម នោះនឹងងាកមកគិតពីការពង្រឹងផ្ទៃក្នុងបក្សឡើងវិញ ។
លោកបន្តថា «តាមការមើលឃើញ របស់ខ្ញុំ អ្វីដែលជាការរៀបចង់ គឺគាត់ចង់កម្ទេចក្រុមលោកជាស៊ីមតែម្តងគឺមិនអាចទៅរួចប្រសិនបើកម្ទេចទៅ ដកតួនាទី ពេលនេះ អាចនឹងមានប្រះឆាផ្ទៃក្នុងគណបក្សប្រជាជន អញ្ជឹងហើយបានវៀតណាម ម៉ោដោយឆាប់រហ័ស ហើយមិនមែនជាការចៃដនទេគឺជាការរៀបចំទុកមុន ពីព្រោះឱកាសនេះ ឲ្យកាន់តែយូទៅគណបក្សប្រជាជនអាចនឹងប្រះឆាផ្ទៃក្នុង» ។
លោក សូ ចន្ថា ឲ្យដឹងទៀតថា បរិបទនេះបើលោក ហ៊ុន សែន នៅតែធ្វើឲ្យមន្ត្រីស្និទ្ធនឹងលោក ជា ស៊ីម នៅតែបន្តបាត់បង់ទំនុកចិត្ត មន្ត្រីមួយចំនួននឹងអាចដើរចេញពីជួរបក្ស ។ លោកថា ពេលនោះចំណុចគ្រោះថ្នាក់របស់បក្សកាន់អំណាចមួយនេះ នឹងមកដល់ ។ ប៉ុន្តែលោក សូ ចន្ថា គិតថាលោក ហ៊ុន សែន ទំនងជាមិនចង់ឃើញរូបភាពបែបនេះកើតឡើងក្នុងជួរគណបក្សប្រជាជនកម្ពុជាទេ ។
សាស្ត្រាចារ្យនយោបាយ លោក រស់ រ៉ាវុធ លើកឡើងថា តំណែងលោក ស ខេង ជារដ្ឋមន្ត្រីក្រសួងមហាផ្ទៃ ជាតុល្យភាពអំណាចមួយនៅក្នុងបក្សប្រជាជនកម្ពុជា បើទោះបីជាលោក ជា ស៊ីម ទទួលមរណភាព ។ ប៉ុន្តែលោកថា បច្ចុប្បន្ននេះបើផ្ទៃក្នុងបក្សនៅតែរង្គោះរង្គើ នោះបក្សកាន់អំណាចមួយនេះ នឹងជួបគ្រោះភ័យ ស្របពេលដែលបក្សប្រឆាំងកំពុងវាយលុកដណ្តើមប្រជាប្រិយនោះ ។
លោកបន្តថា «បច្ចុប្បន្ននេះគឺមិនដូចសម័យមុនទេគឺដោយសាការកើនឡើងនៃសំឡេងឆ្នោតរបស់គណបក្សប្រឆាំង អញ្ចឹងមិនអាចធ្វើឲ្យគណបក្សប្រជាជនបែកបាក់បានទេ គឺមានតែរួបរួមគ្នាទេ» ។
អតីតប្រធានគណបក្សប្រជាជនកម្ពុជា លោក ជា ស៊ីម បានទទួលមរណភាពកាលពីថ្ងៃទី៨ ខែមិថុនា ឆ្នាំ២០១៥ ដោយរោគាពាធ ក្នុងជន្មាយុ៨៣ឆ្នាំ ដែលតំណែងនេះ អ្នកនាំពាក្យគណបក្សអះអាងថា លោក ហ៊ុន សែន ដែលជាប្រធានស្តីទី នឹងឡើងកាន់តំណែងមេបក្សដោយស្វ័យប្រវត្តិ ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន បានចាត់ទុកថា ការទស្សទាយណាមួយថាបក្សកាន់អំណាច អាចនឹងបែកបាក់ផ្ទៃក្នុង លោកថា ស្មើនឹងការដេកស្រម៉ៃ។ លោកថា ការរៀបចំក្បាលម៉ាស៊ីនដឹកនាំរបស់គណបក្សប្រជាជនវិញ ក៏មិនស្ថិតក្រោមបង្គាប់បញ្ជារបស់វៀតណាមដូចការចោទប្រកាន់ដែរ ។ លោកថា «ការរង្គោះរង្គើនេះ គេមិនមែននិយាយតែឥឡូវទេ គេនិយាយតាំងពីទស្សវត្តន៍៨០មកម្លេះ ក៍ប៉ុន្តែរយៈពេល៣០ផ្លាយហើយ គណបក្សប្រជាជនមិនដែលមានការរង្គោះរង្គើម្តងណា ដូចការលើកឡើងរបស់ក្រុមមហិច្ឆតាមួយចំនួនទេ ពិសេសគឺមិនយល់អំពីផ្ទៃក្នុងរបស់បក្ស» ។
កន្លងទៅមន្ត្រីជាន់ខ្ពស់មួយចំនួន ដែលស្និទ្ធនឹងលោក ជា ស៊ីម ត្រូវដកចេញពីតំណែង និងខ្លះទៀតត្រូវចាប់ដាក់ពន្ធនាគារ ដូចជា អគ្គមេបញ្ជាការកងទ័ព លោក កែ គឹមយ៉ាន ត្រូវដកចេញពីតំណែង អតីប្រធានអង្គរក្សឧត្តមសេនីយផ្កាយ៣ លោក ឈឿន ចាន់ថន និងប្រធានពិធីការ ទំនាក់ទំនងអន្តរជាតិ លោកស្រី ផេង គន្ធាបុរី ព្រមទាំងមន្ត្រីផ្សេងទៀតត្រូវចាប់ដាក់ពន្ធនាគារជាដើម ៕
សូមសរសេរមកលោក ញឹម សុខន តាមរយៈ sokhorn@vodhotnews.com
No comments:
Post a Comment