ដោយ អ៊ុំ រង្សី
2015-05-15
ការប្រារព្ធពិធីបែបសាសនារបស់ពលរដ្ឋសហគមន៍តាងៅ នៅពេលនេះ ធ្វើឡើងបន្ទាប់ពីទទួលសេចក្ដីជូនដំណឹងពីសាលាខណ្ឌច្បារអំពៅ ស្ដីពីការដោះស្រាយសំណង់បណ្ដោះអាសន្នលើដីរបស់រដ្ឋដែលត្រូវទន្ទ្រានកាន់កាប់ដោយខុសច្បាប់តាមរាជធានី ទីក្រុង និងទីប្រជុំជន។ សេចក្ដីជូនដំណឹងនេះ បានធ្វើឲ្យពលរដ្ឋរស់នៅក្នុងសហគមន៍តាងៅ ភ័យខ្លាចពីបញ្ហាអសុវត្ថិភាព និងបាត់បង់លំនៅឋាននៅពេលខាងមុខ។
តំណាងពលរដ្ឋសហគមន៍តាងៅ លោកស្រី ខៀវ សារ៉ុន បានឲ្យដឹងថា ពិធីសាសនាមានធ្វើជារូបសំពៅធំមួយ ដោយដាក់ពោត សណ្ដែក ល្ង ស្រូវ អង្ករ និងគ្រឿងរណ្ដាប់ដទៃទៀត គឺជាពិធីបួងសួងសុំសេចក្ដីសុខសាន្ត និងបញ្ចៀសការបណ្ដេញទាំងបង្ខំណាមួយ។ លោកស្រីបន្តថា ពលរដ្ឋទាំងអស់ក្នុងសហគមន៍មិនចង់ចាក់ចេញពីតំបន់នេះទេ និងចង់ឲ្យរដ្ឋាភិបាលអភិវឌ្ឍនៅនឹងកន្លែង។
តំណាងសហគមន៍រូបនេះបាននិយាយទៀតថា ពលរដ្ឋសហគមន៍តាងៅ មិនបានទន្ទ្រានកាន់កាប់ និងសាងសង់ផ្ទះនៅតាមដងព្រែកបារាំងនេះដោយខុសច្បាប់នោះទេ គឺពួកគាត់បានទិញ និងមានលិខិតស្នាមត្រឹមត្រូវ។ លោកស្រីបន្តថា មន្ត្រីខណ្ឌច្បារអំពៅ ថា នឹងជូនដំណឹងពីគម្រោងអភិវឌ្ឍនេះ ថាតើនឹងអនុវត្ត ឬអត់នោះនៅក្រោយចូលឆ្នាំ ២ ឬ ៣ថ្ងៃ តែរហូតមកដល់ពេលនេះ អាជ្ញាធរខណ្ឌនៅតែមិនទាន់បញ្ជាក់ច្បាស់នៅឡើយ។ ចំណុចនេះហើយដែលសហគមន៍ចង់ឲ្យមានការបញ្ជាក់ច្បាស់អំពីគម្រោងអភិវឌ្ឍន៍ព្រែកបារាំងនេះ។
ទាក់ទងនឹងបញ្ហានេះ ប្រធានកម្មវិធីចងក្រងសហគមន៍ដើម្បីសិទ្ធិលំនៅឋាននៃអង្គការសមធម៌កម្ពុជា លោក ស៊ូ សាវឿន បានមានប្រសាសន៍ថា ការធ្វើពិធីសាសនារបស់សហគមន៍តាងៅ នៅពេលនេះ ដោយសារពលរដ្ឋទទួលបានព័ត៌មានផ្សេងៗគ្នាជុំវិញគម្រោងអភិវឌ្ឍន៍ព្រែកបារាំង និងមិនមានការបកស្រាយច្បាស់ពីអាជ្ញាធរ។ លោកស្នើឲ្យអាជ្ញាធរធ្វើការប្រជុំ ឬបើកវេទិកាសាធារណៈដើម្បីឲ្យពលរដ្ឋបានយល់ច្បាស់ពីបញ្ហានេះ៖ «តាមការសង្កេតរបស់ខ្ញុំឃើញថា កន្លងមកសហគមន៍នេះមានបញ្ហាជាច្រើន ពិសេសបញ្ហាកង្វះព័ត៌មានជុំវិញការអភិវឌ្ឍតំបន់ព្រែកបារាំង ហើយយើងអត់ដឹងច្បាស់ពិតប្រាកដនោះទេ ម្តងលឺថាស្តារប្រឡាយដាក់ប្រព័ន្ធលូ និងម្ដងលឺថាលុបប្រឡាយដាក់លូ ដូច្នេះខ្ញុំសូមឲ្យអាជ្ញាធរដោះស្រាយចំណុចនេះ»។
ឆ្លើយតបនឹងបញ្ហាខាងលើ អភិបាលរងខណ្ឌច្បារអំពៅ លោក ហោ វាសនា មានប្រសាសន៍ថា ការធ្វើពិធីបែបសាសនាគឺជាសិទ្ធិរបស់ពលរដ្ឋ ប៉ុន្តែកន្លងមកនេះខាងខណ្ឌធ្លាប់បានជួបពិភាក្សាជាមួយពលរដ្ឋរួចហើយ ឃើញថា ពលរដ្ឋក៏បានឯកភាពហើយដែរ។ លោកបញ្ជាក់ថា គម្រោងអភិវឌ្ឍន៍នេះ ជាគម្រោងរបស់សាលារាជធានីភ្នំពេញ ហើយបច្ចុប្បន្នយើងកំពុងតែសិក្សាពីផលប៉ះពាល់នៅឡើយ៖ «គម្រោងអភិវឌ្ឍន៍នេះ គឺជាគម្រោងរបស់សាលារាជធានីភ្នំពេញ ដោយសាលាខណ្ឌច្បារអំពៅ ជាអ្នកអនុវត្តតាម គឺអភិវឌ្ឍព្រែកបារាំង ធ្វើជាផ្លូវ ដោយមានប្រព័ន្ធលូខាងក្រោម មានសួនច្បារ មានស្ថានីយចម្រោះទឹកស្អុយបង្ហូរមកចូលក្នុងទន្លេ ហើយគម្រោងទាំងនេះយើងបានប្រជុំ និងបានជូនដំណឹងដល់ប្រជាពលរដ្ឋរួចហើយ ឃើញថា ពលរដ្ឋបានឯកភាពរួចហើយដែរ»។
សេចក្ដីជូនដំណឹងរបស់សាលាខណ្ឌច្បារអំពៅ លេខ០១៦ ចុះថ្ងៃទី១១ ខែមីនា ឆ្នាំ២០១៥ បានឲ្យដឹងថា ព្រែកបារាំង គឺជាព្រែកសាធារណៈ និងជាផ្លូវទឹកដ៏សំខាន់សម្រាប់រំដោះទឹកចេញពីតំបន់ជុំវិញព្រែក កុំឲ្យជន់លិចលំនៅឋានរបស់ពលរដ្ឋ តែស្ថានភាពព្រែកបច្ចុប្បន្នត្រូវបានកកស្ទះដោយសំរាម ការបង្ហូរកាកសំណល់ពីសំណងក្បែរនោះ។ ដោយពិនិត្យឃើញស្ថានភាពបែបនេះ សាលារាជធានីភ្នំពេញ បានប្រគល់ភារកិច្ចឲ្យមន្ទីរសាធារណការ និងដឹកជញ្ជូនរាជធានី សហការជាមួយអាជ្ញាធរដើម្បីស្ដារព្រែកនេះឡើងវិញ ដោយសាងសង់ប្រឡាយបេតុងទំហំ ៤ម៉ែត្រ គុណ ៦ម៉ែត្រ នៅខាងក្រោម និងស្ថាបនាផ្លូវខាងលើកម្រាស់ ២០សង់ទីម៉ែត្រ ទទឹង ១៤ម៉ែត្រ មានលូម្ខាងមុខកាត់ ០,៨ម៉ែត្រ ដើម្បីរំដោះទឹកចេញ និងកែលំអបរិស្ថាន អនាម័យ របៀបរៀបរយជុំវិញតំបន់ព្រែកទាំងមូល៕
No comments:
Post a Comment