Of Hun-gate scandal ...

ILCHN


បន្ទាប់ពីមានការរិះគន់យ៉ាងខ្លាំងពីសំណាក់មហាជនគ្រប់ទិសទីក្នុងរឿងខ្លោងទ្វារអង្គរសង្ក្រាន្ត គេឃើញមានការឆ្លើយតបរបស់អ្នកទទួលខុសត្រូវក្នុងការរចនាម៉ូដនេះ ពីមន្រ្តីរបស់បក្សប្រជាជនកម្ពុជា។ ក្នុងនោះដែរលោក ហ៊ុន ម៉ានី ដែលគេដឹងថាជាកូនប្រុសលោក ហ៊ុន សែន និងជាប្រធានសហភាពសហព័ន្ធយុវជនកម្ពុជា បានឆ្លើយតបថា “ខ្លោងទ្វារអង្គរសង្ក្រាន្តនេះគឺជាស្នាដៃរបស់ខ្មែរពិតៗ”។ រីឯលោក សោម រតនា អ្នកនាំពាក្យនៃក្រុមរចនាខ្លោងទ្វារនេះឆ្លើយថា ពិតជាមានកំហុសឆ្គងខ្លះមែន ហើយក្រុមរបស់លោកកំពុងសិក្សាស្រាវជ្រាវពីរឿងនេះ។ ចំណែកមន្រ្តីបក្សប្រជាជន និងជាអ្នកនាំពាក្យសាលារាជធានីភ្នំពេញវិញ ឆ្លើយតបដោយកំហឹងមិនដឹងខុសត្រូវថា ពួកអ្នករិះគន់ហ្នឹងគឺពួកផ្កាប់មុខ មិនចេះមើលគម្ពីររបស់ខ្មែរ។ល។

យើងពិតជាមានការសោកស្តាយខ្លាំងណាស់នូវការឆ្លើយតបដោយឆ្លងកាត់ត្រឹមតែឥន្រ្ទីយារម្មណ៍របស់ពួកគេ។ យើងមិនបានបដិសេធថាខ្លោងទ្វារនេះ មិនមែនជាស្នាដៃរបស់ខ្មែរទេ ប៉ុន្តែយើងយល់ថា យើងដឹងថា ” ខ្លោងទ្វារអង្គរសង្ក្រាន្តនេះ មិនមែនជារថនាបថរបស់ខ្មែរ “។ តើអស់លោកយល់ពាក្យថា “រចនាបថ” ទេ? អស់លោកសាកទៅបើកមើលសៀវភៅ វប្បធម៌-អរិយធម៌ របស់សាស្រ្តាចារ្យ ពន់ ឆាយ ឬក៏ទៅសួរគាត់មើល តើពាក្យនេះគេសំដៅលើអ្វី? ហើយអស់លោកឆ្លើយមកមើលថាខ្លោងទ្វារអង្គរសង្ក្រាន្តហ្នឹង ចម្លងតាមរចនាបថណាមួយ ក្នុងចំណោមរចនាបថទាំង១៣របស់ខ្មែរ។ តើវាចម្លងចេញ ពីរចនាបថអង្គរវត្ត? រចនាបថភ្នំដា? រចនាបថបន្ទាយស្រី? រចនាបថឃ្លាំង...?
យើងរឹតតែសោកសង្រេង ខកចិត្ត និងខ្មាសគេថែមទៀត នៅពេលដែលលោក ហ៊ុន ម៉ានី មានប្រសាសន៍ថាជាស្នាដៃរបស់កូនខ្មែរពិតៗ។




លោកគួរតែនិយាយថាជាស្នាដៃរបស់ពួកអស់លោកគ្រាក់ៗនៅខាងលើនោះ។ កូនខ្មែរមួយម៉ាត់ គឺសំដៅលើភាពទូទៅរបស់ខ្មែរ ប៉ុន្តែពេលកូនខ្មែរឃើញខ្លោងទ្វារនេះ ខ្មែរពេញនគរគឺគេមិនយល់ស្របដូចក្រុមលោកឡើយ គេជំទាស់នឹងការរចនាម៉ូដនេះ ហើយគេឱ្យរុះរើប្តូរវាចេញ ព្រោះគេដឹងថានេះមិនមែនរចនាបថរបស់ខ្មែរឡើយ។ សូមក្រុមលោកទៅបើកសៀវភៅមើល ឬសួរ
ទៅ អ្នកប្រាជ្ញ បណ្ឌិត បញ្ញវន្ត សាស្រ្តាចារ្យ ដែលឆ្លងកាត់សាលាមើល តើពួកគេយល់ យ៉ាងណាចំពោះម៉ូដខ្លោងទ្វាររបស់អស់លោកនោះ។ យើងសាកគិតបែបងាយៗថា ជនជាតិយួនម្នាក់ យកសំលៀកបំពាក់ខ្មែរ ហូល ផាមួង...មកពាក់ អញ្ចឹងគ្រាន់តែសំលៀក បំពាក់ខ្មែរគ្របដណ្តប់លើរាងកាយរបស់គាត់ យើងអាចថាគាត់ម្នាក់នោះគឺជាខ្មែរមែនទេ? អញ្ចឹងហើយអស់លោកគ្រាក់ៗ ខាងលើ ត្រូវយល់ពាក្យ រចនាបថ នេះអោយបានច្បាស់សិន។

មួយវិញទៀត ឱ្យតែគេរិះគន់គឺសុទ្ធតែពួកផ្កាប់មុខ ពួកប្រឆាំង...។ តើពួកផ្កាប់មុខ ពួក ប្រឆាំងហ្នឹង ដែលបំផ្លាញទ្រព្យសម្បត្តិរបស់ជាតិទេ? ពួកផ្កាប់មុខ ពួកប្រឆាំងហ្នឹងដែល យកអង្គរវត្តទៅលក់ឱ្យបរទេសទេ? ប្រាក់ចំណូលដែលបានមកពីការរៀបចំអង្គរសង្ក្រាន្តនេះ មានធ្លាក់ដល់ដៃពួកផ្កាប់មុខ ពួកប្រឆាំងទាំងអស់នោះទេ? នេះមិនមែនជា រឿងនយោបាយឡើយ សូមយល់អោយច្បាស់ ។ វប្បធម៌ អរិយធម៌ ដ៏ផូរផង់របស់ខ្មែរ មិនអាចដុះ ឬលូតលាស់លើទឹកដីរបស់ខ្មែរបានឡើយ ដរាបនៅមានមនុស្សបែបក្រុមអស់លោក។
អ្វីដែលគួរអោយអស់សំណើចខ្លាំងថែមទៀត គឺពួកគេនិយាយថាកំពុងសិក្សាស្រាវជ្រាវ បន្ថែមលើរឿងនេះ។ អញ្ចឹងមានន័យថាការសាងសង់ខ្លោងទ្វារនេះ មិនមានការស្រាវ ជ្រាវច្បាស់លាស់ឡើយ ចេះតែធ្វើតាមការនឹកឃើញរបស់ខ្លួន ឬធ្វើតាមបុគ្គលអ្នកមានអំណាចណាម្នាក់នៅខាងលើ។

ជារួមយើងឃើញថា ពួកគេមិនទទួលស្គាល់កំហុសរបស់ខ្លួនទេ និងមិនចាត់ទុកមតិ ពលរដ្ឋជាធំឡើយ។ ផ្ទុយទៅវិញគេចាត់ទុកបុគ្គលណាម្នាក់ក្នុងក្រុមរបស់ពួកគេជាធំ។ ឧទាហរណ៍ថា បើសម្តេចថាមួយម៉ាត់គឺខ្លោងទ្វារនេះខុសរចនាបថ នោះពួកគេនឹងរុះរើ ភ្លាម តែបើសម្តេចអត់និយាយ គឺមានន័យថាត្រឹមត្រូវ១០០ភាគរយ។