ដោយ៖ ណាត សុភាព | ថ្ងៃសុក្រ ទី12 មិថុនា 2015,
ស្តាប់សំឡេង៖ | ចម្លងទុក |
ប្រជាពលរដ្ឋជាង៣០០នាក់ បានជជែកគ្នាពីនេះ ពីនោះ ខណៈពួកគេធ្វើដំណើរចូលទៅពិនិត្យតំបន់ព្រំដែនដែលកំពុងប្រទាញប្រទង់គ្នារវាងកម្ពុជា និងវៀតណាម ដែលអ្នកភូមិអះអាងថា តំបន់នោះវៀតណាមគ្រប់គ្រងរយៈពេល៨ឆ្នាំហើយ ។
តំបន់ប្រទាញប្រទង់គ្នានោះ មានចំងាយប្រមាណ១០០គីឡូម៉ែត្រ ពីទីរួមខេត្តរតនគិរី ទៅដល់ ភូមិឡំ ឃុំប៉ក់ញ៉ៃ ស្រុកអូរយ៉ាដាវ ។
សម្បុរខ្មៅ រាងកាយស្គម ជាជនជាតិចារាយ លោក សុល ហ្នើច ដែលអះអាងថា ត្រូវបានវៀតណាមទន្ទ្រានយកដីចំការដូនតារបស់ពួកគាត់ចំនួន៣ឆ្នាំ បានរៀបរាប់តាមរយៈអ្នកបកប្រែថា ដីដែលស្ថិតនៅក្នុងភូមិឡំនោះ ត្រូវបានអាជ្ញាធរវៀតណាមទន្ទ្រានយកពីជនជាតិដើមភាគតិចចំនួន៩គ្រួសារ ក្នុងមួយគ្រួសារយ៉ាងតិច១ហិចតាឡើងទៅ ។ ក្នុងវ័យ៨២ឆ្នាំ លោកអះអាងថា រយៈពេល៨ឆ្នាំហើយ ដែលអាជ្ញាធរវៀតណាមវាតទីយកដីនោះ ហើយប្រជាពលរដ្ឋខ្មែរមិនហ៊ានតវ៉ានោះទេ ។ លោកថា «គាត់ធ្វើថាម៉េចកុំឲ្យគេឈ្លានពាន គេដណ្តើមយកដីយើង ព្រោះអីយើងជាពលរដ្ឋមិនអាចធ្វើអីកើតទេ ពេលណាយួនវាចុះដេញយើង ហើយកាលហ្នឹង គាត់ថា គាត់ស្នាក់នៅភូមិឡំ ដូច្នេះហើយគាត់រត់ចោលចំការគាត់ យួនចេះតែខិតចូលៗ ។ អ៊ីចឹងមកដល់សព្វថ្ងៃនេះ គឺអស់ច្រើនហើយ គាត់ថាអ៊ីចឹង» ។
ក្នុងសម្លៀកបំពាក់ជាអ្នកចំការ ឈរនៅក្រោមកម្តៅថ្ងៃ ដែលញើសហូររហាម លោក សេវ ត្មាន ប្រាប់អ្នកយកព័ត៌មាន VOD នៅកន្លែងមានជម្លោះនោះថា បច្ចុប្បន្ននេះវៀតណាមបានគ្រប់គ្រងតំបន់នោះដោយជីកស្រះចំនួន៧ ដែលមានទំហំទទឹង៧ម៉ែត្រ បណ្តោយ១៣ម៉ែត្រ និងជម្រៅ៤ម៉ែត្រ ដើម្បីស្តុកទឹកទុកស្រោចស្របលើដាំណាំកៅស៊ូ ដើមស្វាយចន្ទី ម្រេច និងដំឡូងជាដើម ។ លោកថា នៅពេលពួកគាត់បាត់បង់ដីនោះ ធ្វើឲ្យពួកគេជួបបញ្ហាប្រឈមជាច្រើនជាពិសេសជីវភាពគ្រួសារ ព្រោះគ្មានដីប្រកបមុខរបរចិញ្ចឹមជីវិត ។ លោកបន្ថែមថា «ឲ្យមានដីដាំដំឡូង ជាពិសេសដីស្រែ ដោយដីហ្នឹងជិតអស់ហើយ ឲ្យមានដីស្រែផង ដីហ្នឹងដីចំការពិតមែន» ។
ឈរនៅជ្រុងម្ខាងនៅក្នុងតំបន់ដែលកំពុងប្រទាញប្រទង់គ្នានោះ លោក ស៊ុល រ៉ាពីន ប្រាប់អ្នកយកព័ត៌មានទាំងសោកស្តាយថា មូលហេតុដែលវៀតណាមទន្ទ្រានយកដីចំការរបស់ជនជាតិដើមភាគតិចនៅភូមិឡំ ឃុំប៉ក់ញ៉ៃ ស្រុកអូរយ៉ាដាវ ដោយសារអាជ្ញាធរកម្ពុជាបើកដៃឲ្យ ។ លោកថា «… ប៉ុន្តែខ្មែរ(អាជ្ញាធរ)នៅនេះ គេមិនខ្វល់ គេធ្វើព្រងើយ ។ ខាងអាជ្ញាធរដូចជាមេភូមិ ប៉ូលិសអីពេញទំហឹងតែម្តង បើថាស៊ីលុយយួនហ្នឹង គឺចប់ហើយដែលខ្មែរមិនសូវចេះមើលទេ កាន់តែកាន់ជើងយួនទៀត ព្រោះអីយួនតែងតេផ្តល់លុយវាបន្តិចបន្តួចអ៊ីចឹង ដល់ហើយភ្លេចខ្មែរខ្លួនឯង ។ ប៉ុន្តែខ្ញុំមួយចំនួនទេ ខ្ញុំនិយាយហ្នឹង» ។
មន្ត្រីសម្របសម្រួលនៃសមាគមការពារសិទ្ធិមនុស្សអាដហុក ប្រចាំខេត្តរតនគិរី ដែលឃ្លាំមើលករណីព្រំដែននោះ លោក ឆាយ ធី យល់ថា តាមកិច្ចព្រមព្រៀងនៃប្រទេសទាំងពីរ នៅតំបន់ស គឺភាគីទាំងពីរពុំអាចចូលធ្វើការអភិវឌ្ឍ ឬគ្រប់គ្រងបានទេ ដោយទុកចន្លោះចាប់ពី១គីឡូម៉ែត្រម្ខាងម្នាក់ ។ លោកថា បើរដ្ឋាភិបាល និងរដ្ឋសភា មិនធ្វើកិច្ចអន្តរាគមន៍លើករណីនេះទេ នោះបញ្ហាប្រឈមនឹងបន្តកើតមាននៅថ្ងៃខាងមុខ ដោយសារប្រជាពលរដ្ឋខ្មែរមិនអស់ចិត្ត ហើយនៅតែតវ៉ាលើករណីនេះ ។ លោកថា «ប្រសិនជាមិនបានដោះស្រាយតាមកំនត់ការទូតច្បាស់លាស់ទេ គឺនឹងមានបញ្ហាហិង្សាពីព្រំដែន យើងឃើញជាក់ស្តែងថ្ងៃដែលចុះទៅ ថ្ងៃទី៨ វៀតណាមសុទ្ធតែត្រៀមបម្រុងទុក ដូចជាមានប្រដាប់ដោយកាំភ្លើងអាកា មានតាំងពីដំបងឆក់ មានតាំងពីប្រើឆ្កែកាចអីជាដើម ដែលយើងឃើញជាបញ្ហាគ្រោះថ្នាក់ទៅថ្ងៃអនាគត» ។
អ្នកយកព័ត៌មាន VOD ដែលចុះតាមដានព្រឹត្តិការណ៍នេះ សង្កេតឃើញថា តំណាងរាស្ត្រគណបក្សសង្គ្រោះជាតិខេត្តកំពង់ចាម លោក ម៉ៅ មុនីវណ្ណ បានដឹកនាំព្រះសង្ឃ ជនជាតិដើមភាគតិច និងក្រុមយុវជនប្រមាណជាង៣០០នាក់ ទៅពិនិត្យនៅតំបន់ប្រទាញប្រទង់គ្នារវាងកម្ពុជាវៀតណាម កាលពីថ្ងៃទី៨ ខែមិថុនា ឆ្នាំ២០១៥ នៅគ្រានោះប្រជាពលរដ្ឋខ្មែរបានប៉ះពាល់ពាក្យសម្តីគ្នាជាមួយអាជ្ញាធរ និងប្រជាជនពលរដ្ឋវៀតណាមប្រមាណជិត២ម៉ោង ខណៈពួកគេសុំអាជ្ញាធរចុះទៅពិនិត្យតំបន់ដែលវៀតណាមជីកស្រះចំនួន៧ នៅលើដីកម្ពុជា តែអាជ្ញាធរវៀតណាមបដិសេធ ។ ប៉ុន្តែទោះជាយ៉ាងណា ពលរដ្ឋខ្មែរ និងជនជាតិដើមភាគតិចនៅតែបន្តចូលទៅកន្លែងមានជម្លោះនោះ ហើយមើលបានស្រះចំនួន៣កន្លែងតែប៉ុណ្ណោះ ។ នៅថ្ងៃនោះដែរ អាជ្ញាធរវៀតណាមប្រមាណជាង១០នាក់ ដៃកាន់កាំភ្លើងអាការ ដំបងឈើ ដំបងឆក់ និងសត្វឆ្កែមួយក្បាល សម្រាប់រារាំងឲ្យពលរដ្ឋខ្មែរ និងជនជាតិដើមភាគតិចចូលទៅតំបន់កំពុង ប្រទាញប្រទង់គ្នា ។
បើតាមអ្នកបកប្រែរបស់អាជ្ញាធរវៀតណាមឲ្យដឹងថា វៀតណាមថាដីនោះជាតំបន់ស ហេតុនេះពួកគេមានសិទ្ធិគ្រប់គ្រងនៅតំបន់នោះ ។ អ្នកបកប្រែបន្តថា បើក្រុមតំណាងរាស្ត្រចង់ដោះស្រាយបញ្ហានេះ សូមឲ្យដោះស្រាយតាមការទូតរវាងប្រទេសទាំងពីរ ។ លោកថា «គាត់ថាកន្លែងហ្នឹងជាតំបន់ស មិនទាន់បានបោះបង្គោលព្រំដែនបានជាក់លាក់ អ៊ីចឹងកន្លែងហ្នឹងគឺយួនធ្វើជាយូរណាស់មកហើយ អ៊ីចឹងយួនចូលកាន់កាប់ ។ ហើយឥឡូវចាំដល់រដ្ឋាភិបាលទាំងពីរប្រទេស បោះបង្គោលព្រំដែនរួចរាល់ហើយ ដីចូលខាងណា ខាងហ្នឹងគ្រប់គ្រង ឥឡូវហ្នឹងគេគ្រប់គ្រង ហើយបើសិនជាអស់លោកចង់ប្រឆាំង ចង់តវ៉ាអី ទាល់តែតវ៉ាតាមបែបការទូត» ។
តំណាងរាស្ត្រគណបក្សសង្គ្រោះជាតិ លោក ម៉ៅ មុនីវណ្ណ ដែលដឹកនាំព្រះសង្ឃ ប្រជាពលរដ្ឋទៅមើលតំបន់នោះថ្លែងថា វៀតណាមធ្វើខុសច្បាប់ ។ លោកថា បើតំបន់នោះពិតជាតំបន់សដូចការអះអាងរបស់វៀតណាមមែន គឺវៀតណាមគ្មានសិទ្ធិចូលទៅកាន់កាប់តំបន់នោះទេ ព្រោះប្រទេសទាំងពីរពុំទាន់បានដោះស្រាយនៅឡើយ ។ លោកថា «កន្លែងនេះ យើងនៅចាត់ទុកថាដីខ្មែរនៅឡើយ ព្រោះជាតំបន់ប្រទាញប្រទង់ មិនទាន់ដាច់បានទៅវៀតណាម ឬបានមកកម្ពុជាទេ»។
អ្នកនាំពាក្យសាលាខេត្តរតនគិរី លោក ម៉ឹង ស៊ីថា អះអាងថា ខេត្តបានធ្វើរបាយការណ៍ទៅថ្នាក់ជាតិរួចហើយ ព្រោះខេត្តមិនមានសមត្ថភាពដោះស្រាយទេ ។ លោកបញ្ជាក់ថា «កិច្ចការហ្នឹង ខេត្តបានរៀបចំធ្វើរបាយការណ៍ទៅថ្នាក់ជាតិហើយ មិនមែនផ្អែកលើអាជ្ញាធរខេត្តទេ អាហ្នឹងយើងគ្រាន់តែផ្ញើរបាយការណ៍ទៅថ្នាក់ជាតិ ដើម្បីគាត់ដឹកនាំកិច្ចប្រជុំក្រុមការងារគាត់យ៉ាងម៉េច»។
ដោយឡែក នៅក្នុងថ្ងៃជាមួយគ្នានោះដែរ លោក ម៉ៅ មុនីវណ្ណ ក៏បានបន្តដឹកនាំព្រះសង្ឃ ប្រជាពលរដ្ឋ ឆ្ពោះទៅកាន់ច្រកព្រំដែនអន្តរជាតិស្រុកអូរយ៉ាដាវ ខេត្តរតនគិរី ដែលមានប្រវែងប្រមាណជាង២០គីឡូម៉ែត្រពីភូមិឡំ ឃុំប៉ក់ញ៉ៃ ។ លោក ម៉ៅ មុនីវណ្ណ អះអាងថា បង្គោលព្រំដែនដោយនាយករដ្ឋមន្ត្រី ហ៊ុន សែន និងរដ្ឋាភិបាលវៀតណាមកាលពីឆ្នាំ២០១១នោះ គឺតាមសន្ធិសញ្ញាបំពេញបន្ថែម២០០៥ និងប្រើផែនទីក្លែងក្លាយធ្វើឲ្យបាត់បង់ដីខ្មែរ ប្រមាណជិត៥០គីឡូម៉ែត្រទៅឲ្យវៀតណាម ។ លោកបន្ថែមថា «អាហ្នឹងបើយើងប្រៀបធៀបហ្នឹងព្រំដែនបង្គោលឡាក់ជំនាន់បារាំង នៅរហូតជាង៤០គីឡូម៉ែត្រទៀត ខ្ញុំគិតថា ជិត៥០គីឡូម៉ែត្រផង សួរតែប៉ូលិសក៏គាត់ដឹងដែរ នៅមណ្ឌលគិរីក៏ដូចគ្នាអ៊ីចឹងដែរ វាមានបង្គោលឡាក់ជំនាន់បារាំង ប៉ុន្តែនេះជាការកំនត់រវាងរដ្ឋាភិបាលទាំងពីរ» ។
ពាក់ព័ន្ធនឹងបញ្ហាព្រំដែននេះ លោកនាយករដ្ឋមន្ត្រី ហ៊ុន សែន កាលពីថ្ងៃទី៨ ខែមិថុនានេះ បានបង្ហាញការខឹងសម្បារនឹងការលើកឡើងរបស់តំណាងរាស្ត្រគណបក្សសង្គ្រោះជាតិ ដែលចោទថា រដ្ឋាភិបាលប្រើផែនទីក្លែងក្លាយ ដើម្បីបោះបង្គោលព្រំដែនជាមួយវៀតណាម ។ លោកអះអាងថា លោកបានបំភ្លឺរួចអស់ហើយកាលពីឆ្នាំ២០១២ ពាក់ព័ន្ធនឹងបញ្ហាព្រំដែនជាមួយប្រទេសវៀតណាមនេះ ។
លោក ហ៊ុន សែន ថ្លែងថា «ប្រធាន(លោក សម រង្ស៊ី)គ្រប់គ្រងបក្ស សមាជិកបក្សមិនបាន រហូតហ៊ានចោទថា រាជរដ្ឋាភិបាលប្រើផែនទីក្លែងក្លាយ អ្នកណាក្លែងក្លាយ អ្នកណាមិនក្លែងក្លាយ? និយាយគ្នាឲ្យច្បាស់ ធ្វើដល់រាជរដ្ឋាភិបាលមកប្រើផែនទីក្លែងក្លាយ? ស្នេហាជាតិអីតែលោកឯង ខ្ញុំបានឆ្លើយ[បំភ្លឺ]៥ម៉ោងជាង ទៅយកអាហ្នឹងមកមើលឡើងវិញ ឬក៏ត្រូវការឲ្យទូរទស្សន៍ជាតិជាក់ ទូរទស្សន៍ទាំងអស់ចាក់ឡើងវិញ ខ្ញុំស្នើឲ្យចាប់ផ្តើមពីល្ងាចហ្នឹងតែម្តង ចាក់ឡើងវិញ នូវអ្វីដែលខ្ញុំឆ្លើយនៅហ្នឹង(រដ្ឋសភា) ផែនទីពីណាអីពីណា កុំយកល្បែងក្មេងយកមកលេង ។ ឥឡូវខ្ញុំថា បើពិបាកពេក មានវិធីតែម្យ៉ាងគត់ គឺថាស្បថឲ្យរន្ទះបាញ់តែម្តង ខែនេះរន្ទះច្រើនណាស់» ។
គួររំឭកថា បញ្ហាព្រំដែននេះបានចាប់ផ្ដើមកម្រើកឡើងវិញ បន្ទាប់ពីតំណាងរាស្ត្របក្សប្រឆាំង បានផ្ញើលិខិតទៅប្រធានរដ្ឋសភា ឲ្យចេញកិច្ចអន្តរាគមន៍ទៅក្រសួងការបទេស ក្រោយពីបានចុះពិនិត្យផ្ទាល់នៅកន្លែងកើតហេតុ រកឃើញថាដំណាំ១០ហិកតារបស់កសិករខ្មែរ៩គ្រួសារនៅខេត្តត្បូងឃ្មុំ ត្រូវបានបំផ្លាញដោយអាជ្ញាធរវៀតណាម តែលោក ហោ ណាំងហុង អះអាងថា មកពីកសិករខ្មែរទៅដាំដំណាំលើដីវៀតណាម ។ ជាបន្តបន្ទាប់ទៀត តំណាងរាស្ត្រគណបក្សសង្គ្រោះជាតិ បានស្នើឲ្យលោក វ៉ា គឹមហុង ប្រធានគណៈកម្មាធិការព្រំដែនកម្ពុជាបង្ហាញផែនទី ដែលយកមកប្រើសម្រាប់បោះបង្គោលព្រំដែនជាមួយវៀតណាម ដោយពួកគេអះអាងថា ការកំណត់ព្រំដែនកន្លងមកតាមសន្ធិសញ្ញាបំពេញបន្ថែមឆ្នាំ២០០៥ ធ្វើឲ្យមានការបាត់បង់ទឹកដីខ្លះទៅវៀតណាម ។ ប៉ុន្តែលោក វ៉ា គឹមហុង អះអាងថា សន្ធិសញ្ញានេះធ្វើឲ្យកម្ពុជាចំណេញបានប្រើខ្សែទឹករួមគ្នា ។
លោកនាយករដ្ឋមន្ត្រី ហ៊ុន សែន បានស្នើទៅភាគីវៀតណាមឲ្យរក្សាភាពស្ងប់ស្ងាត់ ខណៈបញ្ហាព្រំដែននៅពេលនេះ បានចាប់ផ្ដើមកម្រើកឡើងវិញរួមមាន ព្រំដែននៅខេត្តត្បូងឃ្មុំ នៅតំបន់តន់ហន់ក្នុងខេត្តកំពត តំបន់ភ្នំដិនក្នុងខេត្តតាកែវ និងច្រកព្រំដែនអន្តរជាតិ ស្រុកអូរយ៉ាដាវ ខេត្តរតនគិរី ដែលតំណាងរាស្ត្របក្សប្រឆាំង កោះហៅមន្ត្រីរដ្ឋាភិបាលឲ្យបំភ្លឺ និងផ្តល់ផែនទីបោះបង្គោលព្រំដែននោះ ៕
សូមសរសេរមក លោក ណាត សុភាព តាមរយៈ sopheap@vodhotnews.com
1 comment:
Khmer authorities that corrupted taking money from Yuon and allow Yuon take Khmer's Land, those scumbag authorities should be caught and executed immediately.
Post a Comment