អនុប្រធានគណបក្សសង្គ្រោះជាតិ លោក កឹម សុខា ថ្លែងសារទៅកាន់អ្នកគាំទ្រនាខេត្តសៀមរាប នៅថ្ងៃទី៦ ខែកញ្ញា ឆ្នាំ២០១៤។
RFA/Hang Savyouth
មន្ត្រីជាន់ខ្ពស់គណបក្សសង្គ្រោះជាតិ បានថ្លែងនៅថ្ងៃទី១៨ ខែធ្នូ ឆ្នាំ២០១៤ ថា ប្រធានក្រុមអ្នកតំណាងរាស្ត្រ នឹងជួបជជែកជាមួយលោកនាយករដ្ឋមន្ត្រី ហ៊ុន សែន នៅថ្ងៃទី១៩ ធ្នូ ដើម្បីសុំឲ្យមានការសម្របសម្រួលដោះលែងសកម្មជនគណបក្សនយោបាយ និងសកម្មជនដីធ្លី និងសិទ្ធិមនុស្សសរុប ១៨នាក់។
លោក កឹម សុខា អនុប្រធានគណបក្សសង្គ្រោះជាតិ និងជាអនុប្រធានទី១រដ្ឋសភា មានប្រសាសន៍ថា នៅថ្ងៃទី១៩ សមាជិកសភាទាំងពីរគណបក្ស នឹងកែសម្រួលបទបញ្ជាផ្ទៃក្នុងនៃរដ្ឋសភា ដោយធ្វើវិសោធនកម្មប្រការ៤៨ថ្មី នៃបទបញ្ជាផ្ទៃក្នុងរដ្ឋសភា ព្រមទាំងផ្ដល់សេចក្ដីទុកចិត្តប្រធានក្រុមតំណាងរាស្ត្រសំឡេងភាគតិចនៅរដ្ឋសភា មានឋានៈស្មើនាយករដ្ឋមន្ត្រី។
លោកជឿជាក់ថា បន្ទាប់ពីសមាជិកសភា ទទួលស្គាល់តួនាទីប្រធានក្រុមតំណាងរាស្ត្រសំឡេងភាគតិច នោះនឹងមានការជួបជជែកដើម្បីកែសម្រួលបរិយាកាសនយោបាយឲ្យមានភាពល្អប្រសើរ៖ «ខ្ញុំជឿថ្ងៃស្អែកនេះ គឺក្រោយពីបានព្រមព្រៀងគ្នាអនុម័តបទបញ្ជាផ្ទៃក្នុងហើយ នឹងមានជំនួបរវាង លោក សម រង្ស៊ី និងលោក ហ៊ុន សែន ដើម្បីជជែកពីការដោះលែងសកម្មជននយោបាយ និងសកម្មជនដីធ្លី និងសិទ្ធិមនុស្សដែលនៅជាប់ឃុំនោះ»។
លោក មាជ សុវណ្ណារ៉ា បេក្ខជនតំណាងរាស្ត្រគណបក្សសង្គ្រោះជាតិ ត្រូវចាប់ខ្លួន និងបញ្ជូនទៅឃុំនៅក្នុងពន្ធនាគារព្រៃស កាលពីថ្ងៃទី១១ ខែវិច្ឆិកា ជុំវិញសំណុំរឿងហិង្សានៅទីលានប្រជាធិបតេយ្យ។ ដោយឡែកសកម្មជនផ្សេងទៀត ត្រូវបានចាប់ខ្លួនមុន និងក្រោយគ្នាបន្តបន្ទាប់ ព្រមទាំងការចាប់ខ្លួនសកម្មជនដីធ្លី និងសិទ្ធិមនុស្ស ក្រោមហេតុផលបង្កឲ្យស្ទះផ្លូវសាធារណៈ៕
No comments:
Post a Comment