លោក អាង គឹមអ៊ាង ប្រធានCATA។ មឿន ញាណ
នៅពេលដែលចំនួនភ្ញៀវ ទេសចរជនជាតិអូស្ត្រាលី បាន មកទស្សនាប្រទេសកម្ពុជាអាចនឹងមានចំនួនកើនឡើងរហូតដល់ប្រមាណ១៤ ឬ១៥ម៉ឺននាក់ នៅក្នុងឆ្នាំ២០១៥នេះ ហើយទន្ទឹមនឹងនេះដែរ ប្រជាជនខ្មែរមួយចំនួនក៏មានបំណងចង់ទៅលម្ហែកាយនៅប្រទេសអូស្រ្តាលី វិញផងដែរ។
លោក គង់ សុភារក្ស ប្រធាននាយកដ្ឋានស្ថិតិ និងព័ត៌មាន នៃក្រសួងទេសចរណ៍ បានថ្លែងឲ្យដឹងកាលពីសប្តាហ៍មុននេះថា យោងតាមតួលេខនៃកំណើនភ្ញៀវទេសចរជនជាតិអូស្ត្រាលីដែលបានចូលមកលម្ហែកាយនៅក្នុងប្រទេសកម្ពុជាក្នុងរយៈពេលពីរបីឆ្នាំចុងក្រោយនេះ គាត់ធ្វើការព្យាករបានថា «នៅក្នុងឆ្នាំ ២០១៥ នេះចំនួនភ្ញៀវទេសចរអូស្ត្រាលីអាចនឹងកើនឡើងរហូតដល់១៥ម៉ឺននាក់»។
លោក សុភារក្ស បានបញ្ជាក់ថា៖ «ក្នុងរយៈពេល ១១ ខែ ដើមឆ្នាំ ២០១៤ កន្លងមក មាន ភ្ញៀវទេសចរមកពីអូស្ត្រាលី ចំនួន១១ម៉ឺននាក់ បានមកទស្សនាកម្សាន្តនៅកម្ពុជា។ ចំនួននេះបើប្រៀបធៀបទៅនឹងឆ្នាំមុនៗ យើងសង្កេតឃើញថាកំណើនភ្ញៀវទេសចរអូស្ត្រាលី មកកម្ពុជាមានប្រមាណពីជាង ១០ ទៅ ១៥ ភាគរយជាលំដាប់»។ ប៉ុន្តែ យោងទៅតាមអត្រាសន្ទុះកាលពីចុងឆ្នាំកន្លងទៅនៅឆ្នាំ២០១៥ លោកសង្ឃឹមថា ប្រហែលជាចំនួនភ្ញៀវអូស្ត្រាលី អាចហក់ឡើងដល់ក្នុងចន្លោះពី ១៤ ទៅ ១៥ ម៉ឺននាក់នៅចុងឆ្នាំនេះ។
លោក អាង គឹមអ៊ាង ប្រធានសមាគមទីភ្នាក់ងារទេសចរណ៍កម្ពុជា (CATA - Cambodia Association of Travel Agent) បានឲ្យដឹងថា ជាមួយនឹងភ្ញៀវជនជាតិអូស្ត្រាលីមកកម្សាន្តនៅកម្ពុជាជាច្រើន ក៏មានអាណិកជនកម្ពុជាពីអូស្ត្រាលីមកលេងបងប្អូននៅស្រុកកំណើតរបស់ពួកគេផងដែរ ហើយពួកគេច្រើនមកជាក្រុមគ្រួសារតែម្តង។ ទន្ទឹមគ្នានេះ យើងក៏សង្កេតឃើញមានចំនួនប្រជាជនកម្ពុជា ចាប់ផ្តើមធ្វើដំណើរទៅទស្សនានៅប្រទេសអូស្ត្រាលី ជាបណ្តើរៗផងដែរ។
អ្នកស្រី ហ៊ួយ សេដា (រូបស្តាំ) ពេលទៅកំសាន្តនៅអូស្ត្រាលី។
«អ្វីដែលជារនាំងសម្រាប់អ្នកទេសចរខ្មែរ ទៅលេងនៅអូស្ត្រាលី នោះគឺដោយសារការផ្តល់វីសា (ទិដ្ឋាការ) របស់អូស្ត្រាលីនៅមានលក្ខណៈរឹតត្បិតនៅឡើយ ព្រោះកន្លងមកធ្លាប់មានអ្នកដែលបានទៅដល់ប្រទេសអូស្ត្រាលី ហើយគេចវេះនៅទីនោះ»។ នេះបើតាមប្រសាសន៍របស់លោក គឹមអ៊ាង។
«ស្ថានភាពបច្ចុប្បន្ននៅកម្ពុជា វាខុសពីមុនឆ្ងាយណាស់។ ក្នុងនាមជាប្រធានសមាគមទីភ្នាក់ងារទេសចរណ៍កម្ពុជា ខ្ញុំត្រៀមខ្លួននឹងធ្វើកិច្ចសហប្រតិបត្តិការជាមួយស្ថានទូតអូស្ត្រាលី ប្រចាំនៅកម្ពុជា ដើម្បីរកវិធីយ៉ាងណាឲ្យគាត់មានទំនុកចិត្តក្នុងការផ្តល់វីសាឲ្យមានលក្ខណៈទូលំទូលាយជាងមុន។ ខ្ញុំពិនិត្យឃើញថា ប្រជាជនខ្មែរត្រូវទៅទស្សនកិច្ច ឬទៅសិក្សានៅអូស្ត្រាលីនោះ ស្ទើរតែទាំងអស់ពួកគាត់ទៅតាមរយៈក្រុមហ៊ុនផ្តល់សេវាកម្មទេសចរណ៍ ដែលមានច្បាប់ត្រឹមត្រូវពីក្រសួងទេសចរណ៍ ហើយភាគច្រើននៃក្រុមហ៊ុនទាំងនោះ គឺជាសមាជិករបស់ CATA ដូច្នេះបើយើងពិនិត្យអំពីលទ្ធភាពនៃការទទួលខុសត្រូវ គឺពួកគាត់គួរតែអាចទុកចិត្តបាន»។
«តាមអ្វីដែលជាបទពិសោធនៅក្នុងវិស័យទេសចរណ៍តែកាលណាមនុស្សពីប្រទេសមួយធ្វើដំណើរទៅកាន់ប្រទេសមួយទៀត គឺប្រាកដណាស់ពួកគេត្រូវការចាយវាយនៅក្នុងដំណើរកម្សាន្តនោះហើយ ប៉ុន្តែអ្វីដែលប្រសើរជាងនេះទៅទៀតនោះ គឺពួកគាត់អាចស្វែងរកដៃគូសម្រាប់ធ្វើការរកស៊ី ឬ វិនិយោគអ្វីមួយបានដោយងាយ នោះហើយវានឹងផ្តល់ប្រយោជន៍កាន់តែរីកធំធាត់នៅក្នុងវិស័យពាណិជ្ជកម្មដែលជាចរន្តសេដ្ឋកិច្ចប្រទេសទាំងពីរជាមិនខាន»។
អ្នកស្រី ហួយ សេដា ម្ចាស់ហាងលក់កុំព្យូទ័រ YWC មានទីតាំងនៅតាមដងវិថីកម្ពុជាក្រោម រាជធានីភ្នំពេញ គាត់ធ្លាប់បានធ្វើដំណើរទៅទស្សនាចរកម្សាន្តនៅទ្វីបអឺរ៉ុប និងនៅប្រទេសអូស្ត្រាលី កាលពីឆ្នាំ២០១១ និង២០១២ កន្លងមក។
គាត់បានឲ្យដឹងថា គាត់នៅតែមានបំណងនាំក្រុមគ្រួសាររបស់គាត់ទៅកម្សាន្តនៅអូស្ត្រាលីជាថ្មីម្តងទៀត «ព្រោះប្រទេសអូស្ត្រាលី ស្អាត នៅតំបន់ខ្លះមានអាកាសធាតុប្រហាក់ប្រហែលកម្ពុជាយើងដែរ ប៉ុន្តែគេមានបរិស្ថានស្រស់បំព្រងល្អណាស់។
ប្រជាជនអូស្ត្រាលី មានលក្ខណៈចម្រុះជាតិសាសន៍ អឺរ៉ុប លាយអាស៊ី និងអាហ្វ្រិកខ្លះដែរ ពួកគេមានសីលធម៌រស់នៅល្អប្រសើរណាស់។ ប្រជាជនគេមើលទៅសុទ្ធសឹងមានចំណេះដឹងខ្ពង់ខ្ពស់»។
«ខ្ញុំចាំបានថា នៅទីក្រុងស៊ីដនី មានសណ្ដាប់ធ្នាប់ល្អណាស់ បរិយាកាសក៏ស្រស់ស្អាតដូចនៅសិង្ហបុរីអ៊ីចឹង។ ប៉ុន្តែទីក្រុងស៊ីដនីធំណាស់»។នេះបើតាមសម្ដីរបស់អ្នកស្រី សេដា។ «អ្វីដែលធ្វើឲ្យយើងសប្បាយរីករាយនោះ គឺនៅអូស្ត្រាលីមានសហគមន៍ខ្មែរជាច្រើនរស់នៅច្រើនកន្លែង។ ខ្ញុំរីករាយបំផុតនៅពេលដែលបានជួបជុំជនរួមជាតិរបស់យើងនៅទីនោះ»៕
No comments:
Post a Comment