ភ្នំពេញៈ ខ្សែវីដេអូសហគមន៍ចំនួន ៥ ពាក់ព័ន្ធនឹងស្ថានភាពទំនាស់ដីធ្លីនៅកម្ពុជា ត្រូវបានដាក់បញ្ចាំង និងចែកចាយលើប្រព័ន្ធអ៊ីនធឺណិត កាលពីល្ងាចថ្ងៃពុធម្សិលមិញ ក្នុងគោលបំណងលើកកម្ពស់ការយល់ដឹងពីសិទ្ធិដីធ្លី និងបង្ហាញពីស្ថានភាពអសន្តិសុខនៃទំនាស់ដីធ្លីនៅកម្ពុជា។
ខ្សែវីដេអូខ្លីនេះ ត្រូវបានរៀបរៀងឡើង ដោយមជ្ឈមណ្ឌលសិទ្ធិមនុស្សកម្ពុជា (CCHR) ដែលបង្ហាញពីប្រវត្តិសង្ខេបនៃសហគមន៍រងផលប៉ះពាល់ ដោយសារជម្លោះដីធ្លី សាវតារនៃការយាយី ការបំភិតបំភ័យ និងវាយប្រហារ ក្នុងគោលបំណងបង្ខំឲ្យពលរដ្ឋចេញពីដីធ្លីរបស់ពួកគេ ដើម្បីការអភិវឌ្ឍឧស្សាហកម្មហេដ្ឋារចនាសម្ព័ន្ធ និងការធ្វើអាជីវកម្មលើធនធានរ៉ែធម្មជាតិរបស់កម្ពុជា។
តួអង្គនៃខ្សែវីដេអូឯកសារនេះ រួមមាន លោក លី ស្រ៊ាខេង នៅតំបន់បឹងកក់ ក្នុងរាជធានីភ្នំពេញ ដែលមានទំនាស់ជាមួយក្រុមហ៊ុន ឃុន សៀរ អ៊ិចផត អ៊ីមផត អ្នកស្រី កែវ សុភី សហគមន៍ពី ខេត្តសៀមរាប ដែលត្រូវបានមន្ត្រីយោធារឹបអូសយកដី កាលពី ឆ្នាំ២០០៣ លោក សោម សុវណ្ណនី សហគមន៍ពី ខេត្តក្រចេះ ត្រូវបានអាជ្ញាធរបណ្តេញយកទីតាំងដី សាងសង់សាកលវិទ្យាល័យមួយ លោក វ៉ែន វ៉ន សហគមន៍ជនជាតិភាគតិចជង តំបន់អារ៉ែង ខេត្តកោះកុង ដែលដី និងជីវភាពរបស់គាត់រងការគំរាមកំហែងដោយគម្រោងសាងសង់ទំនប់វារីអគ្គិសនី និងលោក ម៉ាង លីហួរ សហគមន៍ពី ខេត្តឧត្តរមានជ័យ ដែលត្រូវបានទាហានបង្ខំឲ្យចាកចេញពីលំនៅឋានកាលពី ឆ្នាំ២០០៩។
ជនរងគ្រោះដោយសារជម្លោះដីធ្លីនៅតំបន់បឹងកក់ លោក លី ស្រ៊ាខេង បានរៀបរាប់ថា ខ្សែវីដេអូឯកសាររបស់លោក គឺចងក្រងឡើង ដោយខ្សែអាត់វីដេអូខ្លីដែលក្រុមគ្រួសារលោកថតបានខ្លះ និងវីដេអូមន្ត្រីសិទ្ធិមនុស្ស។
លោកបានបញ្ជាក់ថា៖ «វីដេអូនេះ មានសកម្មភាពរបស់អាជ្ញាធរមូលដ្ឋានគំរាម វាយដំ និងចង់សម្លាប់ក្រុមគ្រួសារខ្ញុំ ហើយក្រុមក្មេងទំនើង ដែលត្រូវបានគេជួលមកធ្វើបាបពួកខ្ញុំជារៀងរាល់ថ្ងៃផងដែរ»។
លោក លី ស្រ៊ាខេង ដែលទើបតែត្រូវបានដោះលែងពីពន្ធនាគារ ដោយសារតែរឿងជម្លោះដីធ្លីនេះ បានបញ្ជាក់ថា៖ «ខ្ញុំចង់បង្ហាញដល់ពិភពលោកថា ខ្មែរគឺពិបាកអ៊ីចឹង តែខ្ញុំនៅតែជម្នះពួកយើងត្រូវក្រោកឡើងតស៊ូ កុំនៅស្ងៀម មិនអាចឲ្យគេគាបសង្កត់បានទេ»
សម្រាប់វីដេអូរបស់សហគមន៍ជនជាតិភាគតិច តំបន់អារ៉ែង ខេត្តកោះកុង វិញ បានបង្ហាញពីរបៀបរបបនៃការរស់នៅ មុខរបរចិញ្ចឹមជីវិត ការថែរក្សាប្រពៃណី និងបរិស្ថានក្នុងតំបន់ជុំវិញអារ៉ែង។ តំណាងសហគមន៍លោក វ៉ែន វ៉ន បានថ្លែងថា៖ «ពួកយើង ក៏បានលើកបង្ហាញពីការជម្លៀសចេញទាំងបង្ខំ ដោយអាជ្ញាធរមូលដ្ឋានផងដែរ។ ពួកយើងមិនចង់បាត់បង់នូវតំបន់ធម្មជាតិនេះ ដោយសារទំនប់វារីអគ្គិសនីនោះទេ»។
អ្នកសម្របសម្រួលគម្រោងកំណែទម្រង់ដីធ្លីរបស់ CCHR លោក វណ្ណ សូផាត បានឲ្យដឹងថា ខ្សែវីដេអូឯកសារចំនួន ៥ នេះ ចំណាយថវិកាជិត ៦ ពាន់ដុល្លារ ក្នុងការចងក្រង និងជាឯកសារចែកចាយ ដើម្បីបង្កើនការយល់ដឹងដល់ប្រជាពលរដ្ឋពីសិទ្ធិដីធ្លី និងការតស៊ូមតិរកដំណោះស្រាយ។
លោកបានបន្តថា៖ «តាមគម្រោង គឺយើងនឹងបង្កើតវីដេអូឯកសារនេះ ឲ្យបាន ៣០ រឿង នៅ ឆ្នាំ២០១៧ ដែលមានគ្រប់ប្រភេទនៃជម្លោះដីធ្លីនៅកម្ពុជា»៕
No comments:
Post a Comment