ដោយ៖ ញឹម សុខន | ថ្ងៃអាទិត្យ ទី20 កក្កដា 2014
តុលាការបង្គាប់ឲ្យមេដឹកនាំគណបក្សសង្គ្រោះជាតិ និងបេក្ខជនជាប់ឆ្នោតតំណាងរាស្ត្រ មួយរូបផ្សេងទៀត ឲ្យចូលបំភ្លឺនៅខែកក្កដាឆ្នាំ២០១៤នេះ លើបទចោទនានា បន្ទាប់ពីពួកគេ៨នាក់ ត្រូវបានចាប់ឃុំខ្លួនរួចហើយ ខណៈបក្សប្រឆាំងមួយនេះនៅបន្តធ្វើពហិកាមិនចូលប្រជុំសភា។
ការដែលតុលាការសម្រុកកោះហៅមន្ត្រីបក្សប្រឆាំងនេះ ចំពេលដែលបក្សជំទាស់មួយនេះ នៅបន្តធ្វើពហិកាមិនចូលប្រជុំសភា។ ការមិនចូលប្រជុំសភានេះ ធ្វើឲ្យបក្សកាន់អំណាច ដែលដឹកនាំដោយលោកនាយករដ្ឋមន្ត្រីហ៊ុន សែន រងការរិះគន់ថា បានបង្កើតរដ្ឋាភិបាលខុសច្បាប់ មិនស្របរដ្ឋធម្មនុញ្ញ។
រដ្ឋធម្មនុញ្ញមាត្រា១ចែងថា ប្រទេសកម្ពុជា ជាព្រះរាជាណាចក្រ ដែលព្រះមហាក្សត្រទ្រង់ប្រតិបត្តិតាមដ្ឋធម្មនុញ្ញ និងតាមលទ្ធិប្រជាធិបតេយ្យ សេរីពហុបក្ស។ ចំណែករដ្ឋាភិបាលថ្មី អាណត្តិទី៥នេះ ដែលដំណើរការទៅជិតមួយឆ្នាំនេះ មានតែតំណាងរាស្ត្រមកពីគណបក្សប្រជាជនកម្ពុជា តែមួយប៉ុណ្ណោះ។
សេចក្តីប្រកាសព័ត៌មាន របស់គណបក្សសង្គ្រោះជាតិថ្ងៃទី១៩ខែកក្កដាឆ្នាំ២០១៤ ឲ្យដឹងថា នៅថ្ងៃទី២២ខែកក្កដាឆ្នាំ២០១៤នេះ បេក្ខជនជាប់ឆ្នោតតំណាងរាស្ត្របក្សជំទាស់ លោក ចាន់ ចេង ត្រូវចូលបំភ្លឺនៅសាលាដំបូងខេត្តកណ្តាល តាមដីកាកោះ ដែលចោទថា បានរំដោះជនសង្ស័យជាសកម្មជនគណបក្សសម រង្ស៊ី គឺលោក មាស ប៉េង ចេញពីពន្ធនាគារ កាលពីឆ្នាំ២០១១ ខណៈការឃុំខ្លួនជនសង្ស័យពេលនោះ មេធាវី លោក មាស ប៉េង អះអាងថា ខុសនីតិវិធី ដោយគ្មានដីកាឃុំខ្លួន។
សេចក្តីប្រកាសព័ត៌មានដដែលឲ្យដឹងទៀតថា នៅថ្ងៃទី២៥ ខែកក្កដាឆ្នាំ២០១៤នេះ អនុប្រធានគណបក្សសង្គ្រោះជាតិ លោក កឹម សុខា ក៏ត្រូវសាលាដំបូងរាជធានីភ្នំពេញចេញដីកា បង្គាប់ឲ្យចូលទៅបំភ្លឺ ពីតួនាទីជាប្រធានស្តីទី ដែលនាំឲ្យបេក្ខជនជាប់ឆ្នោតតំណាងរាស្ត្រមួយចំនួន ទៅតវ៉ាទាមទារឲ្យរដ្ឋាភិបាលបើកទីលានប្រជាធិបតេយ្យ រហូតមានការចាប់ឃុំខ្លួនអ្នកពាក់ព័ន្ធសរុប៨នាក់។
អ្នកដែលរដ្ឋាភិបាលចាប់ឃុំខ្លួននោះរួមមាន លោកស្រី មូរ សុខហួរ លោក ហូរ វ៉ាន់ លោក នុត រំដួល លោក ឡុង រី លោក រៀល ខេមរិន្ទ្រ លោក កែវ ភីរម្យ និងលោក ម៉ែន សុថាវរិន្ទ្រ ព្រមទាំងសកម្មជនគាំទ្រគណបក្សសង្រោះជាតិម្នាក់ទៀតក៏ត្រូវបានចាប់ខ្លួន ផងដែរ គឺលោក អឿ ណារិទ្ធិ ដោយចោទពីបទញុះញង់ឲ្យមានបទឧក្រិដ្ឋនិងកុប្បកម្មប្រឆាំងមន្ត្រីសាធារណៈ។
យ៉ាងនេះក្តីប្រធានគណបក្សប្រឆាំងលោក សម រង្ស៉ី បានអំពាវនាវឲ្យដោះលែង អ្នកដែលកំពុងឃុំខ្លួននោះ ដោយឥតលក្ខខណ្ឌ និងស្នើឲ្យបក្សកាន់អំណាច ឈប់យកប្រព័ន្ធតុលាការ ធ្វើជាឧបករណ៍នយោបាយ និងងាកមកកាន់តុចរចា ដើម្បីទម្លាយភាពជាប់គាំងនយោបាយ ដោយតម្កល់ប្រយោជន៍ជាតិជាធំ៕
សរសេរមកកាន់លោក ញឹម សុខន តាមរយៈ sokhorn@vodhotnews.com
No comments:
Post a Comment