តំណាងពលរដ្ឋ ៤១៦គ្រួសារ មកខេត្តក្រចេះ និងខេត្តត្បូងឃ្មុំ ជិត៣០០នាក់ ត្រូវប៉ូលិសរារាំងពេលហែញត្តិទៅផ្ទះលោកនាយករដ្ឋមន្ត្រីនៅព្រឹកថ្ងៃទី ១៨ ខែ សីហា ឆ្នាំ ២០១៤។
RFA/ Uon Chhin
អ្នកតវ៉ាប្រមាណ ៣០០នាក់ តំណាងឲ្យអ្នកមានបញ្ហាដីធ្លីជាង ៤០០គ្រួសារ មកពីខេត្តក្រចេះ និងខេត្តត្បូងឃ្មុំ បានត្រូវកងកម្លាំងអាជ្ញាធរប្រដាប់ដោយខែលនិងដំបងឆក់ វាយបំបែកបណ្ដាលឲ្យមនុស្សមួយចំនួនរងរបួស ក្នុងនោះស្ត្រីម្នាក់ និងកុមារអាយុ ៦ខែម្នាក់បានសន្លប់ នៅព្រឹកថ្ងៃទី១៨ សីហា។
ការបំបែកនេះកើតឡើងបន្ទាប់ពីក្រុមអ្នកតវ៉ាបានយកញត្តិទៅដាក់ឯរដ្ឋសភានៅព្រឹកថ្ងៃដដែល ដែលនៅទីនោះតំណាងរាស្ត្រគណបក្សសង្គ្រោះជាតិ បីរូបបានចេញមកទទួលយកញត្តិ ប៉ុន្តែគ្មានតំណាងរាស្ត្រគណបក្សប្រជាជនកម្ពុជា រូបណាចេញមកទទួលញត្តិឡើយ៖ «សម្រែកទាមទារឲ្យតំណាងរាស្ត្រគណបក្សប្រជាជន ចេញមកទទួលញត្តិ»។
ក្រោយពីរង់ចាំអស់ចិត្ត ក្រុមអ្នកតវ៉ាបានហែក្បួនឆ្ពោះទៅផ្ទះលោកនាយករដ្ឋមន្ត្រី ហ៊ុន សែន ក្បែរវិមានឯករាជ្យ ហើយក៏មានការរារាំងនិងបំបែកតែម្ដង ដោយប៉ូលិស ប៉េអឹម និងកងសន្តិសុខរបស់ខណ្ឌដូនពេញ ច្រើនលើសលុប រុញច្រានអ្នកតវ៉ាឲ្យទៅនៅក្រោមដើមពោធិ៍ មុខវត្តបទុមវតី។
អ្នកតវ៉ាទាមទារឲ្យមានការផ្ដល់ប្លង់កម្មសិទ្ធិដីធ្លីសម្រាប់ពួកក្រោយពីក្រុមនិស្សិតស្ម័គ្រចិត្តបានវាស់ដីរបស់ពួកគាត់យូរហើយនោះ។
ពាក់ព័ន្ធនឹងបញ្ហាដីធ្លី លោកនាយរដ្ឋមន្ត្រី ហ៊ុន សែន បានមានប្រសាសន៍ក្នុងសិក្ខាសាលាផ្សព្វផ្សាយយុទ្ធសាស្ត្រជាតិស្ដីពីសន្តិសុខស្បៀង និងអាហារូបត្ថម្ភ ឆ្នាំ២០១៤-២០១៨ នាវិមានសន្តិភាព នៅព្រឹកថ្ងៃទី១៨ សីហា ថា លោកមិនដែលបានទទួលញត្តិរឿងដីធ្លីទេ ហើយលោកព្រមានថា នឹងដកតួនាទីមន្ត្រីណាដែលមិនបានដោះស្រាយបញ្ហាដីធ្លីជូនប្រជាពលរដ្ឋ៕
No comments:
Post a Comment