ដោយ៖ ស៊ុន ណារិន | ថ្ងៃចន្ទ ទី11 ឧសភា 2015,
លោកនាយករដ្ឋមន្រ្តី ហ៊ុន សែន នៅថ្ងៃចន្ទនេះបានថ្លែងថាការកោះហៅតំណាងរាស្រ្តគណបក្សសង្រ្គោះជាតិមកចូលបំភ្លឺ ជាកិច្ចការរបស់តុលាការ ដែលមិនជាប់ពាក់ព័ន្ធនឹងកិច្ចព្រមព្រៀងនយោបាយថ្ងៃទី២២ខែកក្កដា ឆ្នាំ២០១៤ និងវប្បធម៌សន្ទនានោះទេ។
ក្នុងពិធីចែកសញ្ញាបត្រដល់និស្សិតអាស៊ីអឺរ៉ុប លោក ហ៊ុន សែន បានថ្លែងថាវប្បធម៌សន្ទនាជាក្របខណ្ឌនយោបាយ និងមិនអាចយកមកប្រើប្រាស់រំលោភលើរដ្ឋធម្មនុញ្ញ និងច្បាប់ទាំងបីរបស់រដ្ឋនោះទេ រួមមាននីតិប្រតិបត្តិ នីតិបញ្ញត្តិ និងអំណាចតុលាការ។ លោកបន្តវប្បធម៌សន្ទនានេះមិនអាចជួយតំណាងរាស្រ្តដែលតុលាការបានកោះហៅ ដើម្បីសាកសួរនោះទេ។ លោកមានប្រសាសន៍ថា«តិចថាបានវប្បធម៌សន្ទនា ទៅបង្កើតរឿង តុលាការគេកោះ គេយកទៅកាត់ទោស ថាវប្បធម៌សន្ទនាទៅធានា អត់ទេ អាហ្នឹងអត់ទេ សុំប្រាប់ឲ្យហើយ ព្រោះឥឡូវគេចាប់ផ្តើមមានការបកស្រាយតាពេតាពាស(ពាសវាលពាសកាល)។ សុំផ្តាំនេះជាក្របខណ្ឌនយោបាយ អត់ទៅគ្របដណ្តប់លើរធម្មនុញ្ញ លើច្បាប់ ហើយក៏មិនជំនួសឲ្យយន្តការប្រជាធិបតេយ្យបានដែរ»។
លោកនាយករដ្ឋមន្រ្តីបន្តថាការកោះហៅតំណាងរាស្រ្តគណបក្សសង្រ្គោះជាតិឲ្យចូលបំភ្លឺជារឿងរបស់តុលាការ ដែលលោកមិនជាប់ពាក់ព័ន្ធនោះទេ។ លោកថាកិច្ចព្រមព្រៀងនយោបាយ២២ខែកក្កដា និងវប្បធម៌សន្ទនា មិនជាប់ពាក់ព័ន្ធនឹងការកោះហៅតំណាងរាស្រ្តនោះទេ។
លោកបញ្ជាក់ថា«ហើយកិច្ចព្រមព្រៀងនយោបាយអាថ្ងៃទី២២ខែកក្កដា ឆ្នាំ២០១៤ ក្តីនិងបន្តបន្ទាប់មករហូតដល់សេចក្តីថ្លែងការណ៍រួម០៨ឧសភាក្តី អត់គ្រប់ដណ្តប់រឿងក្តីនៅក្នុងតុលាការទេ»។
ការថ្លែងរបស់នាយករដ្ឋមន្រ្តីធ្វើឡើងស្របពេលដែលលោកស្រី មូរ សុខហួរ ដែលជាតំណាងរាស្រ្តគណបក្សសង្រ្គោះជាតិ មណ្ឌលបាត់ដំបង បានចូលបំភ្លឺនៅតុលាការទាក់ទងនឹងហិង្សានៅទីលានប្រជាធិបតេយ្យកាលពីខែកក្កដា ឆ្នាំ២០១៤។
គួរបញ្ជាក់ថាថ្មីៗនេះ តំណាងរាស្រ្តគណបក្សសង្រ្គោះជាតិចំនួន៧រូបត្រូវបានតុលាការបង្គាប់ឲ្យចូលឆ្លើយបំភ្លឺនៅខែឧសភានេះ ដើម្បីសាកសួរបន្ថែមជុំវិញសំណុំរឿងព្រហ្មទណ្ឌ ទាក់ទិននឹងការដឹកនាំធ្វើបាតុកម្ម អំឡុងពេលគណបក្សសង្គ្រោះជាតិធ្វើពហិការមិនចូលប្រជុំសភា។
ជាការកត់សម្គាល់ ការកោះហៅតំណាងរាស្ត្របក្សប្រឆាំងឲ្យចូលបំភ្លឺជាបន្តបន្ទាប់ ទាក់ទិននឹងសំណុំរឿងផ្ទុះហិង្សានៅជិតទីលានប្រជាធិបតេយ្យនេះ បានធ្វើឡើងបន្ទាប់ពីលោកនាយករដ្ឋមន្ត្រី ហ៊ុន សែន ព្រមានលុបចោលវប្បធម៌សន្ទនា បើអនុប្រធានគណបក្សសង្គ្រោះជាតិ លោក កឹម សុខា នៅបន្តរិះគន់គណបក្សប្រជាជនម្ពុជា។
កាលពីថ្ងៃទី០៧ ខែឧសភា ឆ្នាំ២០១៥ លោកនាយករដ្ឋមន្រ្តី ហ៊ុន សែន និងប្រធានគណបក្សសង្រ្គោះជាតិ លោក សម រង្ស៊ី បានឯកភាពគ្នាលើការមិនឲ្យប្រើប្រាស់ពាក្យពេចន៍មួយចំនួន ក្នុងនោះមានពាក្យចាប់ដាក់គុក សង្គ្រាមកើតឡើង ចៀសវាងឲ្យខាងតែបាននូវការញុះញង់ ការលាបពណ៌ ការប្រើពាក្យអសុរោះ និងការជេរប្រមាថគ្នា ដូចជាករណីប្រើពាក្យអាក្បាលយួនខ្លួនខ្មែរ ពួកកុម្មុយនីស្តផ្តាច់ការ អាយ៉ងយួន អាក្បត់ជាតិ អាលក់ជាតិ អាមេចោរ និងអាកូនចោរជាដើម។ លោកនាយករដ្ឋមន្ត្រី ហ៊ុន សែន បានបញ្ជាឲ្យមន្ត្រីរបស់ខ្លួនពិនិត្យមើលរាល់សកម្មភាព និងការថ្លែងរបស់មន្ត្រីគណបក្សសង្គ្រោះជាតិថាតើមានការជេរប្រមាថទៀត ឬយ៉ាងណា ៕
សរសេរមកកាន់លោក ស៊ុន ណារិន តាមរយៈsun_narin@vodhotnews.com
No comments:
Post a Comment