Posted by DTN7 on May 15, 2015
គណៈកម្មាធិការជាតិរៀបចំការបោះឆ្នោត (គ.ជ.ប)ថ្មី ដែលមានឯកឧត្តម ស៊ិក ប៊ុនហុក មកពីគណបក្សប្រជាជនកម្ពុជា(CPP) ជាប្រធាន បានបង្កើតគណៈកម្មការចំពោះកិច្ចមួយ ទទួលបន្ទុកសហការជាមួយសហភាពអឺរ៉ុប និងប្រទេសជប៉ុន លើការងាររៀបចំចុះឈ្មោះបោះឆ្នោត និងបញ្ជីបោះឆ្នោតថ្មី ដោយសេចក្តីសម្រេចលេខ០១៦/១៥គជប.សសរ ចុះថ្ងៃទី១១ ខែឧសភា ឆ្នាំ២០១៥ មានសមាសភាពចំនួន៦នាក់ ក្នុងនោះសមាសភាពមកពីគណបក្ស CPP ចំនួន៣នាក់ និងសមាសភាពមកពីគណបក្សសង្គ្រោះជាតិ(CNRP) ចំនួន២នាក់ ព្រមទាំងម្នាក់ទៀតមកពីការជ្រើសរើសរបស់ CPP និង CNRP ដែលមានអាសនៈនៅក្នុងរដ្ឋសភានីតិកាល ទី៥ ។
សមាសភាពគណៈកម្មការចំពោះកិច្ចទាំង៦នាក់នោះ រួមមាន ៖ ១-ឯកឧត្តម គួយ ប៊ុនរឿន អនុប្រធាន គ.ជ.ប(CNRP) ជាប្រធាន, ២-ឯកឧត្តម ឯម សូផាត សមាជិក គ.ជ.ប(CPP)ជាអនុប្រធាន, ៣-ឯកឧត្តម ឌុច សុន សមាជិក គ.ជ.ប(CPP) ជាសមាជិក, ៤-ឯកឧត្តម ហ៊ីង ធីឫទ្ធិ សមាជិក គ.ជ.ប(CNRP)ជាសមាជិក, ៥-ឯកឧត្តម ហង្ស ពុទ្ធា សមាជិក គ.ជ.ប(ជ្រើសរើសដោយCPP និងCNRP) និងជាអ្នកនាំពាក្យ គ.ជ.ប ជាសមាជិក និង៦-ឯកឧត្តម មាន សទិ សមាជិក គ.ជ.ប(CPP)ជាសមាជិក ។ មានន័យថា សមាសភាពមកពី CPP ចំនួន៣នាក់ និងសមាសភាពមកពី CNRP ចំនួន២នាក់ ពោលគឺ CPP លប់លើ CNRP ។
មជ្ឈដ្ឋានអ្នកតាមដានដំណើរការបោះឆ្នោតជ្រើសតាំងតំណាងរាស្ត្រ និងការបោះឆ្នោតជ្រើសរើសក្រុមប្រឹក្សាឃុំ/សង្កាត់នៅកម្ពុជានាពេលកន្លងមកជាហូរហែច្រើនអាណត្តិ បានលើកឡើងថា សមាសភាព គ.ជ.ប ថ្មីបច្ចុប្បន្នមានចំនួន៩នាក់ ក្នុងនោះសមាសភាពមកពី CPP និង CNRP មានចំនួន៤នាក់ម្ខាងៗស្មើគ្នារួចទៅហើយ ។ ដូច្នេះ ការបង្កើតគណៈកម្មការនានាដែលជ្រើសចេញពីសមាជិក គ.ជ.ប ជាពិសេសគណៈកម្មការទទួលបន្ទុករៀបចំចុះឈ្មោះបោះឆ្នោត និងបញ្ជីបោះឆ្នោតថ្មីដែលជាចំណុចសំខាន់នៃតួនាទីរបស់ គ.ជ.ប នោះ គួរតែមានសមាសភាពមកពី CPP និងCNRP ក្នុងចំនួនស្មើគ្នា ទើបជាការប្រសើរ និងធានាដំណើរការមានតម្លាភាព ។
តើប្រិយមិត្តអ្នកអានយល់ឃើញយ៉ាងណាដែរចំពោះការបង្កើតគណៈកម្មការចំពោះកិច្ចរៀបចំចុះឈ្មោះបោះឆ្នោត និងបញ្ជីឈ្មោះបោះឆ្នោតថ្មី របស់ គ.ជ.ប ដែលមានសមាសភាព CPP លប់លើ CNRP យ៉ាងស្រស់ៗដូច្នេះ ? ៕
No comments:
Post a Comment